ރައްޔިތުންނަށް މިއަދު ކުރެވެނީ ބިރުވެރިކަމުގެ ތެރެއިން މިނިވަންވި ކަމުގެ އިހުސާސް:ރޮޒެއިނާ
19 އޮކްޓޯބަރު 2018 | ހުކުރު 00:24ފާއިތުވެގެން ދިޔަ ފަސް އަހަރު ރައްޔިތުން ތިބީ އަނގަ ހޮޅުވާލަން ނުކުރެފައި
އައްޑޫ މީދޫ ދާއިރާގެ މެމްބަރު ރޮޒައިނާ އާދަމް
ދިވެހި ރައްޔިތުންނަށް މިއަދު ކުރެވެނީ ބިރުވެރިކަމުގެ ތެރެއިން މިނިވަންވި ކަމުގެ އިހުސާސް ކަމަށް ރައްޔިތުންގެ މަޖިލީހުގެ އައްޑޫ މީދޫ ދާއިރާގެ މެމްބަރު ރޮޒައިނާ އާދަމް ވިދާޅުވެއްޖެއެވެ.
ރާއްޖެޓީވީގެ ފަލަސުރުހީ ޕްރޮގްރާމްގައި ރޮޒެއިނާ ވިދާޅުވީ މިފާއިތުވެގެން ދިޔަ ފަސް އަހަރު ރައްޔިތުން ތިބީ އަނގަ ހުޅުވާލަން ނުކުރެފައި ކަމަށާއި، މުޅި ދުނިޔެ މިކަމަށް ހެކިވާނެ ކަމަށެވެ.
ރޮޒެއިނާ ވިދާޅުވީ މިބޭއްވިގެން ދިޔަ ރިޔާސީ އިންތީޚާބު، އިންތިޚާބީ ރައީސް އިބްރާހިމް މުހައްމަދު ސޯލިހު ކާމިޔާބު ކުރެއްވުމާއި ގުޅިގެން ސޯޝަލް މީޑިއާއިންނާއި، މުޖުތަމައުގެ ތެރެއިން ރައްޔިތުން ބަސް ބުންނަން ބޭނުންވެފައިވާ މިންވަރު އެނގިގެން ދިޔަ ކަމަށެވެ. އެގޮތުން މިއަދާ ހަމައަށް ރައްޔިތުންގެ ގިނަ ބަޔަކު އެމީހުންގެ ޝުއޫރު ފާޅުކޮށް ލައްކަ ބަސް ބުނެފައިވާ ކަމަށާއި، މިއަދު ރައްޔިތުންނަށް ކުރެވެނީ މިނިވަން ކަމުގެ އިހުސާސް ކަމަށް އޭނާ ވިދާޅުވިއެވެ.
ރޮޒެއިނާ ވިދާޅުވީ ދައުލަތުގެ ހުރިހާ މުއައްސާސާއެއް އޮތީ ހިމޭނުން ކަމަށާއި، މިނިވަން މުއައްސަސާތައް ވެސް އޮތީ ނިދާފަ ކަމަށެވެ.
"ބްރޯޑްކާސްޓިންގ ކޮމިޝަނަށް ވެސް ޗެނަލް 13އާ ދޭތެރޭގައި އެއްވެސް އެއްޗެއް ބުނަން މިއޮތް ހުރިހާ ދުވަހު ކެރިވަޑައިނުގަންނެވި. މިއަދު އަޅުގަނޑުމެންނަށް ފެނޭ. އެންޓި ކޮރަޕްޝަން ކޮމިޝަނުން ވެސް މިއޮތް ހުރިހާ ދުވަހު އަޅުގަނޑުމެންނަކަށް ނުފެނޭ" ރޮޒެއިނާ ވިދާޅުވިއެވެ.
ރޮޒެއިނާ ވިދާޅުވީ ރައީސް ޔާމީންގެ ކެމްޕޭނަށް ދައުލަތުގެ ފައިސާއާއި، މުދާ ނުހައްގުން ބޭނުންކުރާ ވާހަކަ މުއައްސަސާތަކުގެ ސަމާލުކަމަށް ގެނައި ކަމަށާއި، އޭރު މިކަމާއި ދެކޮޅަށް ބަސް ބުނާނެ މުއައްސަސާއެއް ތަހުގީގު ކުރާނެ ތަނެއް ވެސް ނެތް ކަމަށެވެ. އަދި މުޅި ގައުމު އޮތީ ގަޑުބަޑުކޮށްފައި ކަމަށާއި، ރައްޔިތުން ތިބީ މާޔޫސްކަމުގެ ތެރޭގައި ކަމަށެވެ.
ރައްޔިތުންނަށް ހާގީގީ އުފާވެރިކަން ލިބޭނީ މިނިވަންކަމާއެކު ބަސްބުނެވި، އަދުލްއިންސާފު ގާއިމްކުރެވިފައިވާ މުޖުތަމައުއެއްގައިކަން ފާހަގަކުރައްވައި ރޮޒެއިނާ ވިދާޅުވީ ފާއިތުވެގެންދިޔަ މިފަސް އަހަރު ރައްޔިތުންނަށް މިއުފާވެރިކަން ނުލިބޭ ކަމަށެވެ.
"ހިޓްލަރަށްވުރެ މިޒަމާނަށް ބަލާއިރުގައި އަނިޔާވެރި ވެރިކަމެއް ކުރަމުން ގެންދިޔައީ. އެހެންވީމަ މީނަގެ ކިބައިން ސަލާމަތްވީމަ މީނަ އަޅުގަނޑުމެންގެ ކުރިމައްޗަށް ނުކުމެ، މިވިދާޅުވަނީ މިއޮތް ހުރިހާ ދުވަހު ވަރަށް އުފަލުގައި ނޫންތަ ތިބީއެއް. މިއޮތް ހުރިހާ ދުވަހު ވަރަށް ތަރައްގީވެފަ ނޫންތަ ތިބީއެއް. ބްރިޖު މައްޗަށް އަރާލާއިރުގައި އުފަލެއް ނުވޭތަ؟ އަނެއްކަމެއް ކޮށްލާއިރު އުފަލެއް ނުވޭތަ؟ ޕާކަށް ދިޔާމަ އުފަލެއް ނުވޭތަ؟ މިހެން ބުނީމަ އަޅުގަނޑުމެންނަށް ހައްޕު ކިޔައިގެން ހިތުގައި ހުރި އިހުސާސްތައް ބޭރުނުކުރެވިފައި ތިބޭއިރު މާބޮޑު އުފާވެރިކަމެއް ނާންނޭ އެއްވެސް މީހަކަށް އެނގޭތޯ" ރޮޒެއިނާ ވިދާޅުވިއެވެ.
ރޮޒެއިނާ ވިދާޅުވީ ތަރައްގީއާ ފައިސާއަށްވުރެ ދިވެހިން މިނިވަންކަމާއި، ގާނޫނު އަސާސީން ލިބިދީފައިވާ ބަސް ބުނުމުގެ ހައްގު ބޭނުންވާކަން ދިވެހި ތާރީހުން ވެސް ހެކި ދޭ ކަމަށެވެ.
”ބަސް ބުނަން ލިބުމަކީ ވަރަށް ބޮޑު އެއްޗެއް. ތަރައްގީއާ ތިހުރިހާ އެއްޗެއްގެ ފައިސާއާ ހުރިހާ އެއްޗަކަށް ވުރެ ބަސް ކެރިގެން ބުނަން ލިބުމަކީ ވަރަށް ބޮޑު އެއްޗެއް. ގިނަ މީހުން ތިބީ ބަސް ނުބުނެވިފައި. ވަޒީފާގެ ބިރުވެރިކަމުގަ ތިބި މީހުން ތިބީ ފަޅާގެންދާން ތައްޔާރުވާންވެފައި." ރޮޒެއިނާ ވިދާޅުވިއެވެ.
ރޮޒެއިނާ ވިދާޅުވީ ރައްޔިތުންގެ ނިންމުމަށް އިހުތިރާމް ކުރަން ޖެހޭ ކަމަށާއި، ކޮންމެ ގޮތަކަށް ރައްޔިތުން ނިންމުން ނިންމި ކަމުގައި ވިޔަސް ރައްޔިތުންނަކީ ފަހު ބަސް ބުނާ މީހުން ކަމަށެވެ. އަދި ވިދާޅުވީ ބާރުތައް ފެށިގެން އަންނަނީ ވެސް ރައްޔިތުންގެ ކިބައިން ކަމަށްވާއިރު، ރައްޔިތުންގެ ނިންމުމަށް އިހުތިރާމް ނުކޮށް ގަދަ ބަސް ބުނާ މީހަކީ ކުރިއަށް އޮތް ދުވަސްތަކަށް ވެސް ބޮޑު ތަނުން ފެއިލްވާނެ މީހަކަށް ވާނެ ކަމަށެވެ.
