ފަރަށް އެރި ދޯނި އަދިވެސް ފުނެއް ނުވޭ: އެމްއެންޑީއެފް
19 އޮކްޓޯބަރު 2018 | ހުކުރު 03:57ދޯނި ފަރަށް އެރިކަމުގެ މައުލޫމާތު ލިބިފައިވަނީ ބުރާސްފަތި ދުވަހުގެ ރޭ ދަންވަރު
ފަރަށް އެރި މަގުލަސް ދޯނި | އެމްއެންޑީއެފް
ބްރާސްފަތި ދުވަހުގެ ރޭ ދަންވަރު މާލެ އަތޮޅު ފުށިދިއްގަރުފަޅުގެ އިރުމަތީ ފަރާތު ފަރަށް އެރި "މަގުލަސް" ނަމަކަށް ކިޔާ ދޯނި އަދިވެސް ފުން ނުވާ ކަމަށް އެމްޑީއެފުން ބުނެފިއެވެ.
އެމްއެންޑީއެފުން ބުނީ ވ. އަތޮޅުގައި ފަރުމަސްވެރިކަން ކުރުމަށް ފަހު މާލެއަށް ދަތުރުކުރި މި ދޯނި ފަރަށް އެރުމުގެ ހާދިސާގެ މަޢުލޫމާތު އެމްއެންޑީއެފް ކޯސްޓްގާޑު މެރިޓައިމް ރެސްކިއު ކޯޑިނޭޝަން ސެންޓަރަށް ލިބިފައިވަނީ ދަންވަރު 01:23 ހާއިރުއެވެ.
ފަރުމަސްވެރިކަން ކުރާ، 80 ފޫޓުގެ މި ދޯނި، ފަރަށް އެރުމާ ގުޅިގެން އެމްއެންޑީއެފް މާލޭ އޭރިއާ ކޯސްޓްގާޑު ސްކޮޑަންގެ ޑައިވަރުންގެ ޓީމެއް ކޯސްޓްގާޑުގެ ލޯންޗުގައި ގޮސް، އެ ސަރަހައްދުގައި ހަރްކާތްތެރި ވަމުންދާ ކަމަށް އެމްއެންޑީއެފުން މައުލޫމާތު ދެއެވެ.
މި ހާދިސާ ހިނގިއިރު، އެ ދޯނީގައި 5 މީހުން ތިބި ކަމަށާއި އޭގެ ތެރޭގައި ދިވެއްސަކާއި 4 ބިދޭސީން ހިމެނެއެވެ. އަދި މި އެންމެންގެ ހާލު ވެސް ރަނގަޅު ކަމަށް އެމްއެންޑީއެފުން މައުލޫމާތު ދެއެވެ.
އެ ދޯނީގައި ހުރި ބައެއް ސާމާނު އޮޔާދާތީ އެ ސަރަހައްދުން ދަތުރުކުރާ ދަތުރުވެރިން ސަމާލުވުމަށް އެމްއެންޑީއެފުން ވަނީ އިލްތިމާސްކޮށްފައެވެ.
މި ދޯނި ފުންކުރުމުގެ މަސައްކަތް ދޯނީގެ ވެރިފަރާތާއި އެމްއެންޑީއެފް ކޯސްޓްގާޑުން ގުޅިގެން ދަނީ ކުރަމުންނެވެ.
