އައްޑޫ ސިޓީ މަރަދޫ ފޭދޫގައި ހޮނިހިރު ދުވަހުގެ ރޭ ހިންގި މާރާމާރީގައި ތޫނު އެއްޗަކުން ހަމަލާދިނުމުގެ ސަބަބުން ހާލު ސީރިއަސްވި މުހައްމަދު އީވާން މަރުވި ކަމަށް ބުނެ ފަތުރަނީ ދޮގު ހަބަރެއް ކަމަށް އެ އާއިލާ އިން ބުނެފިއެވެ.
އާދިއްތަ ދުވަހުގެ ރޭ ރާއްޖެއެމްވީއަށް މައުލޫމާތު ދެމުން އީވާންގެ އާއިލާ އިން ބުނީ އޭނާގެ ހާލު އަދިވެސް ވަރަށް ސީރިއަސް ކަމަށާއި އޭޑީކޭ ހޮސްޕިޓަލަށް ބަދަލު ކުރުމުގެ މަސައްކަތް ކުރި ނަމަވެސް ހާލު ސީރިއަސް ކަމުން ބަދަލު ނުކެރުވުނު ކަމަށެވެ. އޭޑީކޭ އިން ޑޮކްޓަރުން އައިޖީއެމް ހޮސްޕިޓަލަށް ގެނެސް އީވާންގެ އޮޕަރޭޝަން ފަށާފައިވާ ކަމަށް ވެސް އާއިލާ އިން ބުންޏެވެ. އާއިލާ އިން އިތުރަށް ބުނީ ޑޮކްޓަރުން އުންމީދު ކަނޑަލާފައިވާ ކަމަށެވެ. ޕުއްޕާމޭގެ އެއްފަޅިއަށް ވަރަށް ބޮޑަށް ލޭ އެޅިފައިވާ ކަމަށް ޑޮކްޓަރުން ބުނެފައިވާ ކަމަށް އާއިލާ އިން ބުންޏެވެ.
މަރަދޫ ފޭދޫއަށް އިވާން ދިޔައީ ރައްޓެހި ބަޔަކާ ބައްދަލު ކުރަން ކަމަށާއި މަރަދޫ ފޭދޫ ބޮޑުމަގުގައި ހުރި މިސްކިތެއް ކައިރީގައި އީވާން ހުއްޓާ 16 މީހުންގެ ގްރޫޕަކުން އޭނާ އަށް ހަމަލާދިން ކަމަށް އާއިލާ އިން ބުންޏެވެ. އަދި އެއީ ދެ ގްރޫޕެއްގެ ދެމެދުގައި ހިންގި މާރާމާރީއެއް ނޫން ކަމަށް ވެސް އާއިލާ އިން ބުންޏެވެ.
ހިތަދޫ ރީޖަނަލް ހޮސްޕިޓަލުގެ ސީނިއަރ ކޮމިއުނިޓީ ހެލްތު އޮފިސަރު މުހައްމަދު ނަޖީބް ވިދާޅުވެފައި ވަނީ އީވާންގެ ބުރަކަށްޓަށާއި، ކަރަށް އަދި ބޮލަށް ވެސް ވަނީ ތޫނު އެއްޗަކުން ހަމަލާދީފައި ކަމަށެވެ. އޭނާގެ ފުއްޕާމެއަށް ވެސް ބޮޑެތި ގެއްލުންތަކެއް ލިބިފައިވާ ކަމަށް އޭނާ ވިދާޅުވިއެވެ.
މި މާރާމާރީގައި އިތުރު އެހެން މީހަކަށް ވެސް އަނިޔާވިއެވެ. އެކަމަކު އެ މީހާ އެހާ ސީރިއަސް ނޫން ކަމަށް ފުލުހުން ބުންޏެވެ.
ފުލުހުން ބުނީ މި މާރާމާރީއާ ގުޅިގެން މިހާތަނަށް ހަ މީހަކު ހައްޔަރުކޮށްފައިވާ ކަމަށެވެ. އޭގެ ތެރެއިން 17 އަހަރުގެ ކުޑަ ކުއްޖަކު ހުޅުމީދޫއަށް ދިއުމުން ކޯޓު އަމުރެއްގެ ދަށުން އެ ރަށުން އޭނާ ހައްޔަރުކޮށްފައިވާއިރު އަނެއް 5 މީހުން ހައްޔަރުކޮށްފައިވަނީ ފޭދޫ ގެއެއްގެ ތެރޭގައި ފިލާ ތިއްބާ ކަމަށް ފުލުހުން ބުންޏެވެ.
އެ މައްސަލައާ ގުޅިގެން މިހާރު ފުލުހުންގެ ބެލުމުގެ ދަށުގައި ތިބީ އުމުރުން 17 އަހަރުގެ ދެ ކުޑަކުދިންނާއި އުމުރުން 18 އަހަރުގެ މީހަކާއި އުމުރުން 22 އަހަރުގެ މީހެއްގެ އިތުރުން އުމުރުން 21 އަހަރުގެ މީހެކެވެ.
