ސަރުކާރު ބަދަލުވުމުގެ މަރުހަލާގެ ގާނޫނުގެ ދަށުން އުފައްދާފައިވާ ޑައިރެކްޓަރ ޖެނަރަލް އޮފް ޓްރާންސިޝަން އަށް އެއްބާރުލުން ނުދިނުމަކީ ގާނޫނީ ކުށެއް ކަމަށާއި ދައުލަތުގެ އިދާރާތަކުގެ މުވައްޒަފުން އެކަމަށް ސަމާލުވެ ތިއްބެވުމަށް އިންތިހާބީ ރައީސް އިބްރާހީމް މުހައްމަދު ސޯލިހު (ސޯލިހު)ގެ ތަރުޖަމާނު މާރިއާ އަހުމަދުދީދީ ވިދާޅުވެއްޖެއެވެ.

އިންތިހާބީ ރައީސް އިބްރާހީމް މުހައްމަދު ސޯލިހުގެ އޮފީހުގައި ބޭއްވި ނޫސްވެރިންގެ ބައްދަލުވުުގައި މާރިއާ ވިދާޅުވީ ސަރުކާރުގެ ބައެއް އިދާރާތަކުން އެއްބާރުލުން ދިނުމަށް ދެކޮޅު ހަދަމުންދާ ކަމަށާއި، ވެރިކަން ބަދަލުވުމުގެ މަރުހަލާގެ ގާނޫނުގެ ދަށުން އުފައްދާފައިވާ ޑައިރެކްޓަރ ޖެނަރަލް އޮފް ޓްރާންސިޝަންގެ އޮފީހަށް އެއްބާރުލުން ނުދޭ ފަރާތްތަކަށް އެއީ ގާނޫނީ ކުށެއް ކަމަށް ހަނދާން ކޮށްދޭ ކަމަށެވެ.

ވެރިކަން ބަދަލުވުމުގެ ގާނޫނުގެ ދަށުން ޑަރެކްޓަރ ޖެނަރަލް އޮފް ޓްރާންސިޝަންގެ މަގާމަށް ހ. ސީވިޑް އަހުމަދު ލަތީފް (ސީވިޑް ލަތީފް) ވަނީ އައްޔަން ކުރައްވާފައެވެ. އަދި އެ ގާނޫނުގެ ދަށުން ޑައިރެކްޓަރ ޖެނަރަލް އޮފް ޓްރާންސިޝަންގެ އޮފީހެއް ސްޓެލްކޯގައި ގާއިމުކޮށް، މުވައްޒަފުންނާ އެކު ސަރުކާރު ބަދަލުކުރުުގެ ކަންކަން ގެންދަނީ ކުރަމުންނެވެ.

ސަރުކާރު ބަދަލުކުރުމުގެ މަރުހަލާގެ ކަންކަން ކުރިއަށް ގެންދަވަނީ ފުރަތަމަ މިނިސްޓްރީ އެއް ނަމަ މިނިސްޓަރުގެ އަރިހަށް އިހުތިރާމްގެ ޒިޔާރަތެއް ކުރައްވަނީއެވެ. އޭގެ ފަހުން ކަމާ ގުޅޭ ދާއިރާތަކުގެ އިލްމީ އަދި ފަންނީ ބޭފުޅުން އެ އޮފީހެއްގެ މުވައްޒަފުންނާ އެކު ސަރުކާރު ބަދަލު ކުރުމުގެ މަރުހަލާގެ ކަންކަމާ މެދު މަޝްވަރާކޮށް، އެމަސައްކަތް ކުރަމުން ގެންދަވަނީއެވެ. 

ވެރިކަން ބަދަލުވުމުގެ މަރުހަލާގެ ގާނޫނަކީ ރިޔާސީ އިންތިހާބުގެ ރަސްމީ ނަތީޖާއަށް ފަހު، އިންތިހާބުވި ފަރާތުން ވެރިކަން ބަދަލު ކުރުމުގެ ކަންކަން ކުރެއްވުމަށް އައްޔަން ކުރައްވާ ބޭފުޅެކެވެ. ނަމަވެސް އިންތިހާބުވި ފަރާތުން ޑައިރެކްޓަރ ޖެނަރަލް އޮފް ޓްރާންސިޝަންގެ މަގާމަށް ބޭފުޅެއްގެ ނަންފުޅު ސިވިލް ސާރވިސް ކޮމިޝަނަށް ފޮނުވުުން އެބޭފުޅާ އެމަގާމަށް އައްޔަން ކުރައްވާނީ ސިވިލް ސާރވިސް ކޮމިޝަނުންނެވެ. އަދި ޑީޖީޓީ މަސައްކަތް ކުރައްވާނެ ވަކި އޮފީހަކާއި މުވައްޒަފުންގެ ކަންކަން ވެރިކަން ބަދަލުވުމުގެ ގާނޫނުގެ ދަށުން ހަމަޖައްސަން ޖެހޭއިރު، އެއް މިލިއަން ރުފިއާއަށްވުރެ ބޮޑުނުވާނެ ބަޖެޓެއް ވެސް އެ އޮފީހަށް ހަމަޖައްސަން ޖެހެއެވެ.

ޑީޖީޓީގެ އޮފީސް ދެމިގެންދާނީ އިންތިހާބީ ރައީސް މަގާމުގެ ހުވާކުރައްވާ ދުވަހާ ހަމައަށެވެ. 

އެގާނޫނުގެ ބޭނުމަކީ އިންތުހާބީ ރައީސް ވެރިކަމާ ހަވާލުވާ ފުރަތަމަ ދުވަހު ވެސް ސަރުކާރުން ފޯރުކޮށްދޭންޖެހޭ ހިދްމަތްތައް ހުއްޓުމެއްނެތި ކުރެވޭގޮތަށް ކަންކަން ބައްޓަން ކުރުމާއި ވެރިކަން ބަދަލު ކުރުމުގެ މަރުހަލާ އޮމާންކަމާއި އަމާންކަމާ އެކު ކުރިއަށް ގެންދިއުމެވެ. 

މިހާރު އަމަލު ކުރަމުންދާ ގާނޫނު އަސާސީގެ ދަށުން ޑީޖީޓީގެ މަގާމަށް ބޭފުޅަކު އައްޔަން ކުރައްވާ އޮފީހެއް ގާއިމުކޮށް މަސައްކަތް ކުރަން ޖެހުނު މިއީ ފުރަތަމަ ފަހަރެވެ. 2013 ވަނަ އަހަރު ބޭއްވި ރިޔާސީ އިންތިހާބުގެ ފުރަތަމަ ބުރު ސުޕްރީމް ކޯޓުން ބާތިލު ކުރުމުންނާއި ހިނގާދިޔަ ހަމަނުޖެހުންތަކާއި ގުޅިގެން ރައީސަކު އިންތިހާބު ކުރެވި މަގާމާ ހަވާލުވެ ވަޑައިގަންނަވާފައި ވަނީ ވެސް ޖުމްހޫރީ ދުވަހުގެ ގޮތުގައި ފާހަގަ ކުރަމުން އަންނަ ނޮވެމްބަރު މަހުގެ 11 ގެ ފަހުންނެވެ. 

މިހާރު ރައީސް ކަމުގެ މަގާމުގައި ހުންނެވި އަބްދުﷲ ޔާމީން އިންތިހާބުވެ ވަޑައިގެންނެވީ ނޮވެމްބަރު މަހުގެ 16 ވަނަ ދުވަހުއެވެ. ވެރިކަމުގެ ހުވާ ކުރައްވާފައި ވަނީ ނޮވެމްބަރު މަހުގެ 17 ވަނަ ދުވަހުއެވެ. އެހެންކަމުން ވެރިކަން ބަދަލު ކުރުމުގެ މަރުހަލާގެ ކަންކަން 24 ގަޑިއިރުގެ ތެރޭގައި ވަނީ ނިމިފައެވެ. 

މިދިއަ ސެޕްޓެމްބަރު މަހުގެ 23 ވަނަ ދުވަހު ބޭއްވި ރިޔާސީ އިންތިހާބު އިބްރާހީމް މުހައްމަދު ސޯލިހު މަގާމުގެ ހުވާކުރެއްވުން އޮތީ ނޮވެމްބަރު 11 ނުވަތަ ނޮވެމްބަރު 17 ވަނަ ދުވަހުއެވެ. އެހެންކަމުން ވެރިކަން ބަދަލުކުރުމުގެ މަރުހަލާގެ ކަންކަން ކުރިއަށް ގެންދަން ގިނަ ދުވަސްތަކެއް ލިބިގެންދާއިރު، ގިނަ ހުރަސްތަކެއް ވެސް ސަރުކާރުގެ ބައެއް އިދާރާތަކުން ކުރިމަތި ކުރުވަމުންދާކަން ފާހަގަ ކުރެވެއެވެ. އެގޮތުން ހައުސިންގ މިނިސްޓްރީން ކުރިމަތިކުރަމުންދާ ހުރަސްތައް ފާހަގަކުރެވެއެވެ.