ނޫސްވެރިޔާ ސައުދީގެ ކޮންސިއުލޭޓް ދޫކޮށް ދިޔަކަން ކަށަވަރުކޮށްދީ: އޮރްދޮޣާން
9 އޮކްޓޯބަރު 2018 | އަންގާރަ 12:37ޖަމާލް ޚަޝޯގީ އެންމެ ފަހުން ފެނިފައިވަނީ މިދިޔަ ހަފްތާގެ އަންގާރަ ދުވަހު
ތުހުމަތު ކުރެވުނީއްސުރެ ބައެއް އޮފިޝަލުން އިމާރާތުން ނުނިކުންނަވާ
ގެއްލިގެން އުޅޭ ނޫސްވެރިޔާ އިސްތަންބޫލުގައި ހުންނަ ސައުދީގެ ކޮންސިއުލޭޓް ދޫކޮށް ދިޔަކަން ކަށަވަރުކޮށްދީ، ހެކި ދެއްކުމަށް ތުރުކީގެ ރައީސް ރަޖަބް ތައްޔިބް އޮރުދޮޣާން ގޮވާލައްވައިފިއެވެ.
ސައުދީގެ ރައްޔިތެއް ކަމަށްވާ ޖަމާލް ޚަޝޯގީ އެންމެ ފަހުން ފެނިފައި ވަނީ އެ އިމާރާތަށް ވަންނަނިކޮށް މިދިޔަ ހަފްތާގައެވެ.
އެމެރިކާގެ ރައީސް ޑޮނަލްޑް ޓްރަމްޕް ވެސް ވަނީ ޚަޝޯގީގެ މައްސަލައިގައި ކަންބޮޑުވުން ފާޅުކުރައްވާފައެވެ.
އެތަނުގެ ތެރޭގައި ޚަޝޯގީ މަރާލާފައިވާ ކަމަށް ބުނެވުމާ އެކީ ތުރުކީ އިން ވަނީ ކޮންސިއުލޭޓް ބަލައި ފާސްކުރަން އަންގާފައި ކަމަށް މީޑިއާ ރިޕޯޓްތައް ބުނެއެވެ.
ސައުދީ އަރަބިއާ އިން އެ ތުހުމަތު ދޮގުކުރެއެވެ.
އޭނާ އިމާރާތުން ނުކުމެއްޖެކަމަށް ބުނެ ކޮންސިއުލޭޓްގެ އޮފިޝަލުންނަކަށް ސަލާމަތެއް ނުވެވޭނެ" ހޯމަ ދުވަހު ބޭއްވި ނޫސްވެރިންގެ ބައްދަލުވުމުގައި އޮރޮދޮޣާން ވިދާޅުވިއެވެ.
"އޭނާ ނުކުމެއްޖެ ނަމަ ފުޓޭޖާ އެކު ހެކި ހުށަޅަންވާނެ"
ތުރުކީގެ އޮފިޝަލުން އާދީއްތަ ދުވަހު ބުނެފައި ވަނީ މިދިޔަ ހަފްތާގައި އެ ގައުމަށް އައި ސައުދީގެ 15 މީހުންގެ ޓީމަކުން އޭނާ މަރާލާފައިވާ ކަމުގެ ސާބިތު ހެކި އެބަހުރި ކަމަށެވެ. ނަމަވެސް އެއްވެސް ހެއްކެއް ހުށަހަޅާފައެއް ނުވެއެވެ. ވަލީއަހުދު މުހައްމަދު ބިން ސަލްމާން މީގެ ކުރިން ވަނީ އޮފިޝަލުންނަށް އެތަން ބެލުމަށް މަރުހަބާ ދަންނަވާ ކަމަށާއި ފޮރުވާނެ އެއްވެސް އެއްޗެއް ނެތް ކަމަށް ވިދާޅުވެފައެވެ.
ޚަޝޯގީ ދިރިއުޅެމުންދަނީ އެމެރިކާގައި ކަމަށްވާއިރު އޭނާ ގެންދަނީ ވޮޝިންގޓަން ޕޯސްޓްގައި ޚިޔާލު ކޮލަމްގައި ލިޔަމުންނެވެ. އެ ނޫހުން ބުނެފައި ވަނީ ސައުދީގެ ކިބައިން ޖަވާބެއް ހޯދުމަށް އެމެރިކާއިން ބާރުއަޅަން ޖެހޭނެ ކަމަށެވެ.
އޭގެ ފަހުން ވައިޓްހައުސްގައި ރިޕޯޓަރުންނާ ވާހަކަ ދައްކަވަމުން ރައީސް ޓްރަމްޕް ވިދާޅުވީ އެ ވާހަކަ އަޑުއިވިވަޑައިގަތުމުން ކަންބޮޑުވެ ވަޑައިގަންނަވާ ކަމަށެވެ. އަދި އެއީ އަޑުއައްސަވާ ހިތްޕުޅުވާ ކަހަލަ ވާހަކައެއް ނޫން ކަމަށެވެ.
ގެއްލުމުގެ ކުރިން ޖަމާލު މަސައްކަތް ކުރަމުން ދިޔައީ ވޮޝިންޓަން ޕޯސްޓަށެވެ. އެހެން ނަމަވެސް ކުރިން އޭނާ ވަނީ ސައުދީ ސަރުކާރުގެ އިސް މަގާމުތަކުގަޔާއި ޑިޕްލެމެޓެއްގެ ގޮތުގައި މަސައްކަތް ކޮށްފައެވެ. އޭނާ އަންނަނީ ފަހަކަށް އައިސް ސައުދީ ވަލީއަހުދު މުހައްމަދު ބިން ސަލްމާންގެ ސިޔާސަތުތަކަށް ވަރަށް ބޮޑަށް ފާޑުކިޔަމުންނެވެ.
ޖަމާލު ގެއްލުމުން ތުރުކީގައި ހުންނަވާ ސައޫދީ ސަފީރު ވަލީދު އަލްޚުރައިޖީ ޚާރިޖީ ވުޒާރާއަށް ހާޒިރުކޮށް ސުވާލު ވެސް ވަނީ ކޮށްފައެވެ.
