އިންތިހާބީ ރައީސް ސޯލިހަށް ކުރިއަށް އޮތީ އުދަނގޫ ދުވަސްތަކެއް!

ވެރިކަމުގެ ހުރިހާ އާރަކާއި ބާރެއް މުށު ތެރެއަށް ލައްވައިގެން ހުންނެވި އަބްދުﷲ ޔާމީންގެ މައްޗަށް އިންތިހާބެއްގައި ކުރި ހޯދުމަކީ ވެސް ފަސޭހަ ކަމެއް ނޫނެވެ. ވައްކަމާއި އަނިޔާވެރިކަން އިންތިހާއަށް އޮތް، އަދި ހުދުމުތާރުކަން އިސްކުރެއްވި ވެރިިއެއްގެ ވެރިކަން ބަލިކުރެއްވުމަކީ ވަރަށް ވެސް ބޮޑު އަދި އެހާމެ އުދަނގޫ މަސައްކަތެކެވެ. ނަމަވެސް ހުރިހާ ކަމެއްގެ ތެރެއިން ވެސް އިދިކޮޅު އިއްތިހާދުގެ ކެނޑިޑޭޓް އިބްރާހިމް މުހައްމަދު ސޯލިހް (އިބޫ) އެ ވަނީ އިންތިހާބު ކާމިޔާބު ކުރައްވާފައެވެ. ބޮޑު ތަނުން ކާމިޔާބުކުރައްވައި، އަބްދުﷲ ޔާމީން ލަދުގަންނަވާލާފައެވެ.

ކޮންމެއަކަސް ދައްކަން މި އުޅެނީ އަބްދުﷲ ޔާމީން ބަލި ކުރިގޮތުގެެ ވާހަކައެއް ނޫނެވެ. އަބްދުﷲ ޔާމީން ކުރި އަނިޔާ އާއި، ވައްކަމާއި، ފުރައްސާރައިގެ ވާހަކައެއް ވެސް ނޫނެވެ. އިންތިހާބު ކާމިޔާބު ކުރެއްވުމަށް ވުރެ އުދަނގޫ ކަންތައްތަކެއް ކުރިމަތީގައި އޮތް ވާހަކައެވެ.

އެމްޑީޕީ ޤައުމީ މަޖިލީހުގެ ޖަލްސާއަށް އިންތިހާބީ ރައީސް ސޯލިހް ވަޑައިގަންނަވަނީ -- ފޮޓޯ: ރާއްޖެ.އެމްވީ

ރައްޔިިތުންގެ ކެންޑިޑޭޓެއްގެ ގޮތުގައި އިބްރާހީމް މުހައްމަދު ސޯލިހް އިންތިހާބު ކާމިޔާބުކުރެއްވީ ބޮޑެތި ވައުދުތަކަކާ އެކުއެވެ. އެންމެ ބޮޑު ވައުދެއްގެ ގޮތުން ރައްޔިތުންނަށް އަދުލު އިންސާފު ކަށަވަރުކޮށްދެއްވާނެ ކަމާއި، ހަމަހަމަ ކަމާ އެކު ތަފާތުކުރުމެއް ނެތި ރައްޔިތުންނަށް ކަންތައްތައް ކޮށްދެއްވާނެ ކަމަށް ވައުދުވިއެވެ. އެ ވައުދުތައް ފުއްދަން ކުރަންޖެހޭ މަސައްކަތަކީ އިންތިހާބު ކާމިޔާބުކުރުމަށް ކުރި މަސައްކަތްތަކަށް ވުރެ އުނދަގޫ މަސައްކަތަކެވެ.

ރައްޔިތުންނަށް އަދުލު އިންސާފު ކަށަވަރުކޮށްދިނުމަށް ކުރަންޖެހޭ އެންމެ މުހިންްމު މަސައްކަތަކީ ކޯޓުތައް އިސަލާހްކުރުމުގެ މަސައްކަތެވެ. ކޮރަޕްޝަނާއި ފާސާދައިގެ ތެރޭގައި ތިބެ އެއިރެއްގައި ސިޔާސީ މަސްރަހު އެނބުރޭ ކޮޅަކަށް ހުކުމް ކުރެއްވި ފަނޑިޔާރުންނާއި ގާޒީންތައް ނެރެ ފަނޑިޔާރު ގެތަށް ސާފުކުރުމަށް ކުރަންޖެހޭ މަސައްކަތެވެ.

އެހެން ގޮތަކަށް ބުނާ ނަމަ މުޅި ފަނޑިޔާރުގެ ދޮވެ ސާފުކުރަންޖެހޭނެއެވެ.

ފަނޑިޔާރު ގެތަށް ދޮވެ ސާފުކޮށް، ފަނޑިޔާރުންނަކީ ނަޒާހަތްތެރި، އިންސާފު ޤާއިމްކޮށްދޭ، އަދި މަދު ލާރިކޮޅަކަށް ނުވަތަ ދައްކާ ބިރަކަށް ހުކުމްތަކާާއި އަމުރުތައް ނެރުއްވާ ފަނޑިޔާރުންގެ ގޮތުގައި ތިއްބެވި ތިބުން ބަދަލުކުރުމަށް ކުރަންޖެހޭ މަސައްކަތުގައި މަދު ބައެއްގެ ނުރުހުމާއި، ދުއްތުރާތައް އިންތިހަބީ ރައީސް ސޯހަށް ކުރިމަތިވާނެކަމީ ޔަޤީންވެ ކަށަވަރުވާ ކަމެވެ. އެ ސަބަބާ ހުރެ އެކަނިވެސް އެ މައްސަކަތަކީ ދަތި އަދި އެހާމެ އުދަނގު މަސައްކަތަކަށް ވާނެއެވެ.

ފަނޑިޔާރު ގޭގެ އިތުރުން ފުލުހުންގެ މުއައްސަސާ ހަރުދަނާކޮށް، އެ މުއައްސަސާއަށް އާންމުގެ އިތުރުބާރު ހޯދަން ކުރަންޖެހޭ މަސައްކަތަކީވެސް އެހާމަ ބޮޑު އަދި އުދަނގޫ މަސައްކަތަކަށްވާނެއެވެ. ސިޔާސީ ނުފޫޒުގެ ތެރެއިން ކަންތައްތައް ކުރަމުންދިޔަދިޔުން ބަދަލުކޮށް، އެ މުއައްސަސާއަކީ މިނިވަން އަދި ރައްޔިތުންނަށް އިތުބާރުކުރެވޭ ފަދަ މުއައްސަސާއަކަށް ހެދުމަށް ފުލުހުންގެ ތެރެއަށް ވެސް އިންތިހާބީ ރައީސަށް ބޮޑެތި ބަދަލުތަކެއް ގެންނަވަން ޖެހިވަޑައިގަންނަވާނެ އެވެ.

މިނިވަން މުއައްސަސާތައް އިސްލާހްކޮށް، އެ ތަންތަން ހަރުދަނާކޮށް، ސަރުކާރުގެ ކުންފުނިތަކާއި، އިދާރާތައް ހަރުދަނާކުރުމުގެ މަަސައްކަތަކީ ވެސް ކުުޑަަ މަސައްކަތަށް ނުވާނެއެވެ. އެ ހުރިހާ ކަމަކީ ވެސް އިންތިހާބީ ރައީސް ސޯލިހްގެ ސަރުކާރަކުން ކުރަންޖެހޭނެ ބޮޑެތި އަދި އެހާމެ އުދަނގޫ ކަންތައްތަކަކަށް ވާނެއެވެ.

އުފާފާޅުކުރުމުގެ ހަރަކާތެއްގައ އިންތިހާބީ ރައީސް ސޯލިހް ބައިވެރިވެވަޑައިގެން -- ފޮޓޯ: ރާއްޖެ.އެމްވީ

އެ ކަންތައްތަކުގެ އިތުރުން އާ ރައީސަށް ކުރިއަށް އޮތް ދުވަސްތަކުގައި ކުރިމަތިވެވަޑައިގަންނަވާނެ އެންމެ ބޮޑު ގޮންޖެހުމަކަށް ވާނީ އެކި ފިކުރުތަކުގެ މައްޗަށް އޮތް ކޯލިޝަން އެކަތިގަނޑެއްގެ ގޮތުގައި ކުރިއަށްގެންދިޔުމުގެ މަސައްކަތެވެ. ހިޔާލު ތަފާތުވުންތަކުގެ ތެރެއިން ކޯލިޝަން އެއް ބައެއްގެ ގޮތުގައި ކުރިއަށް ގެންދިޔުމުގެ މަސައްކަތެވެ. އެ މަސައްކަތަކީ ވެސް އިންތިހާބީ ރައީސް ސޯލިހްގެ ސަރުކާރަކާ ކުރިމަތިވާނެ ބޮޑު މަސައްކަތަކަށް ވާނެއެވެ. ނަމަވެސް އިންތިހާބީ ރައީސް ސޯލިހަކީ ހިކުމަތްތެރިކަމާ އެކު އަމަލުކުރައްވާ ބޭފުޅަަކަށްވާއިރު، އެ މަސައްކަތުގައި ކުރިއަށް ވަޑައިގަންނަވާނެކަމާ މެދު ސުވާލު އުފައްދާނެ އެއްވެސް ޖާގައެއް ނެތެވެ.

މި ހުރިހާ ކަމެއްގެ އިތުރުން ޤައުމު އެކަތިގަނޑަކަށް ހަދައި، އެއްބައިވަންތަ ބަޔަކަށް ހެދުމަށްް ވެސް އާ ސަރުކާރަކުން ގިނަ މަސައްކަތްތަކެއް ކުރަންޖެހޭނެއެވެ. ވީދިފައިވާ އިޖުތިމާއީ ފޭރާން ހެޔޮވަރުކޮށް، ދިވެހިވަންތަ މުޖުތަމައުއެއް ޤާއިމްކުރުމަކީ ވެސް ހުރިހާ ކަމެއްގެ ތެރެއިން އިންތިހާބީ ރައީސް ސޯލިހްގެ ސަރުކާރަކުން ކުރަންޖެހޭނެ ކަންތައްތަކެވެ.

އެހެންކަމުން ކޮންމެ ގޮތަކަށް ބެލި ނަމަވެސް ކުރިއަށް އޮތީ އިންތިހާބީ ރައީށް ސޯލިހަށް އުދަނގޫ ދުވަސްތަކެކެވެ. ގިނަ މަސައްކަތްތައްކައް ކުރައްވަންޖެހިވަޑައިގަންނަވާނެ ދުވަސްތަކެވެ. ރައްޔިތުންނަށް އަނިޔާވެރިވި މީހުންނާއި، ރައްޔިތުންގެ ފައިސާ ބޭނުންކޮށް، އޭގެން މަންފާ ލިބުނު މީހުން އިންސާފުގެ ކުރިމައްޗަށް ގެނައުމަށް ކުރަންޖެހޭ ބުރަ މަސައްކަތްތައް ކުރުމެވެ.

ކުރިމަތިވާ ހުރިހާކަމެއްގެ ތެރެއިން އިންތިހާބީ ރައީސް ސޯލިހަށް ވެރިކަން ކުރެއްވުމަކީ މާފަސޭހަ ކަމަކަށް ވެސް ނުވާނެއެވެ. ނަމަވެސް ކޮންމެ އުދަނގުލެއްގައި ވެސް އެމަނިކުފާނަކީ މަޑުމައިތިރިކަމާ އެކު ހިކުމަތްތެރިކަން އިސްކުރާ ބޭފުޅެއްކަން އޮތީ ފެންނާށެވެ. މިހާތަނާ ޖެހެންދެން ކޯލިޝަން އެކަތިގަނޑެއްގެ ގޮތުގައި ބޭއްވުމުގައި އެންމެ އިސް ދައުރެއް އަދާކުރެއްވީ ވެސް އެމަނިކުފާނެވެ.