މެލޭޝިއާގެ ކުރީގެ ބޮޑުވަޒީރުގެ ނާއިބުގެ މައްޗަށް ކޮރަޕްޝަނުގެ ދައުވާ އުފުލައިފި

މެލޭޝިއާގެ ކުރީގެ ބޮޑުވަޒީރުގެ ނާއިބު، އަހުމަދު ޒާހިދް ހަމީދީގެ މައްޗަށް ކޮރަޕްޝަނުގެ ދައުވާ އުފުލައިފިއެވެ.

ކުއާލަ ލަމްޕޫރުގެ ކޯޓަކަށް ހުކުރު ދުވަހު އޭނާ ހާޒިރު ކޮށްފައި ވާއިރު އޭނާގެ މައްޗަށް 45 ދައުވާ އެއް ކުރެއެެވެ.

މެލޭޝިއާގެ އިދިކޮޅު ޕާޓީ، ޔުނައިޓެޑް މެލޭސް ނޭޝަނަލް އޯގަނައިޒޭޝަން (އުމްނޯ)ގެ ރައީސް އަކަށް މިހާރު ހުންނެވި ޒާހިދް ވަނީ ކޯޓަށް ހާޒިރުކުރި އިރު ސަޕޯޓަރުންނަށާއި މީޑިއާ އަށް ހަނާއަޅުުއްވާލައްވާފައެވެ.

ޒާހިދުގެ މައްޗަށް ވަނީ ނަހަމަ ގޮތުގައި ބާރުގެ ބޭނުންކުރުމާއި، ޚިޔާނާތްތެރިވުމާއި 114 މިލިއަން ރިންގިޓްގެ މަނީ ލައުންޑަރިންގ ހިންގާފައިވާ ކަމަށް ދައުވާ އުފުލާފައެވެ.

ފައިސާ ނަހަމަ ގޮތުގައި ބޭނުންކުރި ކަމަށް ކުރެވޭ ބައެއް ދައުވާތަކުގެ ތެރޭގައި އޭނާގެ އާއިލާ އިން ހަދާފައިވާ ފައުންޑޭޝަނަކުން ނަހަމަ ގޮތުގައި ފައިސާ ބޭނުންކުރުމާއި، 2013 ވަނަ އަހަރުން ފެށިގެން ހޯމް މިނިސްޓަރަކަށް އޭނާ ހުންނެވި އިރު ސުވާލު އުފެދޭ ފަދަ ގޮތްގޮތަށް ފައިސާ ލިބިފައި ވުން ވެސް ހިމެނެއެވެ. ޒާހިދު ވަނީ އެ ހުރިހާ ތުހުމަތަކަށް އިންކާރު ކުރައްވާފައެވެ.

މެލޭޝިއާގެ އެންޓިކޮރަޕްޝަން ކޮމިޝަނުން ބުރާސްފަތި ދުވަހު ޒާހިދު ހައްޔަރުކޮށްފައިވާ އިރު އެ ދުވަހުގެ ރޭ އޭނާ ހޭދަކުރެއްވީ ބަންދުގައެވެ.

ކޯޓުން ވަނީ ކަފާލާތުގެ ގޮތުގައި ދެ މިލިއަން ރިންގިޓް ބެހެއްޓުމަށް ފަހު އޭނާ ދޫކޮށްލައި، އޭނާގެ ޕާސްޕޯޓް ހިފަހަޓަން އަންގާފައެވެ.