ކ. މާލެ
|
27 މެއި 2017 | ހޮނިހިރު 16:33
ފޭސްބުކްގެ ބާނީ މާކް ޒަކަބާގް އަށް ހާވަޑް ޔުނިވާސިޓީން އޮނަރަރީ ޑިގްރީ ލަގަބު އަރުވަނީ
ފޭސްބުކްގެ ބާނީ މާކް ޒަކަބާގް އަށް ހާވަޑް ޔުނިވާސިޓީން އޮނަރަރީ ޑިގްރީ ލަގަބު އަރުވަނީ
ގޫގުލް
ފޭސްބުކް
ފޭސްބުކްއަށްޓަކައި ކިޔެވުން ދޫކޮށްލި ޒަކަބާގަށް ހަވާޑްގެ އޮނަރަރީ ޑިގްރީ
 
ހާވަޑް ޔުނިވާސިޓީގައި އޭނާ އަށް ކުރިމަތިވި އެންމެ ރަނގަޅު ކަމަކީ ޕެރިސިލާއާ ދިމާވުން
 
ކާމިޔާބު ލިބެނީ ނާކާމިޔާބީން ހިތްވަރު ހޯދައި މަސައްކަތްކުރާ މީހުންނަށް
 
ޒަކަބާކް ވަނީ ދަރިވަރުންނަށް މުހިންމު ނަސޭހަތްތަކެއް ދީފައި

ޅައުމުރުގައި ވެސް މާކް ޒަކަބާގްގެ ހުވަފެނަކީ އެކަކު އަނެކަކަށް ވީހާ ވެސް ފަސޭހައިން މުއާމަލާތް ކޮށްލުމެވެ. އެކަކު އަނެކަކަށް ގުޅުވައިދިނުމެވެ. ސްކޫލް ދައުރުގައި ރައްޓެހިންތަކަކާ އެކު އޭނާ އެ މަސައްކަތް ފަށައި އެކަން ހަގީގަތަކަށް ހެދުމަށްޓަކައި ޔުނިވާސިޓީ ދޫކޮށްލަންޖެހުނެވެ. ހާވަޑް ޔުނިވަސިޓީ ދޫކޮށްލުމަށް ފަހު އޭނާ ނުކުމެގެން އައީ ކޮންމެހެން ކިޔެވުން މަތިން ފޫހިވެގެނެއް ނޫނެވެ. އެއަށް ވުރެ ބޮޑު ހުވަފެނަކަށްޓަކައެވެ. ޒުވާން އުމުރުގައި  ބިލިއަނަރަކަށްވި ނަމަވެސް އޭނާއަކީ ތައުލީމީ ސެޓްފިކެޓްތަކެއް އޮތް މީހެއް ނޫނެވެ.

 

ހާވަޑް ޔުނިވާސިޓީން ދާދި ފަހުން ވަނީ އެތަނުގެ އޮނަރަރީ ޑޮކްޓަރޭޓްގެ ލަގަބު ޒަކަބާގަށް އަރުވާފައެވެ. މި ޝަރަފް އޭނާ އަށް އެރުވުމަށް ބޭއްވި ހަފްލާގައި ޒަކަބާގް ވަނީ އިބުރަތުން ފުރިގެންވާ ތަގުރީރެއް ދީފައެވެ.

ހާވަޑް ޔުނިވާސިޓީގައި ވާހަކަ ދައްކަމުން ޒަކަބާގް ބުނީ ދިރިއުޅުމުގައި އެންމެ މުހިންމު ކަމަކީ މަގުސަދެއް އޮތުމާ އެކު އަނެކާ އަށް އެ މަގުސަދެއްގެ އިހްސާސް ހޯދައިދިނުން ކަމަށެވެ. ކާމިޔާބު މީހަކަށް ވުމަށްޓަކައި ވީހާ ވެސް އަވަހަށް ހުވަފެން ހަގީގަތަކަށް ހެދުމަށް މަސައްކަތް ފެށުމަށް ދަރިވަރުންނަށް އޭނާ އިލްތިމާސްކުރިއެވެ.

ޒަކަބާގް ބުނީ މި ޖީލަށް ކުރިމަތިވެފައިވާ އެންމެ ބޮޑު ގޮންޖެހުމަކީ ހަމައެކަނި އާ ވަޒީފާތަކެއް އުފެއްދުން ނޫން ކަމަށާއި ނަމަވެސް ދިރިއުޅުމުގެ މަގުސަދު އަލުން ދެނެގަތުން ކަމަށެވެ.

ޒަކަބާގް ބުނީ ފޭސްބުކް އުފެދިގެން އައި އިރު އެ ކުންފުނި ގަތުމަށް ދުނިޔޭގެ ބޮޑެތި އެތައް ކުންފުންޏަކުން ބޮޑު އަގުތައް ކިޔާފައިވާއިރު އޭނާއާ އެކު މަސައްކަތްކުރި ހުރިހާ އެންމެން ވެސް ކުންފުނި ވިއްކާލުމަށް ތާއީދުކުރި ކަމަށެވެ. ނަމަވެސް އޭރު ވެސް އޭނާގެ ދުރުވިސްނުމެއް އޮތް ކަމަށާއި އެކަން ހަގީގަތަކަށް ހެދުމަށްޓަކައި ފޭސްބުކް ވިއްކާލަން ބޭނުން ނުވީ ކަމަށް ޒަކަބާގް ބުންޏެވެ.

 

ޒަކަބާގް ބުނީ "ހިނދުކޮޅު" އަންނާނެ ކަމަށް ބުނާ ވާހަކައަކީ ބޮޑު ދޮގެއް ކަމަށާއި އެފަދަ ވަގުތެއް އަންނަންދެން މަޑުކުރުމުން މުހިންމު ހިޔާލުތައް ހަގީގަތަކަށް ނުވެ ދާކަމަށެވެ.

ފޭސްބުކް ވުޖޫދަށް އައި ދުވަހު ހާވަޑް ކޮމިއުނިޓީ ގުޅާލެވުމުން އުފާވާ ކަމަށް ބުނި ކަމަށެވެ. އަދި ކޮންމެވެސް ދުވަހަކު ކޮންމެވެސް މީހަކު އެ ގޮތަށް މުޅި ދުނިޔެ ގުޅާލާނެ ކަމަށް އެ ދުވަހު ރައްޓެހިން ކައިރީގައި ބުނެވުނު ކަމަށް ވެސް އޭނާ ބުންޏެވެ. އޭރު އެކަން ކުރާނީ އެމީހުންކަން ހިތަށް ވެސް ނާރާ ކަމަށާއި އޭރު އެއީ ކުޑަކުދިން ކަމަށް ޒަކަބާގް ބުންޏެވެ.  

ޒަކަބާގް ބުނީ ހިޔާލަކީ މުޅިން ފުރިހަމަ އަށް ސިކުނޑިއަށް ވެރިވާނެ އެއްޗެއް ނޫން ކަމަށާއި ހިޔާލެއް ފުރިހަމަކުރުމަށް މަސައްކަތްތަކެއް ކުރަންޖެހޭނެ ކަމަށެވެ. މަސައްކަތް ފެށުމުގެ ކުރިން ހަމައެކަނި މީހުން ގުޅުވާލަދިނުމަކީ ކޮބައިގެން ދެނެގަތުމަށް މަސައްކަތްކުރި ނަމަ މީހަރު ހުރި ހިސާބަށް އޭނާ އާށް ނާދެވުނީސް ކަމަށް ވެސް ޒަކަބާގް ފާހަގަކޮށްފައި ވެއެވެ.

"ހިނދުކޮޅު" ނުވަތަ ޔޫކެރޭ މޫމެންޓްއަކީ ހަގީގަތެއް ނޫން ކަން ފާހަގަކުރަމުން ޒަކަބާގް ބުނީ ފިލްމްތަކުން ދައްކައިދެނީ ހަގީގަތް ނޫން ކަމަށެވެ. އުފެއްދުންތެރިކަން އުފަންވެގެން އަންނަނީ ބިއްލޫރިގަނޑެއްގައި ލިޔާ ހިސާބުގެ ފޯމިއުލާއަކުން ނޫން ކަމަށާއި އެއީ ވެސް ފިލްމްތަކުން ދައްކުވައިދޭ ބޮޑު ދޮގެއް ކަމަށް އޭނާ ބުންޏެވެ.

ވަރުގަދަ ހިޔާލެއް ހަގީގަތަކަށް ހެދުމަށް މަސައްކަތްކުރާ ކޮންމެ މީހަކީ މޮޔައެއް ކަމަށް ގިނަ މީހުންނަށް ހީވާނެ ކަމަށާއި އެހެން ކަމުން އޮޅިދާނެކަން ހަނދާންކޮށް އެކަމަށް ވެސް ތައްޔާރުވެ ހުންނަންޖެހޭ ކަމަށް ޒަކަބާގްގެ އިބުރަތުން ފުރިގެންވާ ސްޕީޗްގައި ބުނެފައި ވެއެވެ.

މުޖުތަމައުގައި ބޮޑެތި ކަންކަން ކުރުމަށް ފަސްޖެހޭ މައިގަނޑު ސަބަބަކީ ގޯހެއް ހެދިދާނެ ކަމުގެ ބިރު ކަމަށާއި ނަމަވެސް ހަގީގަތަކީ ކުރާ ކޮންމެ ކަމެއްގައި ވެސް މުސްތަގުބަލުގައި މައްސަލަތަކެއް ފާހަގަކުރެވެނެ ކަމަށެވެ. ނަމަވެސް އޭގެ ސަބަބުން ފަށައިގަތުން ހުއްޓާލައިގެން ނުވާނެ ކަމަށް އޭނާ ބުންޏެވެ.

ޒަކަބާގް ވަނީ މިއަދު މަޑުން ތިބެނީ ކީއްވެގެންތޯ ސުވާލު އުފައްދައި ކަންކަމައިގެން އުޅުމަށް ނަސޭހަތްތެރިވެފައެވެ. ބަލި މީހުންނަށް ސިފާ ހޯދައިދިނުމަށް މިއަދު 50 ގުނަ އަށް މަސައްކަތްކުރާ ކަމަށާއި ނަމަވެސް އޭގެ ބަދަލުގައި މީހުން ބަލިވާ ސަބަބު ދެނެގަނެ ހަމައެވަރަށް މަސައްކަތްކުރެވޭ ނަމަ ބަލިވާ މީހުންގެ އަދަދު މަދުކުރެވޭނެ ކަމަށް އޭނާ ބުންޏެވެ.

މިއީ ގުޅިލާމެހިފައިވާ ދުނިޔެއް ކަމަށާއި އޮންލައިން މެދުވެރިކޮށް ކޮންމެ މީހަކަށް ވެސް އުނގެނުމުގެ ފުރުސަތު އެބަ އޮތް ކަމަށް ޒަކަބާގް ބުންޏެވެ.

 

 

ނާކާމިޔާބީއާ ތަކުރާރުކޮށް ވެސް ކުރިމަތިލާންޖެހިދާނެ ކަމަށާއި ނަމަވެސް މަސައްކަތް ހުއްޓާލައި އުންމީދު ކަނޑާލައިގެން ނުވާނެ ކަމަށާއި ކާމިޔާބު ލިބެނީ ނާކާމިޔާބީން ހިތްވަރު ހޯދައި މަސައްކަތްކުރާ މީހުންނަށްކަން ފާހަގަކޮށް ޒަކަބާގް ވަނީ އެފަދަ ފަރާތްތަކުގެ ނަންތައް އޭނާގެ ސްޕީޗްގައި ފާހަގަކޮށްފައެވެ. އެ ގޮތުން މަޝްހޫރު "ހެރީ ޕޮޓާ" ވާހަކައިގެ ލިޔުންތެރިޔާ ޖޭކޭ ރޯލިންގް އަށް 12 ފަހަރު ޕަބްލިޝަރުން ނޫނެކޭ ބުނި ކަމަށެވެ. "ހެލޯ" ލަވަ ވުޖޫދަށް ގެނައުމަށް މަޝްހޫރު ލަވަކިޔުންތެރިޔާ ބިއޮންސޭ އަށް ވެސް އެތައް ސަތޭކަ ލަވަ އުފައްދަންޖެހުނު ކަމަށާއި ކާމިޔާބީ ހާސިލްވުމުގެ މައިގަނޑު ސަބަބަކީ ނާކާމިޔާބީއާ ކުރިމަތިލުމުގެ މިނިވަންކަން އޮތުން ކަމަށް ޒަކަބާގް ބުންޏެވެ.

މި ނޫން ވެސް އެތައް އިބުރަތްތެރި ވާހަކަތަކެއް ޒުކަބާގް ވަނީ ދަރިވަރުންނާ ހިއްސާކޮށްފައެވެ.

އޭނާ ބުނީ ހަވާޑް ޔުނިވާސިޓީގައި އޭނާ އަށް ކުރިމަތިވި އެންމެ ރަނގަޅު ކަމަކީ އަންހެނުން ޕެރިސިލާއާ ދިމާވުން ކަމަށެވެ. އޭނާ ވަނީ ޕެރިސިލާއާ ފުރަތަމަ ދިމާވި ގޮތް ވެސް ދަރިވަރުންނާ ހިއްސާކޮށްފައެވެ.

ޒުކަބާގް ބުނީ އޭނާ ހެދި "ފޭސްމާޝް" ވެބްސައިޓް ތައާރަފްކުރުމާ އެކު އޭނާ ހާޒިރުކުރަން ސްކޫލް ބޯޑުން ނިންމި ކަމަށެވެ. އެ ނިންމުމާ އެކު އޭނާ ސްކޫލުން ކަނޑާލަނީ ކަމަށް އޭނާގެ އާއިލާ އާއި ރައްޓެހިން ވެސް ހީކުރި ކަމަށާއި ތަކެތި ޕެކްކުރުމުގައި މަންމަ އާއި ބައްޕަ ވެސް އައިސް އެހީތެރިވެދިން ކަމަށެވެ. އަދި ރައްޓެހި ފެއާވެލް ޕާޓީއެއް ބޭއްވި ކަމަށާއި ޕެރިސިލާއާ ދިމާވީ ފެއާވެލް ޕާޓީގެ ތެރެއިން ފާހަނާ ތެރެއިން ކަމަށެވެ.

"އަހަރެން ބުނީ ތިން ދުވަހުގެ ތެރޭގައި އަހަރެން ބޭރުކޮށްލާނެއޭ. އެހެން ކަމުން ވީ އެންމެ އަވަހަކަށް ދެ މީހުން ޑޭޓަކަށް ދާން އެބަޖެހެޔޭ،" ޒަކަބާގް ކިޔައިދިނެވެ.

ޒަކަބާގްގެ ހަޔާތުގެ މައްޗަށް ބިނާކޮށް އުފެއްދި ހޮލީވުޑް ފިލްމަގައި ވެސް މި މަންޒަރުތައް ދައްކުވައިދީފައި ވެއެވެ. އެހެން ނަމަވެސް އޭނާ ބުނީ ފިލްމްގައި ދައްކުވައިދިނީ ފޭސްބުކް ވުޖޫދަށް ގެނައުމަށްޓަކައި "ފޭސްމާޝް" މާ މުހިންމުވެގެން އުޅުނު މަންޒަރުކަމަށާއި ނަމަވެސް ހަގީގަތަކީ ފޭސްމާޝް ވުޖޫދަށް ނައި ނަމަ އޭނާގެ ހަޔާތުގެ އެންމެ މުހިންމު މީހާއާ ދިމާނުވީސް ކަމަށެވެ. އަދި ހާވަޑް ޔުނިވާސިޓީގައި ހަޔާތަށްޓަކައި އޭނާ އަށް ކުރެވުނު އެންމެ ބޮޑު ކަމަކީ ޕެރިސިލާއާ ގުޅުން ބަދަހިކުރުން ކަމަށް ވެސް އޭނާ ސިފަކުރިއެވެ.

އެންމެ ފަހުން އަޕްޑޭޓް ކުރީ: 3 ހަފްތާ ކުރިން
ރިވިއު ކުރީ: ހުސެން ފިޔާޒް
0%
0%
0%
0%
0%
0%
ކޮމެންޓް