ދުންޔާ އިންޑިއާ އަށް ކުރައްވާ ދަތުރުފުޅަކީ ކޯލިޝަންގެ ދަތުރުފުޅެއް ނޫން: މާރިއާ
ގުޅިފައިވާ ޕާޓީތަކުން ގުޅިގެންނާއި ވަކިވަކިން އަދި ސިޔާސީ ލީޑަރުންގެ ފަރާތްޕުޅުން ހާއްސަ މަންދޫބުން މީގެ ކުރިން ވެސް އެކި ގައުމުތަކަށް ވަޑައިގެންނަވާ
ކުރީގެ ފޮރިން މިނިސްޓަރު ދުންޔާ މައުމޫން
ކުރީގެ ރައީސް މައުމޫން އަބްދުލްގައްޔޫގެ ދަރިކަނބަލުން ދުންޔާ މައުމޫން މިހާރު އިންޑިއާއަށް ކުރައްވާ ދަތުރުފުޅަކީ ގުޅިފައިވާ ސިޔާސީ ޕާޓީތަކުގެ ކޯލިޝަނު ގައި ހިމެނޭ ކުރީގެ ރައީސް މައުމޫން އަބްދުލްގައްޔޫމުގެ މައުމޫން ރިފޯމް މޫވްމަންޓް (އެމްއާރުއެމް)ގެ ފަރާތުން ކުރައްވާ ދަތުރުފުޅެއް ކަމަށް އިންތިހާބީ ރައީސް އިބްރާހީމް މުހައްމަދު ސޯލިހުގެ ތަރުޖަމާނު މާރިއާ އަހުމަދު ދީދީ ވިދާޅުވެއްޖެ އެވެ.
މާރިއާ އެހެން ވިދާޅުވީ ކުރީގެ ރައީސް މައުމޫން އަބްދުލްގައްޔޫމްގެ ފަރާތްޕުޅުން ހާއްސަ މަންދޫބެއްގެ ގޮތުގައި އިންޑިއާ ސަރުކާރުގެ އިސްބޭފުޅުންނާ ބައްދަލު ކުރެއްވުމަށް އެމަނިކުފާނުގެ ދަރިކަނބަލުން ދުންޔާ މައުމޫން އިންޑިއާ އަށް ވަޑައިގަންނަވާފައި ވަނިކޮށް، ދުންޔާ އިންޑިއާ އަށް މިހާރު މި ކުރައްވާ ދަތުރުފުޅަކީ ގުޅިފައިވާ ކޯލިޝަނުގެ ފަރާތުން ކުރައްވާ ދަތުރުފުޅެއްގެ ގޮތުގައި ސިފަކުރައްވައި ބޭރުގެ ބައެއް ފަރާތްތަކުން ބުނަމުންދާތީ، ނޫސްވެރިން ކުރި ސުވާލަކަށް ޖަވާބު ދެއްވަމުން ނެވެ.
އިންތިހާބީ ރައީސްގެ އޮފީހު ގައި ހޮނިހިރު ދުވަހު ބޭއްވި ނޫސްވެރިންގެ ބައްދަލުވުމުގައި މާރިއާ ވިދާޅުވީ ގުޅިފައިވާ ޕާޓީތަކުން ގުޅިގެންނާއި ވަކިވަކިން އަދި ސިޔާސީ ލީޑަރުންގެ ފަރާތްޕުޅުން ހާއްސަ މަންދޫބުން މީގެ ކުރިން ވެސް އެކިއެކި ގައުމުތަކަށް ވަޑައިގެންނަވާފައިވާ ކަމަށެވެ.
އެހެންކަމުން ދުންޔާގެ މިދަތުރުފުޅަކީ ރައީސް މައުމޫންގެ ހާއްސަ މަންދޫބެއްގެ ގޮތުގައި ވަޑައިގެންނެވި ވަޑައިގެންނެވުމެއް ކަމަށް މާރިއާ ވިދާޅުވި އެވެ.
ދުންޔާ މައުމޫނަކީ އަންނަ ނޮވެމްބަރު މަހު ނިމުމަކަށް އަންނަ ރައީސް އަބްދުﷲ ޔާމީން އަބްދުލްގައްޔޫމްގެ ސަރުކާރުގައި ދާދިފަހަކާ ޖެހެންދެން ހިދްމަތް ކުރެއްވި ކަނބަލެކެވެ. އަދި ރައީސް ޔާމީންގެ ސަރުކާރުގައި ފޮރިން މިނިސްޓަރުކަން ވެސް ކުރައްވާފައިވެ އެވެ.
އިންޑިއާ އަށް ވަޑައިގެންނެވުމުގެ ކުރިން ދުންޔާ ވަނީ ސްރީލަންކާ އަށް ވެސް ވަޑައިގަންނަވައި އެގައުމުގެ އިސް ބޭފުޅުންނާއި ބައްދަލު ކުރައްވާ ފައެވެ. އެހެންކަމުން އިންޑިއާގެ މި ދަތުރުފުޅުގައި އެ ޤައުމުގެ އިސް ބޭފުޅުންނާ ވެސް ބައްދަލު ކުރައްވާނެ ކަމަށް ބެލެވެއެވެ.
