ސުޕްރީމް ކޯޓްގެ އަމުރަށް ބޯލަނބަން އީސީއިން އިލްތިމާސްކޮށްފި
4 އޮކްޓޯބަރު 2018 | ބުރާސްފަތި 14:43ސިޔާސީ ޕާޓީތަކުންނާއި ރައްޔިތުންގެ މަޖިލީހުގެ މެންބަރުން ކޯޓުގެ އަމުރާ އެއްގޮތަށް އަމަލުކުރުމަށް އީސީން ވަނީ އިލްތިމާސްކޮށްފައި
ގޮނޑިގެއްލިފައިވާ ކަމަށް ބުނާ މެންބަރުން މަޖިލީހަށް ވަދެވަޑައިގަތުމަށް މަޖިލީހުގެ އިދާރާ ކައިރިއަށް ވަޑައިގަތުމުން ފުލުހުން ބެރިކޭޑް ޖަހައި މުޅި ސަރަހައްދު ބަންދުކޮށްފައި
ބާރަ މެމްބަރުންގެ ގޮނޑި ނުގެއްލޭ ކަމަށް އިލެކްޝަންސް ކޮމިޝަނުން ނިންމި ނިންމުން ސުޕްރީމް ކޯޓުން ބުދަ ދުވަހުގެ ރޭ ނެރުނު އަމުރުން ބާތިލްކޮށްފައި ވާތީ، އެ އަމުރަށް ފުރިހަމަޔަށް ބޯލެބުމަށް އެންމެހާ ސިޔާސީ ޕާޓީތަކަށް އިލެކްޝަން ކޮމިޝަނުން އިލްތިމާސްކޮށްފި އެވެ.
އިލެކްޝަން ކޮމިޝަނުން ނެރުނު ނޫސްބަޔާނުގައި ބުނެފައިވަނީ 3 އޮކްޓޯބަރ 2018 ވަނަ ދުވަހު އިލެކްޝަންސް ކޮމިޝަނުން ބޭއްވި އެ ކޮމިޝަނުގެ 442 ވަނަ ޖަލްސާގައި، މަޖިލީހުގެ 12 މެމްބަަރަކާމެދު ނިންމާފައިވާ ނިންމުންތަކަކީ ބާޠިލް ނިންމުންތަކެއް ކަމަށް ސުޕްރީމް ކޯޓުގެ އަމުރުގައި ކަނޑައަޅާފާތީ އެކޯޓުގެ އަމުރަށް ފުރިހަމައަށް ބޯލަނބާނެ ކަމަށެވެ.
އިލެކްޝަން ކޮމިޝަނުން ބުނީ ސްޕްރީމް ކޯޓު އަމުރުގައިވާ ގޮތަށް އެކަންކަން އެމަގުން ހިންގުމުގައި އިލެކްޝަންސް ކޮމިޝަނުގެ ފުރިހަމަ ތާއީދާއި އެއްބާރުލުން ދިވެހިރާއްޖޭގެ ސްޕްރިމް ކޯޓަށާއި، ދައުލަތުގެ ކަމާބެހޭ ހުރިހާ މުއައްސަސާތަކަށް ދޭނެކަމުގެ ފުރިހަމަ ޔަގީންކަންދޭ ކަމަށެވެ. އަދި ސިޔާސީ ޕާޓީތަކުގެ ބެލެނިވެރި ފަރާތުގެ ހައިސިއްޔަތުން، ހުރިހާ ސިޔާސީ ޕާޓީތަކުންނާއި ރައްޔިތުންގެ މަޖިލީހުގެ މެންބަރުން މި އަމުރަށް ބޯލަނބައި، އަމުރާ އެއްގޮތަށް އަމަލުކުރުމަށް އެކޮމިޝަނުން ވަނީ އިލްތިމާސްކޮށްފައެވެ.
