އިންސާފު ކަށަވަރުކުރެވޭނީ ކޯޓުތައް އިސްލާހްކޮށްގެން: ދިޔާނާ
ދިޔާނާ އެފަދައިން ވިދާޅުވީ ޤާސިމް އިބްރާހިމްގެ ވާހަކަފުޅަކަށް ރައްދުދެއްވަމުން
ކުރީގެ ރައީސް މުހައްމަދު ނަޝީދާއެކު ދިޔާނާ ސައީދު
ރާއްޖޭގައި އިންސާފު ކަށަވަރުކުރެވޭނީ ކޯޓުތައް އިސްލާހް ކޮށްގެން ކަމަށް ވިދާޅުވެ، ޖުމްހޫރީ ޕާޓީގެ ބާނީ ޤާސިމް އިބްރާހިމްގެ ވާހަކަފުޅަށް، ކުރީގެ ބަންޑާރަނައިބް ދިޔާނާ ސައީދު ރައްދުދެއްވައިފި އެވެ.
ބުދަ ދުވަހު ޖުމްހޫރީ ޕާޓީގެ ބާނީ ޤާސިމް އިބްރާހިމް ކުރެއްވި ޓުވީޓެއްގައި އޭނާ ވިދާޅުވީ 12 މެމްބަރުންނަށް މަރުހަބާ އާއި ޝުކުރު ދަންނަވާ ކަމަށެވެ. އަދި އިންސާފުގެ މަޤަށް ބާރަށް ޤައުމުގެ މިސްރާބު ބަދަލުވެގެން އަންނަ މަންޒަރު ބޮޑުކޮށް ފެންނަމުންދާ ކަމަށް ޤާސިމް ވިދާޅުވި އެވެ.
ޤާސިމް ވިދާޅުވީ އެ މަންޒަރު ފެންނަމުންދަނީ ރައްޔިތުން ނިކުމެ ބޮޑު މަންޒަރު ބޮޑުތަނުން ބަދަލުކުރުމުން ކަމަށާއި، ޤާނޫނު އަސާސީ ހިފެހެއްޓޭތީ އިލެކްޝަންސް ކޮމިޝަންގެ މެމްބަރުންނަށް ޝުކުރު ދަންނަވާކަމަށެވެ.
ޤާސިމްގެ އެ ވާހަކަފުޅާ ގުޅުވައި، ދިނާޔާ ވިދާޅުވީ އިންސާފުގެ މަޤަށް ބާރަށް ރާއްޖެ މިސްރާބު ޖަހާފައިވާ މަންޒަރު ނުފެންނަ ކަމަށެވެ. އަދި އަންބޮޑިއަށް އިންސާފު ޖަހައިގެން ވައިޖެހޭ އަތަކަށް ނެގޯޝިއޭޓްކުރުމުން އެތި އެތިކޮޅުން އިންސާފު ދިނުމަކީ އިންސާފުގެ މަޤަށް ޤައުމު ބަދަލުވުން ނޫން ކަމަށެވެ. ދިޔާނާ އިތުރަށް ވިދާޅުވީ ރާއްޖޭގައި އިންސާފު ކަށަވަރުކުރެވޭނީ ކޯޓުތައް އިސްލާހްކޮށްގެންކަމަށެވެ.
ދިޔާނާ އިޝާރަތްކުރައްވާފައިއެވަނީ ކޯޓުތަކުގެ ފަނޑިޔާރުން ހުކުމްތައްކުރައްވާގޮތަށްކަމަށް ބެލެވެ އެވެ.
ކޯޓުތަކުން އަންނަނީ ސިޔާސީ ފަރާތްތަކުގެ މައްޗަށް އިއްވި ހުކުމްތައް ރިވިއު ކޮށް، ސިޔާސީ ބޭފުޅުންތައް މިނިވަން ކުރަމުންނެވެ. އަދިި ބައެއް މައްސަލަތައް ގިނަ ދުވަސްތަކެއްވަންދެން ކޯޓުގައި ތާށިވެފައިހުރިއިރު، އެ މައްސަލަތައް އަލުން ފަށައިގެން އަންނަނީ ކުރިއަށް ގެންދަމުންނެވެ.
