އައްޑޫގައި ހިންގި މާރާމާރީއާ ގުޅިގެން ހަތަރު މީހަކު ހައްޔަރު ކޮށްފި
8 އޮކްޓޯބަރު 2018 | ހޯމަ 07:46ފުއްޕާމެއަށް ވަނީ ވަރަށް ބޮޑަށް ގެއްލުން ލިބިފައި
މުހައްމަދު އީވާން
އައްޑޫ ސިޓީ މަރަދޫ ފޭދޫގައި ހޮނިހިރު ދުވަހުގެ ރޭ ހިންގި މާރާމާރީއާއި ގުޅިގެން އިތުރު 4 މީހަކު ހައްޔަރު ކޮށްފިއެވެ.
މި މާރާމާރީގައި ޒަހަމްކޮށްލި މަރަދޫ ބޯޅަދަނޑުގެ މުހައްމަދު އީވާނަށް ތޫނު އެއްޗަކުން ހަމަލާދިނުމުގެ ސަބަބުން ހާލު ސީރިއަސްވެ ފުއްޕާމޭގެ އޮޕަރޭޝަނެއް ވަނީ އައިޖީއެމްއެޗުން ކޮށްފައެވެ.
އީވާންއަށް ލިބުނު ޒަހަމްތަކާއި ގުޅިގެން އެންމެ ފުރަތަމަ ފަރުވާ ދީފައިވަނީ ހިތަދޫ ރީޖަނަލް ހޮސްޕިޓަލުންނެވެ. އިތުރު ފަރުވާއަށް މާލެ ގެންގޮސްފައިވަނީ އާދީއްތަ ދުވަހުގެ ހަވީރުއެވެ.
ފުލުހުން ބުނީ މާރާމާރީއާއި ގުޅިގެން މިހާތަނަށް 10 މީހުން ހައްޔަރު ކޮށްފައިވާ ކަމަށެވެ. އޭގެ ތެރެއިން 17 އަހަރުގެ ކުޑަ ކުއްޖަކު ހުޅުމީދޫއަށް ދިއުމުން ކޯޓު އަމުރެއްގެ ދަށުން އެ ރަށުން އޭނާ ވަނީ ހައްޔަރު ކޮށްފައެވެ.
އީވާން އަށް ހަމަލާ ދިނީ ރައްޓެހި ބަޔަކާ ބައްދަލު ކުރަން މަރަދޫ ފޭދޫއަށް ގޮސް އުޅެނިކޮށެވެ. މަރަދޫ ފޭދޫ ބޮޑުމަގުގައި ހުރި މިސްކިތެއް ކައިރީގައި އީވާން ހުއްޓާ 16 މީހުންގެ ގްރޫޕަކުން އޭނާ އަށް ހަމަލާދިން ކަމަށް އާއިލާ އިން ބުނެ އެވެ.
ހިތަދޫ ރީޖަނަލް ހޮސްޕިޓަލުގެ ސީނިއަރ ކޮމިއުނިޓީ ހެލްތު އޮފިސަރު މުހައްމަދު ނަޖީބް ވިދާޅުވެފައި ވަނީ އީވާންގެ ބުރަކަށްޓަށާއި، ކަރަށް އަދި ބޮލަށް ވެސް ވަނީ ތޫނު އެއްޗަކުން ހަމަލާދީފައި ކަމަށެވެ.
