ރައްޔިތުންގެ މަޖިލީހުގެ ރައީސް ޢަބްދުﷲ މަސީހުއަށް އޮތީ ރީތި ގޮތުގައި އަމިއްލައަށް އިސްތިއުފާ ދެއްވުން ކަމަށާއި ނޫނީ އިތުބާރު ނެތް ކަމަށް ނިންމައި މަޖިލީހުގެ ރިޔާސަތުން ބޭރު ކުރައްވާނެ ކަމަށް ގުޅިފައިވާ ޕާޓީތަކުން ބުނެފިއެވެ.

ގުޅިފައިވާ ޕާޓީތަކުން ބުދަ ދުވަހު މ ކުނޫޒްގައި ބޭއްވި ޕްރެސް ކޮންފަރެންސްގައި ވާހަކަ ދައްކަވަމުން ރައްޔިތުންގެ މަޖިލީހުގެ ކިނބިދޫ ދާއިރާގެ މެމްބަރު ޢަބްދުﷲ ރިޔާޒް ވިދާޅުވީ ރައްޔިތުންނަށް ޓަކައި ގުޅިފައިވާ ޕާޓީތަކުން ރައްޔިތުންގެ މަޖިލީހުގެ ތެރެއިން ކުރަންޖެހޭ ވަރަށްގިނަ މަސައްކަތް އެބަހުރި ކަމަށާއި އެކަމަށްޓަކައި މަޖިލީހުގެ މަސައްކަތްތައް ވަރަށް އަވަހަށް ފަށަން ބޭނުންވާ ކަމަށެވެ. އެގޮތުން އެކަން ކުރުމަށްޓަކައި ފުރަތަމަ ވެސް ރައްޔިތުންގެ މަޖިލީހުގެ ރިޔާސަތު ބަދަލު ކުރައްވާނެ ކަމަށާއި މަޖިލީހުގެ ރައީސް ކަމުން އިސްތިއުފާ ދެއްވުން ނޫން ޗޮއިސްއެއް މަސީހުއަކަށް ނެތް ކަމަށެވެ.

ރިޔާޒް ވިދާޅުވީ މަސީހުއަކީ ސިޔާސީ ބޭފުޅެއްކަމަށާއި އިސްތިއުފާ ނުދެއްވައިފިނަމަ ދެންވާނެގޮތް ރަނގަޅަށް އެނގިވަޑައި ގަންނަވާނެ ކަމަށެވެ. އަދި އިސްތިއުފާ ނުދެއްވައިފިނަމަ މަޖިލީހުގެ ޤަވާއިދު ތަކުގެ ތެރެއިން މަސީހުގެ އިތުބާރު ނެތް ކަމަށް ނިންމައި ރައީސް ކަމުން ދުރުކުރައްވާނެ ކަމަށް ރިޔާޒް ވިދާޅުވިއެވެ.

މަޖިލީހުގެ ނައިބު ރައީސް ހުޅުހެންވޭރު ދާއިރާގެ މެމްބަރު މޫސާމަނިކު ހުންނެވީ މަޖިލިސް ފެށުމަށް އެއްބާރުލުން ދެއްވަންކަން ފާހަގަ ކުރައްވަމުން ރިޔާޒް ވިދާޅުވީ މަޖިލީހުގެ މަސައްކަތް ލަސްނުކުރައްވާ ފަށްޓަވާނެ ކަމަށެވެ.

ރިޔާޒް ވިދާޅުވީ މަޖިލީހުގެ މެމްބަރުންގެ ގޮނޑި ގެއްލޭ ގޮތަށް އޮތް އެންޓި ޑިފެކްޝަން ޤާނޫނާއި ނޫސްވެރިން ތަޅުއަޅުވާ އަބުރުގެ ޤާނޫން އުވާލަން ބުރާސްފަތި ދުވަހު މަޖިލީހަށް ވައްދާނެ ކަމަށެވެ. އެއާއެކު ޕީޕީއެމްގައިތިއްބެވި އިސްލާހަށް މަސައްކަތް ކުރައްވަން ބޭނުންފުޅުވާ މެމްބަރުންތަކެއް ގުޅިފައިވާ ޕާޓީތަކާ ގުޅޭނެކަމަށް ވެސް ރިޔާޒް ވިދާޅުވިއެވެ.

މީގެ އިތުރުން ސަރުކާރުން ކޮށްފައިވާ ވައްކަންތަކާއި ހިންގާފައިވާ ކޮރަޕްޝަންތައް މަޖިލީހުގެ ތެރެއިން ބަލަން ފަށްޓަވާނެކަމަށް ވެސް ރިޔާޒް ވިދާޅުވިއެވެ.

މި ޕްރެސް ކޮންފަރެންސްގައި ރައްޔިތުންގެ މަޖިލީހުގެ އައްޑޫ މީދޫ ދާއިރާގެ މެމްބަރު ރޮޒައިނާ އާދަމް ވިދާޅުވީ މަޖިލީހުގެ 12 މެމްބަރުންނާއެކު މަޖިލީހުގެ ތަޅު ނެއްޓުނީ ކަމަށާއި މަޖިލީހުގެ މިނިވަން މުއައްސަސާތަކާ ބެހޭ ކޮމެޓީން ލިބިދޭ ބާރާއެކު ރައީސް ޔާމީން މިނިވަން މުއައްސަސާތަކަށް ފޯރުވާ ނުފޫޒް ހުއްޓުވާލާނެ ކަމަށެވެ.

ގޮނޑި ގެއްލިފައިވާ ކަމަށް އިލެކްޝަންސް ކޮމިޝަނުން ކުރިން ކަނޑައަޅާފައިވާ ތުލުސްދޫ ދާއިރާގެ މެމްބަރު މުހައްމަދު ވަހީދު އިބްރާހީމް (ލޯޔަރު ވައްޑެ) ވިދާޅުވީ ޤާނޫނާ ޚިލާފަށް ކަންކަން ކުރުވުން ދެން ހުއްޓުނީ ކަމަށާއި ސުލްހަވެރިކަމާއެކު މަސީހު އިސްތިއުފާ ނުދެއްވައިފިނަމަ ޤަވާއިދުތަކުގެ ތެރެއިން ބޭރު ކުރައްވާނެ ކަމަށެވެ.

އަދާލަތު ޕާޓީއަށް ނިސްބަތްވެވަޑައިގަންނަވާ ރައްޔިތުންގެ މަޖިލީހުގެ މަކުނުދޫ ދާއިރާގެ މެމްބަރު އަނާރާ ނައީމް ވިދާޅުވީ މިއަދަކީ ވަރަށް އުފާވެރި ދުވަހެއް ކަމަށާއި 12 މެމްބަރުންނެތުމުން އަޑުކެނޑިފައިވާ 60 ހާހަށްވުރެ ގިނަ ރައްޔިތުންގެ ބަސް މަޖިލީހުން އިވޭނޭގޮތް ވެގެން ދިޔައީ ކަމަށެވެ. އަދި ރީތިގޮތަކީ އަމިއްލަފުޅަށް މަސީހު އިސްތިއުފާ ދެއްވުން ކަމަށް އަނާރާ ވިދާޅުވީއެވެ.