ރޯޔަލް ވެޑިން: ޔޫޖިނީ އާއި ޖެކް ބްރޫކްސްބެންކް ކައިވެނި ބައްލަވައިގެންފި

އިނގިރޭސި ރާނީގެ މާމަ ދަރިކަނބަލެއް ކަމުގައިވާ ޕްރިންސަސް ޔޫޖުނީ 28، އާއި އޭނާގެ ލޯބިވެރިޔާ އަދި އަމިއްލަ ވިޔަފާރިވެރި އެއް ކަމުގައިވާ ޖެކް ބްރޫކްސްބޭންކް 32، ކައިވެނި ބައްލަވައިގެންފިއެވެ.

ހުކުރު ދުވަހުގެ ހަވީރު ކައިވެނީގެ ރަސްމިއްޔާތު ބާއްވާފައި ވަނީ ލަންޑަނުގެ ސެއިންޓް ޖޯޖް ޗަޕެލްގައެވެ.

މި ކައިވެނީގެ ރަސްމިއްޔާތުގައި މަޝްހޫރު ފަރާތްތަކާއި ޝާހީ އާއިލާގެ ބޭފުޅުން ވަނީ ބައިވެރިވެ ވަޑައިގެންފައެވެ. އިނގިރޭސި ޝާހީ އާއިލާގެ ވެރިކަން ވާރުތަވަމުން އަންނަ ތާވަލަށް ބަލާއިރު ޕްރިންސަސް ޔޫޖުނީ ވަނީ ލިސްޓުގެ 9 ވަނައިގައެވެ.

ޔޫޖިނީ އަކީ ރާނީގެ ތިން ވަނަ ދަރިކަލުން ޕްރިންސް އެންޑްރޫ އާއި ސާރާ ފާގަސަންގެ ހަގު ދަރިކަނބަލުންނެވެ.

ޕްރިންސަސް ޔޫޖުނީގެ އެންގޭޖްމަންޓް އިއުލާން ކުރެއްވުމަށްފަހު ބީބީސީއަށް ދެއްވި އިންޓަވިއު އެއް ގައި އެކަމަނާ ވިދާޅުވީ ޖެކް އާއި ދިމާވީ އުމުރުފުޅުން 20 ގައި ކަމަށެވެ. އަދި ޖެކް އެއީ "ފުރަތަމަ ނަޒަރުން ލޯބިވި" މީހެއް ކަމަށެވެ.