އެޗްޑީސީގެ މުވައްޒަފުންގެ ޕެޓިޝަން މިދަނީ ދިރާސާ ކުރަމުން: އޮޑިޓް އޮފީސް

އެޗްޑީސީގެ މުވައްޒަފުންގެ ޕެޓިޝަން ދިރާސާކުރަމުން ދާ ކަމަށް އޮޑިޓް އޮފީހުން ބުނެފިއެވެ.

އޮޑިޓް އޮފީހުން ބުނީ، އެޗްޑީސީގެ އިސްވެރިންތަކެއް ހިމެނޭ ގޮތަށް ސޮއިކޮށްފައިވާ ޕެޓިޝަން އޮޑިޓް އޮފީހަށް ލިބިފައިވާއިރު އެކަންކަން ދިރާސާ ކުރުމަށް އޮޑިޓް އޮފީހުގެ އެގްޒެކެޓިވް ބޯޑުން ނިންމާފައިވާ ކަމަށެވެ. އެ ޕެޓިޝަންގައި 170 މުވައްޒަފުން ވަނީ ސޮއިކޮށްފައެވެ. އެގޮތުން އެކުންފުނީގެ ޗީފް ފައިނޭންޝަލް އޮފިސަރ (ސީއެފްއޯ) އަލީ ޝަރީފާއި، ލީގަލް ޑިރެކްޓަރއެއްގެ އިތުރުން ޕްލޭނިންގ ޑިރެކްޓަރެއް ވެސް ހިމެނެއެވެ. މީގެ އިތުރުން ސިވިލް އިންޖިނިއަރުންނާއި ޑިރެކްޓަރުންގެ ލެވެލްގެ ގިނަ މުވައްޒަފުންތަކެއް ސޮއި ކޮށްފައިވެއެވެ. އަދި އެސިސްޓެންޓް ޑިރެކްޓަރުންނާއި ގިނަ އަދަދެއްގެ ފައިނޭންސް އޮފިސަރުން ވެސް އެ ޕެޓިޝަންގައި ސޮއިކޮށްފައި ވެއެވެ.

ހުޅުމާލޭގެ ދެވަނަ ފިޔަވަހީގެ 400 ގޯތި އުސޫލްތަކާ ހިލާފަށް ވިއްކުމާ ދެކޮޅަށް ހުށަހެޅި މި ފެޓިޝަންގައި ވަނީ 19 ކަމެއް ފާހަގަކޮށްފައެވެ.

އެގޮތުން ގޯތިތައް ކަނޑައެޅިފައިވާ ބިމުން އެލޮކޭޓްކޮށްފި ނަމަ ހުޅުމާލޭގެ ފުރަތަމަ ފިޔަވައްސެކޭ އެއްފަދައިން އެ ބިންތައް ސެކަންޑަރީ މާކެޓުގައި ނުހަނު ބޮޑު އަގުގައި ވިއްކުމުގެ ފުރުސަތު ލިބިގެންދާނެ ކަމަށް ބުނެފައި ވެއެވެ. މި ބިންތައް ދޫކުރުމުގެ އަސްލު މަގްސަދު ކަމަށްވާ ބޯހިޔާވަހިކަން އެންމެ ބޭނުން ޖެހިފައިވާ ފަރާތްތަކުން ނުލިބި އެހެނިހެން ވިޔަފާރީގެ ބޭނުންތަކަށް ބޭނުންކުރުމުގެ ފުރުސަތު ލިބިގެންދާނެ ކަމަށް ފެޓިޝަނުގައި ވެއެވެ.

މި ބިންތައް ދޫކުރުމަށް ޕްލޭން ކުރެވި އެލޮކޭޓް ކުރެވިފައި ވަނީ ކޮންމެ ޕްލޮޓަކަށް 2000 އަދި 3000 އަކަފޫޓުގެ މަގުން ލަގްޒަރީ މާކެޓަށެވެ. މިއީ ހުޅުމާލޭގައި އެންމެ އަގުހުރި ބިންތައް ކަމަށް ޕެޓިޝަންގައި ބުނެފައިވެއެވެ. އެގޮތަށް 500 ޕްލޮޓް ދޫކޮށްފި ކަމުގައިވާ ނަމަ އެންމެ އަގުހުރި ވޯޓަރ ޕްރޮންޓްގެ ބިންތަކުގެ ހަމަ އަގު ކޯޕަރޭޝަނުން ނުލިބި އިއާދަ ނުކުރެވޭވަރުގެ ގެއްލުމެއް ލިބިދާނެ ކަމަށް ބަޔާންކޮށްފައި ވެއެވެ.

ހުޅުމާލޭދެ ދެވަނަ ފިޔަވަހިން ވިއްކަން ހަމަޖެހިފައިވާ ބިންތަކުގެ އަގު އެވްރެޖުކޮށް އުޅެނީ 4600ރ. އަށް ކަމަށް ވާއިރު 2017 ވަނަ އަހަރު މި ގޯތިތައް ދޫކުރެވިފައިވާ އެންމެ ކުޑަ އަގަކީ 3000ރ. އެވެ. އަދި 2017 ވަނަ އަހަރު މި އުސޫލުން ބިން ދޫކުރެވުނު އިރު ދެވަނަ ފިޔަވަހިން އެތަނުގައި އެއްވެސް ބޭސިކް އިންފްރާސްޓްރަކްޗަރއެއް ތަރައްގީ ކުރެވިފައިނުވާ ކަމަށް ވެސް ޕެޓިޝަންގައި ފާހަގަކޮށްފައި ވެއެވެ.

އެޗްޑީސީން 400 ގޯތި ދޫކޮށްފިކަމުގައިވާ ނަމަ އެކުންފުންޏަށް 1.8 ބިލިއަން ރުފިޔާގެ ގެއްލުން ލިބިގެންދާނެ ކަމަށް ޕެޓިޝަންގައި ހިމަނާފައި ވެއެވެ. އަދި 100 އަކަފޫޓް 2000ރ. އަށް ވިއްކައިފި ކަމުގައިވާ ނަމަ ވެސް އެ ކުންފުންނަށް 280 މިލިއަން ރުފިޔާގެ ގެއްލުން ލިބޭނެ ކަމަށާއި ޖުމްލަ ދެ ބިލިއަން ރުފިޔާގެ ގެއްލުން އެޗްޑީސީއަށް ކުރާނެ ކަމަށް އެކުންފުނިން އެކުލަވާލި ޕެޓިޝަނުގައި ބުނެފައި ވެއެވެ.