ޕީޕީއެމް ކޮންގްރެސްގައި ޕާޓީގައި ނުހިމެނޭ މީހުން ބައިވެރިވެފައިވޭ: އަކްރަމް
21 އޮކްޓޯބަރު 2018 | އާދީއްތަ 11:01ކޮންގްރެސްގައި ބައިވެރިވާ މީހުންގެ ލިސްޓު އާންމުކުރަންޖެހޭ
ސެޕްޓެމްބަރު މަހުގައި ބޭއްވި ޕީޕީއެމްގެ ކޮންގްރެސްގެ ތެރެއިން
ޕީޕީއެމްގެ ކޮންގްރެސްގައި އެޕާޓީގައި ނުހިމެނޭ މީހުންވެސް ބައިވެރިވެފައިވާ ކަމަށާއި ސިޔާސީ ޕާޓީތަކުގެ ކޮންގްރެސް ބާއްވަން ޖެހޭނީ އެޕާޓީއެއްގެ އަސާސީ ގަވައިދުތަކާ އެއްގޮތްވާ ގޮތުގެ މަތިން ކަމަށް އިލެކްޝަންސް ކޮމިޝަނުގެ މެންބަރު އަހުމަދު އަކްރަމް ވިދާޅުވެއްޖެއެވެ.
ރާއްޖެއެމްވީއާ ވާހަކަދައްކަވަމުން އަކްރަމްް ވިދާޅުވީ ކޮންގްރެސްއެއް ބޭއްވުމުގެ ކުރިން އެ ކޮންގްރެސްއެއްގައި ބައިވެރިވާ މީހުންގެ މައުލޫމާތުތައް އާންމުކޮށް ޝަކުވާ ހުށަހަޅަން ފުރުސަތު ދޭން ޖެހޭ ކަމަށެވެ. އެކަން އެޕާޓީގެ އަސާސީ ގަވައިދުގައި ބަޔާންކޮށްފައިވީ ނަމަވެސް އެކަން ކޮށްފައިނުވާކަމަށް އަކްރަމް ވިދާޅުވިއެވެ.
އަކްރަމް ވިދާޅުވީ، އިލެކްޝަންސް ކޮމިޝަނުން ވަކި ޕާޓީއަކަށް ވުމުން ތަފާތުކުރުންތަކެއް ނުގެންގުޅޭ ކަމަށާއި އެމްޑީޕީގެ ކޮންގްރެސްގެ ބައެއް އިސްލާހުތައް ބަލައި ނުގެން ކަމަށެވެ. އެގޮތުން ޕީޕީއެމްގެ ނިންމުންތައްވެސް ބަލައި ނުގަތީ ފުރިހަމަ ކުރަންޖެހޭ ކަންކަން ފުރިހަމަކޮށްފައިނުވާތީ ކަމަށް އޭނާ ވިދާޅުވިއެވެ.
އަކްރަމް ވިދާޅުވީ، ޕީޕީއެމްގެ އަސާސީ ގަވައިދުގައި އެޕާޓީގެ މަގާމުތަކަށް ކުރިމަތިލެވޭނީ އެޕާޓީގެ މެންބަރުންނަށް ވާތާ ކަނޑައެޅިފައިވާ މުއްދަތެއް ހަމަވުމުން ކަމަށެވެ. ޕާޓީގެ އެފަދަ އަސާސްތަކާ ހިލާފުވެފައިވާ އިރު ކޮންގްރެސްގެ ނިންމުންތައް ބަލައިގަނެވޭނެ ޖާގައެއް ނެތް ކަމަށް އޭނާ ވިދާޅުވިއެވެ.
އިލެކްޝަންސް ކޮމިޝަނުން ޕީޕީއެމްގެ ކޮންގްރެސް ބަލައިނުގަތުމަށް ނިންމާފައިވަނީ އޮކްޓޫބަރު މަހުގެ 03 ވަނަ ދުވަހުއެވެ.
އިލެކްޝަންސް ކޮމިޝަނުން ޕީޕީއެމްގެ ކޮންގްރެސް ބަލައިނުގަތުމަށް ނިންމާފައިވަނީ އެޕާޓީގެ ކޮންގްރެސް ބޭއްވި ގޮތާމެދު ކަންބޮޑުވުން ފާޅުކޮށް ކުރީގެ ރައީސް މައުމޫން އަބްދުލްގައްޔޫން އީސީއަށް ސިޓީއެއް ހުށަހަޅާފައިވަނިކޮށެވެ.
