އަންނަ އަހަރުގެ ޖެނުއަރީ މަހުގެ އެއްވަނަ ދުވަހު ޓީމެއްގެ ކޯޗުކަމާ ހަވާލުވާނެ ކަމަށް އާސެނަލް އަށް 22 އަހަރުވަންދެން ކޯޗުކޮށްދިން އާސެން ވެންގާ ބުނެފިއެވެ.

ނޫސްވެރިންނަށް މައުލޫމާތު ދެމުން ވެންގާ ބުނީ ޖެނުއަރީ އެއްވަނަ ދުވަހު ޓީމެއްގެ ކޯޗުކަމާ ހަވާލުވާން އޭނާ ނިންމާފައިވާ ކަމަށާއި، ނަމަވެސް ހަވާލުވާނީ ކޮން ޓީމަކާ ކަމެއް އަދި ނޭނގޭ ކަމަށެވެ.

އުމުރުން 68 އަހަރުގެ ވެންގާ ބުނީ ހަވާލުވާނެ ވަޒީފާތައް ވަރަށް ގިނަ ކަމަށާއި، ގައުމީ ޓީމުތައް ވެސް އޭގެ ތެރޭގައި ހިމެނޭ ކަމަށެވެ. އަދި ޖަޕާން ގައުމީ ޓީމަށް ކޯޗުކޮށްދިނުން ވެސް ކައިރިކަމަށް އޭނާ ވަނީ ބުނެފައެވެ.

ރިޕޯޓްތައް ބުނާ ގޮތުން ވެންގާ ހަވާލުވާނީ ޖަޕާންގެ ހެޑްކޯޗުގެ މަގާމާއެވެ. އެހެންނަމަވެސް މިކަން ކަށަވަރުވާގޮތެއް ނުވެއެވެ.

އާސެނަލްގެ ކޯޗުގެ މަގާމާއި ވެންގާ ހަވާލުވީ 1996 ވަނަ އަހަރުގެ އޮކްޓޯބަރު މަހުގެ ތެރޭގައެވެ. ޕްރިމިއާ ލީގުގައި އޭނާ އެ ޓީމަށް 823 މެޗުގައި އިރުޝާދު ދީފައިވާއިރު މިއީ ރެކޯޑެކެވެ. ވެންގާގެ އިރުޝާދުގެ ދަށުން އާސެނަލްއިން 1549 ލަނޑު ޖަހާފައިވާއިރު އޭނާ އެ މަގާމު ދޫކޮށްލީ ސަޕޯޓަރުންގެ ފަރާތުން ވޭތުވެދިޔަ ދެ ސީޒަނުގައި އޭނާއަށް ކުރިމަތިވި ފާޑުކިޔުންތަކުގެ ސަބަބުން ކަމަށް ގިނަ ބަޔަކު ގަބޫލުކުރެއެވެ.

އުމުރުން 68 އަހަރުގެ ވެންގާ ވަނީ އާސެނަލްގައި އޭނާ ހޭދަކުރި ދުވަސްތަކުގައި އެ ޓީމަށް ތިން ޕްރިމިއާ ލީގާއި ހަތް އެފްއޭ ކަޕް ކާމިޔާބުކޮށްދީފައިވެއެވެ. ވެންގާގެ އިރުޝާދުގެ ދަށުން އާސެނަލްއިން ހޯދި އެންމެ ބޮޑު ކާމިޔާބަކީ 2004 ވަނަ އަހަރުގެ ޕްރިމިއާ ލީގުގެ ތަށި އެއްވެސް މެޗަކުން ބަލިނުވެ އުފުލާލުމެވެ.