ނިއުމާގެ އަޑު ގެއްލުނީ ކީއްވެ؟

ފިލްމީ ތަރި ނިއުމާ މުހައްމަދުގެ ވަދާއީ ފިލްމް "ނިވައިރޯޅި" އާއި ގުޅޭ ގޮތުން އިންޓަވިއުއެއް ހޯދުމަށް ނިއުމާ އަށް ގުޅާލުމުން ނިއުމާ ވާހަކަ ދެއްކީ ވައި އަޑަކުންނެވެ.

ފޯނުން ވާހަކަ ނުދައްކައި، މެސެޖުން ވާހަކަދެއްކުމަށް ވައި އަޑަކުން ނިއުމާ އެދުމުން، ނިއުމާގެ އަޑަށް ވީ ގޮތަކާއި މެދު ސުވާލު އުފެދުނެވެ. ފިލްމްގެ މަސައްކަތާއި ބެހޭ ގޮތުން މައުލޫމާތު އޮޅުން ފިލުވުމަށްވުރެ ބޮޑަށް ޝައުގުވެރިކަން އުފެދިގެން ދިޔައީ ނިއުމާގެ އަޑަށް ވީގޮތެއް އޮޅުން ފިލުވުމަށެވެ.

އެހެން ކަމުން ނިއުމާގެ އަޑަށް ވީގޮތެއް އޮޅުން ފިލުވުމަށް މެސެޖް ކުރުމުން ނިއުމާ ބުނީ އަޑަށް ވީގޮތެއް ނޭނގޭ ކަމަށާއި ކުއްލިއަކަށް ހަމަ ހުރެފައި އަޑު ދިޔައީ ކަމަށެވެ. ރަނގަޅަށް އަޑު ނުނިކުންނަތާ މިހާރު ދެމަހާއި ބައި ވަރު ވެފައިވާ ކަމަށާއި، ބޭސްފަރުވާގެ ކަންތައްވެސް ކުރިއަށް ދާ ކަމަށް ނިއުމާ ވަނީ ބުނެފައެވެ.

"ނިވައިރޯޅި" އެޅުވުން ފަސްކޮށްފައިވަނީވެސް އަޑުގޮސްފައިވުމުން ޑަބިންގެ މަސައްކަތް ނުކުރެވިގެން ކަމަށް ނިއުމާ ބުނެޏެވެ.

ނިއުމާ ބަލިވުމުގެ ސަބަބުން ނިވައިރޯޅި ރިލިޒްކުރުން ލަސްކޮށްފައި ވީނަމަވެސް މި ފިލްމުގެ ޓްރެއިލް މިހާރު ވަނީ ރިލީޒްކޮށްފައެވެ. ޓްރެއިލަރ ރިލީޒް ކުރުމަށް ބޭއްވި ހަފްލާގައިވެސް ނިއުމާ މާ ގިނަ ވާހަކަތަކެއް ދައްކާފައި ނުވާއިރު މި ފިލްމަކީ ފިލްމީ ދާއިރާގއި 20 އަހަރަށްވުރެ ގިނަ ދުވަސް ހޭދަކޮށްފައިވާ ނިއުމާގެ ފަހު ފިލްމުކަމުން ފިލްމާއި ގުޅޭގޮތުން އެ ހަފްލާގައި ފޭނުންނާއި ވާހަކަ ނުދެއްކުމުން ނިއުމާ ވަނީ އެކަމާ ހިތާމަ ފާޅުކޮށްފައެވެ.

ނިއުމާ ޕްރޮޑިއުސްކުރާ މި ފިލްމުގެ ސްކްރިޕްޓް ތައްޔާރުކޮށް، ފިލްމު ޑައިރެކްޓްކޮށްފައިވަނީ މޫމިން ފުއާދެވެ. ބޮޑު ކާސްޓަކާއި އެކު ބޮޑު ޚަރަދެއްވެސް ކޮށްގެން އުފައްދާފައިވާ މި ފިލްމުގެ މަންޒަރުތައް ނަގާފައިވަނީ ރ. އިނގުރައިދޫގައެވެ.