ފެންވަރު ރަނގަޅު ތައުލީމެއް ފޯރުކޮށްދިނުމަށް ފެންވަރު ރަނގަޅު ޓީޗަރުން ވަރަށް މުހިންމު: އެޑިޔުކޭޝަން މިނިސްޓަރު
4 އޮކްޓޯބަރު 2018 | ބުރާސްފަތި 16:21ދަރިވަރަށް ތަރުބަވީ ތައުލީމެއް ފޯރުކޮށްދިނުމަށް ބޭނުންވާނީ ހުނަރުވެރި ޓީޗަރުން
އެޑިޔުކޭޝަން މިނިސްޓަރު އައިޝަތު ޝިހާމް
ފެންވަރު ރަނގަޅު ތައުލީމެއް ފޯރުކޮށްދިނުމަށް ފެންވަރު ރަނގަޅު ޓީޗަރުން ވަރަށް މުހިންމު ކަމަށް އެޑިޔުކޭޝަން މިނިސްޓަރު އައިޝަތު ޝިހާމް ވިދާޅުވެއްޖެއެވެ.
ޓީޗަރުންގެ ދުވަހާ ގުޅުވައިގެން މިނިސްޓަރު އައިޝަތު ޝިހާމް ނެރުއްވި ތަހުނިޔާ މެސެޖްގައި ވިދާޅުވީ ފެންވަރު ރަނގަޅު ޓީޗަރަކަށް ވުމަށްޓަކައި ތަމްރީނުތައް ފުރިހަމަކުރަންޖެހޭ ކަމަށެވެ.
މިނިސްޓަރު ވިދާޅުވީ ދަރިވަރަށް ތަރުބަވީ ތައުލީމެއް ފޯރުކޮށްދިނުމަށް ބޭނުންވާނީ ހުނަރު ދަސްކޮށްގެން ތިބި ޓީޗަރުން ކަމަށާއި، ޓީޗަރުންނަށް ދޭންޖެހޭ ތަމްރީން ދިނުމަށް ފާއިތުވި ދުވަސްތަކުގައި ގިނަ މަސައްކަތްތަކެއް ކުރެވިފައިވާ ކަމަށެވެ. އަދި މި މަސައްކަތްތަކުގެ ފައިދާ ވެސް ދަރިވަރުންނަށް ކުރަމުންދާ ކަމަށް ވެސް މިނިސްޓަރު ވިދާޅުވިއެވެ.
މިނިސްޓަރު ވިދާޅުވީ ފެންވަރު ރަނގަޅު ތައުލީމެއް ފޯރުކޮށްދިނުމަށް، ސްކޫލުތަކުން ކުރާ މަސައްކަތާއި، އެންމެ އިސް ސަފުގައި މަސައްކަތްކުރާ ޓީޗަރުންގެ މަސައްކަތް ފާހަގަކުރާ ކަމަށެވެ. އަދި ދަރިވަރުންގެ ކުރިއެރުމާއި ތަރައްގީއަށް ސްކޫލުތަކުން ކުރިއަށް ގެންދާ ޕްރޮގްރާމްތައް ހިންގުމުގައި ސްކޫލުތަކުގެ އިސްވެރިންނާއި މުވައްޒަފުންގެ ކުރައްވާ މަސައްކަތްތައް ވެސް މިނިސްޓަރު ވަނީ ފާހަގަކުރައްވާފައެވެ.
މީގެ އިތުރުން މިނިސްޓަރު ވަނީ ޓީޗަރުން ކުރާ ބުރަ މަސައްކަތައް އެއްބާރުލުންދީ ދަރިވަރުންގެ ކުރިއެރުމާއި ތަރައްގީއަށް ކުރެވޭ މަސައްކަތްތަކަށް ބެލެނިވެރިންދޭ އަހައްމިއްޔަތުކަމާއި، ސަމާލުކަން ވެސް ފާހަގަކޮށްފައެވެ.
ކޮންމެ އަހަރެއްގެ އޮކްޓޫބަރު މަހުގެ 5 ވަނަ ދުވަހު ފާހަގަކުރާ ދުނިޔޭގެ މުދައްރިސުންގެ ދުވަހުގެ ތަހްނިޔާ އާއި ހެޔުއެދުންތައް، ރާއްޖޭގެ ހުރިހާ ޓީޗަރުންނަށް އަރިސްކުރުމުގެ އިތުރުން ޓީޗަރުން ތަމްރީނު ކުރުމުގެ މަސައްކަތް ކުރާ މަރުކަޒުތަކުގެ މުވައްޒަފުންނާއި ޓީޗަރުންގެ މަސައްކަތްތަކަށް މަދަދުދޭ އެންމެހާ ފަރަތްތަކަށް މިނިސްޓަރު ވަނީ ތަހުނިޔާ ފޮނުއްވާފައެވެ.
