ޒައިނަބްގެ ގާތިލް އިމްރާން ދަންޖެއްސުމަށް ނިންމައިފި

ޕާކިސްތާނުގައި ރޭޕްކުރުމަށް ފަހު ވަރަށް އަނިޔާކޮށް މަރާލި ހަތް އަހަރުގެ ޒައިބް އަންސާރީގެ ގާތިލް އިމްރާން އަލީ އަންނަ ބުދަ ދުވަހު ދަންޖައްސައި މަރަން ނިންމައިފިއެވެ.

ޕާކިސްތާނުގެ އެންޓި ޓެރަރިޒަމް ކޯޓުން ޒައިނަބްގެ އަވައްޓެރިޔާ، އިމްރާންގެ މައްޗަށް މަރުގެ ހުކުމް އިއްވީ ހުކުރު ދުވަހުއެވެ.

ޒައިނަބް މަރާލާފައި އޮއްވައި ފެނިފައިވަނީ އޭނާ ދިރިއުޅެމުންދިޔަ ޕަންޖާބުގެ ކަސޫރު ޑިސްޓްރިކްޓްގެ މަގެއްގެ މަތީގައި ހުރި ކުނިތަކެއްގެ ތެރެއިން ޖަނަވަރީ 9 ވަނަ ދުވަހުއެވެ. ޒައިނަބްގެ އޮޓޮޕްސީން ހާމަވި ގޮތުގައި ރޭޕް ކުރުމަށް ފަހު އޭނާ މަރާލާފައިވަނީ ކަރުގައި ހިފައި، ނޭވާ ހާސްކޮށްގެންނެވެ. އަދި މަރާލުމުގެ ކުރިން އޭނާ ބަންދުކޮށްގެން ގެންގުޅެފައިވާ ކަމާއި، އަނިޔާ ކޮށްފައިވާކަންވެސް އޮޓޮޕްސީން ވަނީ ހާމަވެފައެވެ.

ކުށަށް އިއުތިރާފް ވަމުން އިމްރާން ކޯޓުގައި ބުނީ އޭނާ ގާނޫނީ އެހީތެރިކަން ބޭނުން ނުވާ ކަމަށެވެ. އިމްރާން ބުނީ އޭނާ ހިންގި ޖަރީމާއަށް ބަލާއިރު ކޮންމެ އަދަބެއް ދިން ނަމަވެސް އެ ވާނީ ކުޑަ އަދަބަކަށް ކަމަށެވެ.

ޒައިނަބްގެ މަރާއި ގުޅިގެން އެފަދަ މައްސަލަތަކުގައި ފުލުހުން އިހުމާލުވާކަމަށް ބުނެ، ކަސޫރް ޑިސްޓްރިކްޓްގައި ވަނީ މުޒާހަރާ ކޮށްފައެވެ. މުޒާހަރާކުރި މީހުންގެ ތެރެއިން ދެ މީހަކު މަރުވެފައި ވަނީ ރުޅިގަދަވެފައި ތިބި މުޒާހަރާގެ ބައިވެރިން ކަސޫރުގެ ފުލުހުންގެ މައި މަރުކަޒަށް ވަންނަން މަސައްކަތްކުރުމުން، އެމީހުންނާ އަމާޒުކޮށް ފުލުހުން ބަޑިޖެހުމުންނެވެ.

ޒައިނަބްގެ މަރާއި ގުޅިގެން، އިމްރާން އަލީ ހައްޔަރުކުރިކަން ހާމަކޮށްފައިވަނީ ޖަނަވަރީ މަހުގެ 23 ވަނަ ދުވަހުއެވެ. ފުލުހުން ހާމަކޮށްފައިވާ ގޮތުގައި އިމްރާން ހައްޔަރުކުރީ ޖަނަވަރީ މަހުގެ 17 ވަނަ ދުވަހުއެވެ. އަދި އެކަން ހާމަކުރުން ލަސްވީ، ޑީއެންއޭ ޓެސްޓާއި، އެހެނިހެން ޓެސްޓްތައް ހަދައި، އިމްރާން އަކީ ޒައިނަބްގެ ޤާތިލުކަން ޔަޤީން ކުރުމަށް ކަމަށް ފުލުހުން ވަނީ ބުނެފައެވެ.

ޒައިނަބުގެ އާއިލާ އިން ބުނެފައި ވަނީ ޒައިނަބު ގެއްލިގެން ހޯދި ފަސް ދުވަސް ތެރޭ ފުލުހުން އެކަށީގެންވާ ގޮތެއްގައި މަސައްކަތް ކުރި ނަމަ އެ ކުއްޖާ ދިރިހުއްޓާ ފެނުނީސް ކަމަށެވެ. ޒައިނަބް ވަގަށް ނެގި އިރު އޭނާގެ މައިން ބަފައިން ވަނީ އުމްރާގެ އަޅުކަމަށް މައްކާ އަށް ގޮހެވެ.

ޒައިނަބްގެ ކުރިން ހިނގާފައިވާ ރޭޕްގެ ހަތް މައްސަލައެއްގައިވެސް ގާތިލް އިމްރާންގެ ޑީއެންއޭ ފެނިފައިވާކަމަށް ފުލުހުން ބުނެއެވެ