މަރުގެ އިންޒާރުތަކާއި ގުޅިގެން އީސީގެ ހަތަރު މެމްބަރުން ރާއްޖޭން ބޭރުގައި!
ރިޔާސީ އިންތިހާބުގެ ނަތީޖާ އިއުލާން ކުރި ދުވަހުން ފެށިގެން އިންޒާރުތައް ދަނީ ލިބެމުން
އިލެކްޝަންޝް ކޮމިޝަނުން ބޭއްވި ނޫސްވެރިންގެ ބައްދަލުވުމުގެ ތެރެއިން
މިދިޔަ މަހު ބޭއްވި ރިޔާސީ އިންތިހާބުގެ ނަތީޖާ އިއުލާން ކުރުމަށްފަހު އިލެކްޝަންޝް ކޮމިޝަންގެ ހަތަރު މެމްބަރުންނަށް ލިބުނު މަރުގެ އިންޒާރުތަކާއި ގުޅިގެން އަވަށްޓެރި ސްރީލަންކާ އަށް ވަޑައިގަންނަވާފައިވާ ކަމަށް އިލެކްޝަންސް ކޮމިޝަން (އީސީ) ގެ ރައީސް އަހުމަދު ޝަރީފް ވިދާޅުވެއްޖެއެވެ.
ހުކުރު ދުވަހުގެ ރޭ ރާއްޖެއެމްވީއަށް ދެއްވި ފޯން އިންޓަވިއުގައި ޝަރީފް ވިދާޅުވީ ރިޔާސީ އިންތިހާބުގެ ނަތީޖާ އިއުލާން ކުރި ދުވަހުން ފެށިގެން އެ ކޮމިޝަންގެ މެމްބަރުން އުޅެން ޖެހިފައިވަނީ ވަރަށް ބިރުވެރި މާހައުލެއްގައި ކަމަށާއި އެ މެމްބަރުން ދިރިއުޅޭ ގެއަށް ދަންވަރު ގޭންގުތަކުން ވަދެ މާރާލެ ކަމުގެ އިންޒާރާއި ކޮށާލާނެ ކަމުގެ އިންޒާރުތައް ވެސް ދީފައިވާ ކަމަށެވެ.
މީގެ އިތުރުން އިލެކްޝަންޝް ކޮމިޝަންގައި މަސައްކަތް ކުރާ ގިނަ މުވައްޒަފުންނަށް ވެސް އެކި ކަހަލަ އިންޒާރު ލިބެމުންދާ ކަމުގެ ޝަކުވާ އެ މުވައްޒަފުން ކޮށްފައިވާ ކަމަށް ޝަރީފު ވިދާޅުވިއެވެ. އީސީގެ މެމްބަރުންނަށް މަރުގެ އިންޒާރު ދިން މައްސަލަ މިހާރު ފުލުހަށް ހުށަހަޅާފައިވާ ކަމަށް ޝަރީފް ވިދާޅުވިއެވެ.
ލަންކާގައި މި ވަގުތު ތިއްބެވީ އިލެކްޝަންޝް ކޮމިޝަންގެ ނައިބު ރައީސް އަމްޖަދު މުސްތަފާ އާއި މެމްބަރު އަހުމަދު އަކްރަމާއި އަލީ ނަޝާތުގެ އިތުރުން މެމްބަރު އިސްމާއިލް ހަބީބްއެވެ. އަދި ހަބީބް ލަންކާ އަށް ވަޑައިގެންނެވީ ބޭސްފަރުވާއަށް ކަމަށް ޝަރީފް ވިދާޅުވިއެވެ.
ޝަރީފް ދެއްކެވި ވާހަކަތަކެއް ކަމަށް ބުނެ ސޯޝަލް މީޑިއާގައި މީގެ ދުވަސް ކޮޅެއް ކުރި ދައުރުވި އޯޑިއޯގެ މައްސަލަ ފުލުހުންނަށް ހުށަހަޅާފައިވާއިރު އެ މައްސަލަ ފުލުހުން ތަހުޤީޤު ކުރަމުންދޭތޯ ރާއްޖެއެމްވީން ސުވާލު ކުރުމުން ޝަރީފް ވިދާޅުވީ އޭނާ ހުށަހެޅުއްވި މައްސަލައާ ގުޅޭ ގޮތުން ފުލުހުން އަދި އެއްވެސް ސުވާލެއް ކޮށްފައިނުވާ ކަމަށެވެ.
މި އަހަރުގެ ރިޔާސީ އިންތިހާބުގައި ޕީޕީއެމްގެ ކެންޑިޑޭޓް ރައީސް އަބްދުﷲ ޔާމީނަށް 96،052 ވޯޓް ލިބިވަޑައިގެންނެވިއިރު އިބްރާހީމް މުހައްމަދު ސޯލިހް ވަނީ އިންތިހާބު ބޮޑުތަނުން ކާމިޔާބު ކުރައްވާފައެވެ. އިބޫ އަށް ލިބިވަޑައިގަތީ 134،705 ވޯޓެވެ.
ރިޔާސީ އިންތިހާބުގެ ވޯޓު އޮޅުވާލި ކަމަށް ތުހުމަތުކޮށް ޕީޕީއެމް އިން ދަނީ އިލެކްޝަންސް ކޮމިޝަނާ ދެކޮޅަށް ސިލްސިލާ މުޒާހަރާތަކެއް ކުރަމުންނެވެ.
