ޑީޖޭއޭގެ މަގާމަށް ކުރިމަތިލުމަށް ފުރުސަތު ހުޅުވާލައިފި

ޖުޑީޝަލް އެޑްމިނިސްޓްރޭޓަރު (ޑީޖޭއޭ)ގެ މަގާމަށް ކުރިމަތިލުމަށް ފުރުސަތު ހުޅުވާލައިފިއެވެ.

ޝަރުއީ ދާއިރާގެ އެންމެ އިސް އިދާރީ މުވައްޒަފުގެ މަގާމު ކަމަށްވާ ޑީޖޭއޭގެ މަގާމަށް މީހަކު ހޯދުމަށް އިއުލާން ކޮށްފައި މިވަނީ އެމަގާމުގައި ކުރިން ހުންނެވި ހަސަން ސައީދު މަގާމުން ވަކިކޮށް އެމަގާމު ހުސްކޮށް އޮންނަތާ ދެމަހަށް ވުރެ ގިނަ ދުވަސްފަހުންނެވެ.

Advertisement

ސުޕްރީމް ކޯޓުން ކޮށްފައިވާ އިއުލާނުގައި ބުނެފައިވަނީ ޑީޖޭއޭގެ މަގާމަށް ކުރިމަތިލުމުގެ މުއްދަތު ހަމަވާނީ މިމަހުގެ 14 ވަނަ ދުވަހު ކަމަށެވެ.

ސްޕްރިމްކޯޓުގެ އިއުލާނުގައި ބުނެފައިވަނީ ޑީޖޭއޭގެ މަގާމު އަދާކުރާ މީހެއްގެ މުސާރަ އަކީ 30000 ރުފިޔާ ކަމަށާއި ލިވިން އެލަވަންސްގެ ގޮތުގައި 15000 ރުފިޔާ އަދި ފޯން އެލަވަންސްގެ ގޮތުގައި 2000 ރުފިޔާ އެމަގާމު އަދާކުރާ މީހަކަށް ލިބޭނެ ކަމަށެވެ.

މި މަގާމުގެ މުއްދަތަކީ 5 އަހަރު ކަމަށްވާއިރު، މި މަގާމަށް އައްޔަން ކުރެވޭ ފަރާތަކީ ކަމާއި ބެހޭ ދާއިރާއެއްގެ ޑިގްރީއެއް އޮތުމާއި، ދައުލަތުގެ އިދާރާއެއް ނުވަތަ ކުންފުންޏެއް ނުވަތަ ބޭރުގެ ޖަމާއަތެއްގެ ސީނިއާ މެނޭޖްމަންޓުގައި ތަޖުރިބާ ހުންނަންޖެހެއެވެ.

މީގެ އިތުރުން ދާއިރާގެ އިދާރީ ކަންކަން ހިންގުމުގެ މަސްއޫލިއްޔަތު އަދާކުރެވިދާނެ ފަރާތެއްކަން ދިވެހިރާއްޖޭގެ ސުޕްރީމް ކޯޓުގެ ފަނޑިޔާރުންނަށް ގަބޫލުކުރެވޭ ފެންވަރެއްގައި ހުރެއްޖެނަމަ، އެ މީހެއްގެ މަޤާމުގެ މުއްދަތު 5 އަހަރުން 5 އަހަރަށް އިތުރު ކުރާނެއެވެ.

ފެބްރުއަރީ އެކެއްގެ ސުޕްރީމް ކޯޓުގެ އަމުރާ ގުޅިގެން، ސަރުކާރުން 5 ފެބްރުއަރީގައި ކުއްލި ނުރައްކަލުގެ ހާލަތު އިއުލާން ކުރުމަށް ފަހު، އެންމެ ފުރަތަމަ ހައްޔަރުކުރި ބޭފުޅުންގެ ތެރޭގައި ހަސަން ސައީދު ހިމެނެ އެވެ. ނަމަވެސް އޭނާ މަގާމުން ވަކިކޮށްފައި މި ވަނީ ޖުލައި މަހުގެ 10 ވަނަ ދުވަހު އެވެ.

ހަސަންގެ މައްޗަށް ދައުލަތުން ވަނީ ގާނޫނު ހިންގަން ހުރަސްއެޅުމުގެ ދައުވާއާއި ރިޝްވަތު ހިފުމުގެ ދައުވާ އުފުލާފައެވެ.