ދިލިޕް ކުމާރު އެޑްމިޓް ކޮށްފި

ކުރީގެ މަޝްހޫރު އެކްޓަރ ދިލިޕް ކުމާރު ހޮސްޕިޓަލްގައި އެޑްމިޓް ކޮށްފިއެވެ.

އުމުރުން 95 އަހަރުގެ އެކްޓަރ އެޑްމިޓްކޮށްފައި ވަނީ ނިއުމޯނިއާ އަށް ފަރުވާ ހޯދުމަށްޓަކައެވެ.

ކުމާރުގެ އާއިލާގެ ރަހުމަތްތެރިއެއް ކަމަށްވާ ފައިސަލް ފާރޫގީގެ ހޮސްޕިޓަލުން ކޮށްފައިވާ ޓްވީޓެއްގައި ވަނީ ނިއުމޯނިއާ އަށް ފަރުވާ ހޯދުމަށް އާދިއްތަ ދުވަހުގެ ރޭ ކުމާރު ހޮސްޕިޓަލްގައި އެޑްމިޓްކޮށްފައިވާ ކަމަށެވެ.

މިއަހަރުގެ ސެޕްޓެމްބަރު މަހުގެ ތެރޭގައި ވެސް ކުމާރު ވަނީ ހޮސްޕިޓަލްގައި އެޑްމިޓްކޮށް ފަރުވާދީފައެވެ.

ކުމާރުގެ އާއިލާގެ ރަހުމަތްތެރިއެއް ކަމަށްވާ ފައިސަލް ފާރޫގީ އޭރު ބުނެފައި ވަނީ މުމްބާއީގެ ލިލަވަތީ ހޮސްޕިޓަލްގައި ކުމާރު އޭރު އެޑްމިޓްކޮށް ފަރުވާ ދީފައި ވަނީ މޭގައި އިންފެކްޝަން ހެދިގެން ކަމަށެވެ.

ދިލިޕް ކުމާރު ވަނީ 65 ފިލްމްގައި މަސައްކަތް ކޮށްފައެވެ. އޭނާގެ ފާހަގަ ކޮށްލެވޭ ފިލްމްތަކުގެ ތެރޭގައި 1955 ވަނަ އަހަރު ރިލީޒްކުރި "ދޭވްދާސް"، 1957 ވަނަ އަހަރު ރިލީޒްކުރި "ނަޔާ ދައުރު"، 1960 ވަނަ އަހަރު ރިލީޒްކުރި "މުގަލް އީ އާޒަމް"، 1961 ވަނަ އަހަރު ރިލީޒްކުރި "ގަންގާ ޖަމުނާ"، 1981 ވަނަ އަހަރު ރިލީޒްކުރި "ކްރާންޓީ" އަދި 1986 ވަނަ އަހަރު ރިލީޒްކުރި "ކަރްމާ" ހިމެނެއެވެ.

ދިލިޕް ކުމާރު އެންމެ ފަހުން ފެނިފައިވަނީ 1998 ވަނަ ފިލްމް "ގީލާ" އިންނެވެ. އޭނާއަށް ވަނީ 1994 ވަނަ އަހަރު "ދާދާސާހެބް ޕަލްކޭ އެވޯޑް" އަރުވާފައެވެ. އަދި 2015 ވަނަ އަހަރު "ޕަދްމާ ވިބޫޝަން" އެވޯޑްވެސް ދީފައެވެ.