ސޯމާލިއާ: އެމެރިކާއިން ހަމަލާދީ އަލްޝަބާބުގެ 60 ހަނގުރާމަވެރިން މަރާލައިިފި
އެމެރިކާއިން ބުނީ ހަމަލާތަކުގައި އާއްމުންގެ އެއްވެސް މީހަކު މަރުވެފައިނުވާކަމަށް
އަލް ޝަބާބުގެ ހަނގުރާމަވެރިންތަކެއް 2012 ވަނަ އަަހަރު
ސޯމާލިއާގެ ހަނގުރާމަވެރި ޖަމާއަތް، އަލް ޝަބާބާ ދެކޮޅަށް އެމެރިކާއިން ވައިގެމަގުން ދިން ހަމަލާތަކެއްގައި އެ ޖަމާއަތުގެ 60 އަށް ހަނގުރާމަވެރިން މަރާލައިފިކަމަށް އެމެރިކާގެ އަސްކަރީ އޮފިޝަލުން ވިދާޅުވެއްޖެއެވެ.
ޔޫއެސް އެފްރިކާ ކޮމާންޑުން އަންގާރަދުވަހު ބުނީ އެމެރިކާގެ އަސްކަރިއްޔާއިން ހުކުރުދުވަހު ހަމަލާތަށް ކުރިޔަށް ގެންދިޔައީ އަލްޝަބާބުގެ ކޮންޓްރޯލްގެ ދަށުގައި އޮންނަ ހެރަރޑިއަރގަައިކަމަށެވެ.
ޔޫއެސް އެފްރިކާ ކޮމާންޑުން ނެރުނު ބަޔާނުގައި ބުނެފައިވާގޮތުގައި މި ހަމަލާތަކުގައި އާއްމުންގެ އެއްވެސް މީހަކު މަރުވެ ނުވަތަ ޒަޚްމްވެފައެއްނުވެއެވެ.
މިއީ 2017 ވަނަ އަހަރުގެ ނޮވެމްބަރު މަހަށްފަހު އެމެރިކާއިން ސޯމާލިއާގައި ދިން އެންމެ ވަރުގަދަ ހަމަލާތަކެވެ. އެ ފަހަރުގެ ހަަމަލާތަކުގައި އަލް ޝަބާބުގެ 100 ހަނގުރާމަވެރިން މަރާލާފައިވެއެވެ.
އެމެރިކާގެ އަސްކަރިއްޔާއިންވަނީ މި އަހަރުގެ ތެރޭގައި އަލްޝަބާބާއި ދެކޮޅަށް ޑްރޯން ހަމަލާތައްވެސް ހިމެނޭގޮތުން 24 އަށްވުރެ ގިނަ ފަހަރު ވައިގެ ހަމަލާތައް ދީފައެވެ.
އަލް ޝަބާބުންވަނީ އެ ޖަމާއަތުން މިހާތަނަށް ދިން އެންމެ ގިނަ މީހުން މަރާލެވުނު ހަމަލާއަށް އަހަރުފުރުން މިދިޔަ އާދީއްތަ ދުވަހު ފާހަގަކޮށްފައެވެ.
ސޯމާލިއާގެ ވެރިރަށް މޮގަދިޝޫގައި ދިން އެ ހަމަލާގައި 500 އަށްވުރެ ގިނަ މީހުން މަރުވިއެވެ.
