ރައްޔިތުންގެ މަޖިލީހުގެ މެމްބަރުންގެ ތާއީދު ހޯދުމަށް މަސައްކަތްކުރުމަކީ ރިޝްވަތު ދިނުން ނޫން ކަމަށާއި، ޖުމްހޫރީ ޕާޓިގެ ލީޑަރު ޤާސިމް އިބްރާހިމްގެ މައްޗަށް ކޮށްފައިވަނީ އަސްލެއް ނެތް ތުހުމަތުތަކެއް ކަމަށް މައިނޯރިޓީ ލީޑަރު އިބްރާހިމް މުހައްމަދު ސޯލިހު (އިބޫ) ވިދާޅުވެއްޖެ އެވެ.
ޖުމްހޫރީ ޕާޓީގެ ލީޑަރު ޤާސިމް އިބްރާހިމް، ކުއްލިގޮތަކަށް ހައްޔަރުކުރުމާއި ގުޅިގެން ރާއްޖެޓީވީއަށް ފޯނުން ދެއްވި އިންޓަވިއުއެއްގައި އެމްޑީޕީ ޕާލިމެންޓްރީ ގްރޫޕުގެ ލީޑަރު އިބްރާހިމް މުހައްމަދު ސޯލިހު ވިދާޅުވީ، ޤާސިމް އިބްރާހިމް ހައްޔަރުކުރުމަށް ނެރިފައިވާ ކޯޓް އަމުރަކީ އެއްވެސް ހަޤީޤަތެއްގެ މައްޗަށް ބިނާވެފައިވާ ކޯޓު އަމުރެއް ނޫން ކަމަށެވެ. އަދި މިނިވަން އިންސާފުވެރި ތަހުޤީޤެއް ހިންގިދާނެކަމާއިމެދު ޝައްކު ކުރައްވާކަމަށް އިބްރާހިމް މުހައްމަދު ސޯލިހު ވިދާޅުވި އެވެ.
އޭނާ ވިދާޅުވީ، ގުޅިފައިވާ ސިޔާސީ ޕާޓީތަކުން މަސައްކަތްކުރީ މަޖިލީހުގެ ރިޔާސަތު ބަދަލުކުރުމަށް ކަމަށާއި، އެކަން ކުރުމަށް ނިންމީ މަޖިލީހުގެ މެމްބަރުންގެ ތާއީދު ހޯދައިގެން ކަމަށެވެ.
"މަޖިލީހުގެ މެމްބަރުންގެ ތާއީދު ހޯދުމަށް މަސައްކަތްކުރުމަކީ ރިޝްވަތެއްކަމަށް އަޅުގަނޑުމެން ގަބޫލެއް ނުކުރަން. އެނގޭތޯ. އެއާއި ހިލަފަށް މިއަދު ސަރުކާރުން ފުލުސް އޮފީސް މެދުވެރިކޮށް އެ ހިންގީ ވޯޓަށް ނުފޫޒު" އިބޫ ވިދާޅުވި އެވެ.
އިބޫ ވިދާޅުވީ، ގުޅިފައިވާ ސިޔާސީ ޕާޓީތަކުން މަސައްކަތް ފެށިއިރު ސަރުކާރުގެ އަނިޔާވެރިކަން އެނގޭ ކަމަށެވެ. އަދި ހަތަރު ލީޑަރު ގުޅިގެން މަސައްކަތްފެށީ ސަރުކާރުގެ އަނިޔާވެރިކަން އެނގިތިބެ އިތުރު ގޮތެއް ނެތިގެންކަމަށް އިބޫ ވިދާޅުވި އެވެ.
"އިރާދަކުރެއްވިޔާ އަޅުގަނޑުމެންގެ މި އިސްލާހީ މަސައްކަތަށް، ހުއްޓުމެއް ނާންނާނެ. ހަމަ ދާނީ ކުރިޔަށް. އެބަހުރި، ވިސްނުންތައް މީގައި ކުރިއަށްދެވޭނެ" އިބްރާހިމް މުހައްމަދު ސޯލިހު ވިދާޅުވި އެވެ.
