އަދުލްވެރި ވެރިކަމެއް ގާއިމްކުރެވޭތާ 24 ގަޑިއިރު ތެރޭގައި މިހާރުގެ ރައީސުލްޖުމްހޫރިއްޔާ އަބްދުﷲ ޔާމީން އަބްދުލްގައްޔޫމް ހައްޔަރުކުރަންޖެހޭ ކަމަށް ރައްޔިތުން މަޖިލީހުގެ ކެނދިކުޅުދޫ ދާއިރާގެ ކުރީގެ މެންބަރު އަހުމަދު އީސަ ވިދާޅުވެއްޖެއެވެ.

ސެޕްޓެމްބަރު 23 ގައި ރައްޔިތުން ނިންމި ނިންމުން ބާތިލްކުރަން ރައީސް ޔާމީން ހުށަހަޅާފައިވާތީ، "ރައްޔިތުންގެ ހުކުމް" ނަމުގައި ރާއްޖެޓީވީން އަލަށް ފެށި ޕްރޮގްރާމުގައި ބުދަ ދުވަހުގެ ރޭ ވާހަކަ ދައްކަވަމުން އަހުމަދު އީސަ ވިދާޅުވީ މިފާއިތުވެގެން ދިޔަ ފަސް އަހަރު ތެރޭގައި ރައީސް ޔާމީން ގިނަ ޖަރީމާތައް ހިންގާފައިވާ ކަމަށް ތުހްމަތު ކުރެވޭ ކަމަށާއި ދުނިޔޭގެ އެއްވެސް ގައުމަކުން މިހައި ފާޅުކަން ބޮޑު ގޮތެއްގައި ބޮޑެތި ޖަރީމާތައް ހިންގައި އެކަމަށް އެއްބަސްވެފައިވާ ވެރިއަކު ފެނިގެން ނުދާނެ ކަމަށެވެ.

ނަމަވެސް ފެހި ގާނޫނު އަސާސީގެ ދަށުން ގާއިމް ކުރެވޭ އައު ވެރިކަމެއްގައި މިސަރުކާރުން ހިންގާފައިވާ މިޖަރީމާތައް ބަލައި، 24 ގަޑިއިރު ތެރޭގައި ރައީސް ޔާމީން ހައްޔަރުކުރަންޖެހޭކަން ފާހަގަކުރައްވައި އަހުމަދު އީސަ ވިދާޅުވީ ރައްޔިތުންގެ ވޯޓުން ގާއިމްކުރެވޭ އަދުލްވެރި ވެރިކަމުގައި ނުހައްގުން އަނިޔާ ލިބުނު ހުރިހާ ފަރާތްތަކަށް އިންސާފު ހޯދައިދޭނެ ކަމަށެވެ. 

އިންތިޚާބު ބާތިލުކުރަން ރައީސް ޔާމީން ކުރަމުން ގެންދާ މަސައްކަތްތަކަށް އިޝާރަތް ކުރައްވައި އަހްމަދު އީސާ ވިދާޅުވީ ގާނޫނު އަރާ ހަމަކުރާނެތީ ކޮންމެހެން ވެސް ވެރިކަން ދަމަހައްޓަން ޖެހޭ ކަމަށެވެ. އަދި ވިދާޅުވީ ރައްޔިތުން ކަނޑުފައްތާ، މާލޭގައި އެއްކޮޅުގައި ހުޅު ޖަހައިގެން ވެސް މިވެރިކަން ދިފާއު ކުރައްވަން މަސައްކަތް ކުރާނެ ކަމަށް ބެލެވޭ ކަމަށެވެ. 

"އެކަމަކު ގާނޫނު އަސާސީ މިނިވަން މުއައްސަސާތަކުގެ މައްޗަށް ޚާއްސަކޮށް ސަލާމަތީ ބާރުތަކާއި ޝަރުއީ ކޯޓުތަކުގެ މައްޗަށް ލާޒިމް ކުރަނީ ރައްޔިތުންގެ ވެރިކަން ދިފާއު ކުރަން. މިކަހަލަ ގޮތެއް ނެތް ހަޑިމުޑުދާރު ވެރިކަމެއް ކުރާ މީހަކު ހިމާޔަތް ކުރާކަށް ގާނޫނު އަސާސީގައި ލިޔެފައި ނޯންނާނެ. ސަލާމަތީ ބާރުތަކުގެ މައްޗަށް ލާޒިމްކޮށްފައި އޮތީ މިފަދަ ވެރިން ހިފާ ހައްޔަރުކުރަން ޝަރުއީ ކޯޓުތަކުގެ މައްޗަށް ލާޒިމްކޮށްފައި އޮތީ މިފަދަ ޖައްބާރު ވެރިންގެ މައްޗަށް އޮތީ ރައްޔިތުންނަށް ކުރި އަނިޔާއާއި ގައުމަށްވީ ހިޔާނާތުގެ ބަދަލުގައި ހުކުމްކޮށްފައި ޖަލަށްލާން." އަހުމަދު އީސަ ވިދާޅުވިއެވެ.

އަހުމަދު އީސަ ވިދާޅުވީ ރައީސް ޔާމީންގެ ފަސް އަހަރުގެ ވެރިކަމުގައި އިހުލާސްތެރި އެއްވެސް ވާހަކައެއް ދައްކަވާފައި ނެތް ކަމަށާއި، ދައްކަވާ ވާހަކަފުޅާ އެއްގޮތަށް އަމަލެއް ކުރައްވާފައެއް ނެތް ކަމަށެވެ.

އޭނަ ވިދާޅުވީ ރައީސް ޔާމީން ރައްޔިތުންނަށް ދޮގު ހައްދަވައި އޮޅުވާލުން ނޫން ކަމެއް ކުރައްވާފައި ނެތް ކަމަށާއި، ދައުލަތުގެ މުދަލާއި ފައިސާއާ ހިޔާނާތްތެރިވުން ނޫން ކަމެއް ކުރައްވާފައި ނެތް ތުހްމަތު ކުރެވޭ ކަމަށެވެ. 

"މަގާމުގެ ނުފޫޒުގެ ބޭނުން ކުރެއްވުން ނޫން ކަމެއް ކުރައްވާފައި ނުވޭ. ކުރެއްވި ކޮންމެ ކަމެއްގައި ރައްޔިތުންނަށް ބިރު ދައްކައި އަނިޔާކޮށް މަގާމުގެ ނުފޫޒު ބޭނުން ކުރުން ނޫން އެއްވެސް ކަމެއްކޮށްފައި ނެތް. ޔާމީން އަބްދުލްގައްޔޫމްއަކީ ސިކުނޑި ހަމަޖެހޭ ބޭފުޅެއްތޯ ވެސް ބަލަން އެބަ ޖެހޭ" އަހުމަދު އީސަ ވިދާޅުވިއެވެ.

އަހުމަދު އީސަ ވިދާޅުވީ ވައްކަން ކުރުމަށްފަހު އެ ވާހަކަ ދައްކަވަނީ އަމިއްލަފުޅަށް ކަމަށާއި، އަނިޔާވެރިވުމަށްފަހު ވެސް އެއްބަސްވެލައްވަނީ ވެސް އަމިއްލަފުޅަށް ކަމަށެވެ. އޭނާ ވިދާޅުވީ ރައްޔިތުންގެ ކުރިމަތީގައި އިއުތިރާފްވެވަޑައިގެންފައިވާއިރު، ގައުމަށް ހިޔާނަތްތެރިވި ކޮންމެ މީހަކާއި ވެސް ގާނޫނު އަރާ ހަމަކޮށް ހައްގު އަދަބު ދޭނެ ދުވަސް އަންނާނެ ކަމަށެވެ.