ގެއްލިފައިވާ ސައުދީއަރަބިއްޔާގެ ނޫސްވެރިޔާ ޖަމާލް ޚާޝޮގީ ފެނޭތޯ ތުރުކީގެ ވެރިރަށުގައި ހުންނަ ސައުދީ ކޮންސިއުލޭޓް ފާސްކުރަން ތުރުކީން ނިންމައިފިއެވެ.
ތުރުކީގެ ފޮރިން މިނިސްޓްރީން އިން ބުނީ ކޮންސިއުލޭޓް ފާސްކުރަން ސައުދީން އެއްބަސްވެފައިވާ ކަމަށާއި ލަހެއް ނެތި އެތަން ފާސް ކުރާނޭ ކަމަށެވެ.
ޚާޝޮގީ އެންމެ ފަހުން ފެނިފައި ވަނީ މިދިޔަ އަންގާރަ ދުވަހު ސައުދީ ކޮންސިއުލޭޓަށް ވަންނަނިކޮށެވެ. އަދި އޭގެ ފަހުން އޭނާ އެތަނުން ނުކުތް ތަނެއް އެކަކަށް ވެސް ފެނިފައެއް ނުވެއެވެ. ތުރުކީން ބުނީ ކޮންސިއުލޭޓް ތެރޭ ޚާޝޮގީ މަރާލީ ކަމަށެވެ. އަދި އޭނާ ކޮންސިއުލޭޓުން ނުކުމެގެން ދިޔަނަމަ އެކަމުގެ ހެކި ދެއްކުމަށް ތުރުކީން ވަނީ އެދިފައެވެ.
ސައުދީން އެ ތުހުމަތު ދޮގު ކުރެ އެވެ.
ގެއްލުމުގެ ކުރިން ޖަމާލު މަސައްކަތް ކުރަމުން ދިޔައީ ވޮޝިންޓަން ޕޯސްޓަށެވެ. އެހެން ނަމަވެސް ކުރިން އޭނާ ވަނީ ސައުދީ ސަރުކާރުގެ އިސް މަގާމުތަކުގަޔާއި ޑިޕްލެމެޓެއްގެ ގޮތުގައި މަސައްކަތް ކޮށްފައެވެ. އޭނާ އަންނަނީ ފަހަކަށް އައިސް ސައުދީ ވަލީއަހުދު މުހައްމަދު ބިން ސަލްމާންގެ ސިޔާސަތުތަކަށް ވަރަށް ބޮޑަށް ފާޑުކިޔަމުންނެވެ.
ސައުދީ އަރަބިއްޔާގެ ކޮންސިއުލޭޓަށް ޚާޝޮގީ ދިޔައީ އޭނާ ކުރިން ކައިވެނިކުރި ސައުދީ އަންހެން މީހާގެ ވަރީގެ ސެޓްފިކެޓް ހޯދާށެވެ. އެއީ ތުރުކީ އަންހެނަކާ އޭނާ ކައިވެނި ކުރަން ނިންމާފައިވާތީއެވެ. ތުރުކީގެ ގަވާއިދު އޮންނަ ގޮތުން ޚާޝޮއީއަށް އެ ތުރުކީގެ އަންހެން މީހާއާއި ކައިވެނި ކުރެވެން އަންނަނީ އެ ވަރީގެ ސެޓްފިކެޓް ލިބުމުންނެވެ.
