ރިޔާސީ އިންތިޚާބު ކާމިޔާބު ކުރެއްވި އިބްރާހިމް މުހައްމަދު ސޯލިހު އާއި ނައިބު ރައީސް ފައިސަލް ނަސީމަށް މަރުހަބާ ދެންނެވުމަށް ހުޅުމާލެ ރައްޔިތުން ތައްޔާރުވެއްޖެއެވެ.
"އުފާފާޅު ކުރުން ހުޅުމާލޭގައި" އިބޫއަށާއި ފައިސަލަށް މަރުހަބާ ދެންނެވުމަށް ހަމަޖެހިފައި ވަނީ މިރޭ 8:30 އިން ފެށިގެންނެވެ. މިހަރަކާތް ކުރިއަށްދާނީ ގޭޓްވޭ އިންޓަނޭޝަނަލް ސްކޫލުގައެވެ.
ކޯލިޝަނުން އިންތިޚާބު ކާމިޔާބު ކުރުމާއި ގުޅިގެން މާލޭގެ އެކި ސަރަހައްދުތަކުގައި އަންނަނީ އުފާފާޅު ކުރުމުގެ ހަރަކާތްތައް ބާއްވަމުންނެވެ.
އެގޮތުން ބުރާސްފަތި ދުވަހުގެ ރޭ 9 ޖެހިއިރު "ބިޔަ ހެންވޭރުން" ނަމުގައި ދަރުބާރު ގޭގައި ވަނީ އުފާފާޅުކުރުމުގެ ހަރާކާތްތައް ކުރިއަށް ގެންގޮސްފައެވެ. މިހަރަކާތުގައި ވެސް 11:30 ވަންދެން އިންތިޚާބީ ރައީސް އިބްރާހީމް މުހައްމަދު ސޯލިހާއި އިންތިޚާބީ ނައިބު ރައީސް ފައިސަލް ނަސީމް ވަނީ ހަފްލާއަށް ހާޒިރުވި ފަރާތްތަކާއެކު ފޮޓޯ ނަންގަވާފައެވެ.
ރިޔާސީ އިންތިޚާބުގެ ދާއިމީ ނަތީޖާ އިލެކްޝަންސް ކޮމިޝަނުން އާއްމު ކޮށްފައިވާއިރު އިބްރާހިމް މުހައްމަދު ޞޯލިހު ވަނީ 58.3 އިންސައްތަ ވޯޓު ހޯއްދަވާފައެވެ. ދެވަނަ ދައުރެއް ކަށަވަރު ކުރެއްވުމަށް ނުކުންނެވި އަބްދުﷲ ޔާމީން އަބްދުލް ގައްޔޫމަށް ލިބިވަޑައިގެންފައި ވަނީ 41.7 އިންސައްތަ ވޯޓެވެ.
