އިބޫ ބައްދަލުކުރަން އެންމެ ބޭނުންފުޅުވާ އިމްރާންޚާން ރާއްޖެވަޑައިގަތުމަށް ދައުވަތު އަރުވައިފި
5 އޮކްޓޯބަރު 2018 | ހުކުރު 14:38އިބޫ އެންމެ ބައްދަލުކުރައްވަން ބޭނުންފުޅުވާ ފަރާތަކީ އިމްރާންޚާން ކަމަށް އެ މަނިކުފާނު ވަނީ ވިދާޅުވެފައި
އިބްރާޙިމް މުހައްމަދު ސޯލިހު އެ މަނިކުފާނުގެ ސަޕޯޓަރުންނާއި ސަލާމްކުރައްވަނީ
އިންތިޚާބީ ރައީސް އިބްރާހިމް މުހައްމަދު ސޯލިހު އެންމެ ބައްދަލު ކުރައްވަން ބޭނުންފުޅުވާ ޕާކިސްތާނުގެ ބޮޑުވަޒީރު އިމްރާން ޚާން އަށް ރާއްޖެއަށް ވަޑައިގަތުމަށް ދައުވަތު އަރުވައިފިއެވެ. ޕާކިސްތާނު ޓުޑޭގައި ރިޕޯރޓްކޮށްފައިވާ ގޮތުގައި ހޯމަ ދުވަހު ޕާކިސްތާނުގެ ރައީސް އިމްރާހް ޚާން އަށް ފޯނުން ގުޅުއްވައި އިބޫ ވަނީ ރާއްޖެ ވަޑައިގަތުމަށް ދައުވަތު އަރުވާފައެވެ. ޕާކިސްތާނު ޓުޑޭގައި ބުނެފައި ވަނީ އިބޫގެ ފޯންކޯލްގައި ދެ ފަރާތަށް ވެސް އެއްބަސްވެވޭ ތާރީޚެއްގައި ރާއްޖެ ވަޑައިގަތުމަށް އިބޫ އިމްރާން ޚާންގެ އަރިހުގައި އެދިވަޑައިގެންފައިވާ ކަމަށާއި އަދި އެ ދައުވަތު އިމްރާން ޤަބޫލުފުޅު ކުރައްވާފައިވާ ކަމަށެވެ.
ރިޔާސީ އިންތިޚާބުން އިބްރާހިމް މުހައްމަދު ސޯލިހަށް ލިބިވަޑައިގެންނެވި ކާމިޔާބީއަށް އިމްރާން ޚާން މަރްހަބާ ދަންނަވާފައިވާ ކަމަށާއި، އިބޫގެ ޒައާމަތުގައި ދެ ޤައުމުގެ ދާޚިލީ ގުޅުން އިތުރަށް ބަދަހިވެގެން ދާނެ ކަމަށް އުއްމީދުކުރައްވާ ކަމަށް އިމްރާން ވިދާޅުވެފައިވާ ކަމަށް ޕާކިސްތާނު ޓުޑޭގައި ވަނީ ބުނެފައެވެ.
އެނޫހުގައި އިތުރަށް ބުނެފައި ވަނީ އިބޫގެ ޒައާމަތުގައި ރާއްޖޭގެ ރައްޔިތުންނަށް ކުރިއެރުމާއި ފާގަތިކަން ލިބޭނެ ކަމަށް އުއްމީދު ކުރައްވާ ކަމަށާއި، އިތުރު ކުރިއެރުންތައް ލިބޭނެ ކަމަށް އުއްމީދުކުރައްވާ ކަމަށް އިމްރާން ޚާން ވިދާޅުވެފައިވާ ކަމަށެވެ. ދެ ލީޑަރުން ވެސް ވަނީ ރާއްޖެ އާއި ޕާކިސްތާނާއި ދެ ޤައުމުގައި އޮތް ދާޚިލާ ގުޅުމާއި، އޮތް ރަހްމަތްތެރިކަމުގެ ގުޅުން ދެ ބޭފުޅުންގެ ވެރިކަމުގެ ޒައާމަތުގައި އިތުރަށް ހަރުދަނާ ކުރައްވާނެ ކަމަށް އެއްބަސްވެ ވަޑައިގެންފައިވާ ކަމަށް ޕާކިސްތާނު ޓުޑޭގައި ވަނީ ބުނެފައެވެ.
އިބޫ ކެމްޕެއިން ދަތުރުފުޅެއްގައި އެ މަނިކުފާނުގެ ސަޕޯޓަރުންނާއި ސަލާމްކުރައްވަނީ
ރައީސް ކަމަށް އިންތިޚާބު ވެވަޑައިގަތުމުގެ ކުރިން ރާއްޖެޓީވީގެ "އިބޫ" ޕްރޮގްރާމްގައި އެ މަނިކުފާނު އެންމެ ބައްދަލުކުރައްވަން ބޭނުންފުޅުވާ ފަރާތަކީ ކޮބައިތޯ ސުވާލު ދެންނެވުމުން "އިބޫ" ވިދާޅުވެފައި ވަނީ އެ މަނިކުފާނު އެންމެ ބައްދަލު ކުރައްވަން ބޭނުންފުޅު ވަނީ ޕާކިސްތާނުގެ ބޮޑުވަޒީރު އިމްރާން ޚާން އާއި ކަމަށެވެ. ކްރިކެޓްގެ ތެރެއިން ސިޔާސީ ދާއިރާއަށް އިމްރާން ޚާން ވެންނެވި ގޮތް އެނގިލައްވަން ބޭނުންފުޅުވާ ކަމަށް އިބޫ ވިދާޅުވިއެވެ.
އިބޫ ވިދާޅުވީ މީގެ ދެ އަހަރު ކުރިން އިމްރާން ޚާންއާ ގުޅޭ ގޮތުން ލިޔުއްވާފައިވާ ބައޮގްރަފީ ވިދާޅުވި ކަމަށާއި، ސިޔާސީ މައިދާނަނަށް ނުކުންނެވުނު ގޮތާއި އަމިއްލަފުޅު ދިރިއުޅުން ރޫޅިގެން ދިޔަ ގޮތާއި، ދޫނުކޮށް ސިޔާސީ ދާއިރާއިން ކުރިއަށް ވަޑައިގަތުމަށް އިމްރާން ޚާން ކުރެއްވި މަސައްކަތްޕުޅު އެ ލިޔުމުން އެނގިވަޑައިގެންނެވި ކަމަށް އިބޫ ވަނީ ވިދާޅުވެފައެވެ.
ސިޔާސީ ދާއިރާގައި ހުއްޓުމެއް ނެތި ކުރެއްވި މަސައްކަތްޕުޅުން އިމްރާން ޚާން އަށް ބޮޑުވަޒީރު ކަމަށް ވަޑައިގެންނެވުނީ 22 އަހަރު ފަހުން މި އަހަރުގެ އޮގަސްޓްމަހުގެ 18 ވަނަ ދުވަހުއެވެ.
