ރައްޔިތުންގެ ޙައްޤުތައް ގަދަބާރުން ނިގުޅައިގަންނަ ތަން ބަލަން ރައްޔިތުން ނުތިބޭނެކަން ކަށަވަރު: ޝެއިޚް އިލްޔާސް
14 އޮކްޓޯބަރު 2018 | އާދީއްތަ 04:15ރައްޔިތުން އަނިޔާވެރިކަމާއި ޚިޔާނާތާއި އަޅުވެތިކަމާ ދެކޮޅަށް ވަރަށް ސާފުކޮށް ވަނީ ނޫނެކޭ ބުނެފައި
އައްޝައިޚް އިލްޔާސް ހުސައިން
ރައްޔިތުންގެ ޙައްޤުތައް ގަދަބާރުން ނިގުޅައިގަންނަ ތަން ބަލަން ރައްޔިތުން ނުތިބޭނެކަން ކަށަވަރު ކަމަށް މަޝްހޫރު ދީނީ ޢިލްމުވެރިޔާ އަދި އަދާލަތު ޕާޓީގެ ޢިލްމުވެރިންގެ މަޖިލީހުގެ ރައީސް އައްޝައިޚް އިލްޔާސް ހުސައިން ވިދާޅުވެއްޖެއެވެ.
މިދިޔަ ސެޕްޓެމްބަރު މަހުގެ 23 ވަނަ ދުވަހު ރާއްޖޭގައި ބޭއްވި ރިޔާސީ އިންތިޚާބުގައި އެއް ލައްކަ ތިރީސް ހަތަރު ހާހަށްވުރެ ގިނަ މީހުން ރައީސް ޢަބްދުﷲ ޔާމީނަށް ނޫނެކޭ ބުނެފައި ވަނިކޮށް އިންތިޚާބު ބާތިލް ކުރުމަށް ރައީސް ޔާމިން ވަނީ ސުޕްރީމް ކޯޓަށް ވަޑައިގަންނަވާފައެވެ.
ބަލި ޤަބޫލް ކުރެއްވުމަށްފަހު އިންތިޚާބު ބާތިލް ކުރުމަށް ރައީސް ޔާމީން ހުށަހެޅުއްވި ހުށަހެޅުއްވުމަށް އިޝާރާތް ކުރައްވާ ޝައިޚް އިލްޔާސް ކުރެއްވި ޓްވީޓެއްގައި ވިދާޅުވެފައިވަނީ ރައްޔިތުން އަނިޔާވެރިކަމާއި ޚިޔާނާތާއި އަޅުވެތިކަމާ ދެކޮޅަށް ވަރަށް ސާފުކޮށް ނޫނެކޭ ބުނެފައިވަނިކޮށް ގަދަބާރުން ނުފޫޒްގެ ބޭނުންކޮށްގެން ރައްޔިތުންގެ ޙައްޤު ނިގުޅައިގަންނަ ތަން ބަލަން ރައްޔިތުން ނުތިއްބަވާނެކަން ކަށަވަރު ކަމަށެވެ.
މި އަނިޔާވެރިކަމުން ރައްކާތެރި ކުރެއްވުމަށް ޝައިޚް އިލްޔާސް ވަނީ ﷲ އަށް ދުޢާ ދަންނަވާފައެވެ.
މި ޓްވީޓާއެކު ޝައިޚް އިލްޔާސް ވަނީ އައްޝުއުރާ ސޫރަތުގެ 227 ވަނަ އާޔަތް މާނަޔާއެކު އެޓޭޗް ކުރައްވާފައެވެ.
"އީމާންވެ ސޯލިޙް ޢަމަލަތައްކޮށް އަދި ގިނަގިނައިން ﷲ އަށް ހަނދުމަކޮށް، އަދި އަނިޔާ ލިބުމަށްފަހު ނަސްރު ލިބިގަތް މީހުން މެނުވީއެވެ. ނިކަން ހުރެ އަނިޔާވެރިވި މީހުންނަށް، އެއުރެން ރުޖޫޢަ ވާހުށީ ކޮންތަނަކަށްކަން އެނގޭ ހުށްޓެވެ." އެއާޔަތުގެ މާނައިގައި ބުނެފައިވެއެވެ.
ރިޔާސީ އިންތިޚާބުން ރައީސް ޔާމީން ބަލިވެވަޑައިގެންކަން މުޅި ދުނިޔެ ޤަބޫލު ކޮށްފައިވަނިކޮށް ރައީސް ޔާމީން ސުޕްރީމް ކޯޓަށް ހުށަހެޅުއްވީ ދުސްތޫރީ މައްސަލައެއްގެ ގޮތުގައެވެ. އަދި އެމައްސަލައިގާ އިންތިޚާބު ބާތިލްކޮށްދިނުމަށް އެދިފައި ވެއެވެ.
