އިންތިޚާބީ ދާއިރާތައް ބެހިފައިވާ ގޮތާއި ބެހޭ ގޮތުން ޝަކުވާ ހުށަހަޅަން ހުޅުވާލައިފި
މިހާރު މަޖިލީހުގައި އޮންނަނީ 85 ދާއިރާ
ރައްޔިތުންގެ މަޖިލީހުގެ ޖަލްސާއެއް ކުރިއަށްދަނީ
އަންނަ އަހަރު ބާއްވާ ރައްޔިތުންގެ މަޖިލީހުގެ އިންތިޚާބުގެ އިންތިޚާބީ ދާއިރާތައް ކަނޑައެޅިފައިވާ ގޮތާއި ބެހޭ ގޮތުން ޝަކުވާ ހުށަހަޅަން އިލެކްޝަންސް ކޮމިޝަނުން ފުރުސަތު ހުޅުވާލައިފިއެވެ.
އިލެކްޝަންސް ކޮމިޝަނުން ކޮށްފައިވާ އިއުލާނެއްގައިވަނީ މި އޮކްޓޯބަރު މަހުގެ 21 ވާ އާދިއްތަ ދުވަހުގެ ހަވީރު 3:00ގެ ނިޔަލަށް އިންތިޚާބީ ދާއިރާތައް ކަނޑައަޅާފައިވާ ގޮތުގެ ވަގުތީ ރިޕޯޓާއިމެދު ޝަކުވާ ހުށަހެޅުމުގެ ފުރުސަތު ހުޅުވާލާކަމަށެވެ. ޝަކުވާ ހުށަހެޅޭނީ 21 ވަނަ ދުވަހުގެ ކުރިން ކޮންމެ ދުވަހެއްގެ ހެނދުނު 8:00 އިން ހަވީރު 3:00އަށް އިލެކްޝަންސް ކޮމިޝަންގެ 5 ވަނަ ފަންގިފިލާއިން ކަމަށް އެކޮމިޝަނުން ކުރި އިއުލާނުގައިވެއެވެ. މި ރިޕޯޓް ވަނީ މިހާރު ވަނީ ސަރުކާރުގެ ގެޒެޓްގައި ޝާއިއުކޮށްފައެވެ.
ރައްޔިތުންގެ މަޖިލީހުގައި 85 އިންތިޚާބީ ދާއިރާ ހިމެނޭއިރު، އަންނަ ދައުރުގައި 87 ދާއިރާ ހިމެނޭނެއެވެ. އިލެކްޝަންސް ކޮމިޝަނުން އާއްމުކޮށްފައިވާ އިންތިޚާބީ ދާއިރާތަކާއި ބެހޭ ރިޕޯޓުގައިވާ ގޮތުން ދެ ގޮނޑިއެއް އިތުރުވަނީ ހަމައެކަނި މާލެއަށެވެ. އެހެން ސަރަހައްދެއްގެ އިންތިޚާބީ ދާއިރާތަކަށް ބަދަލު އައިސްފައެއް ނުވެއެވެ. އަލަށް ގެނެވޭ ބަދަލާއިއެކު މާލޭ ސިޓީގެ ދާއިރާތަކުގެ އަދަދު 15 އަށް އިތުރު ވެގެންދާނެއެވެ. އައްޑޫ ސިޓީގައި އިންތިޚާބީ ހަތް ދާއިރާ ހިމެނޭއިރު ފުވައްމުލައް ސިޓީގައި ހިމެނެނީ ތިން ދާއިރާއެވެ. މިއީ 2014 ވަނަ އަހަރު ބޭއްވި ރައްޔިތުންގެ މަޖިލީހުގެ އިންތިޚާބުގައި ވެސް އެ ދެ ސިޓީގައި އިންތިޚާބީ ދާއިރާތައް ބެހިފައިވާ ގޮތެވެ.
މިހާރު އަމަލުކުރަމުން އަންނަ ޤާނޫނު އަސާސީގެ ދަށުން އެންމެ ފުރަތަމަ މަޖިލިސް އިންތިޚާބު ބޭއްވުނީ 2009 ވަނަ އަހަރުގައެވެ. އެއިންތިޚާބުގައި 77 ދާއިރާއެއް ހުރިއިރު، 2014 ވަނަ އަހަރުގެ އިންތިޚާބަށް 85 ދާއިރާ އިތުރުވިއެވެ. އިލެކްޝަންސް ކޮމިޝަނުން މިހާރު އިއުލާންކޮށްފައިވާ ވަގުތީ ރިޕޯޓަށް މާބޮޑު ބަދަލެއް ނާންނަ ނަމަ، 2019 ވަނަ އަހަރުގެ އިންތިޚާބުގައި 87 މެމްބަރުން އިންތިޚާބު ކުރާނެއެވެ.
އައްޑިހަ ފަސް މެމްބަރުންނާއިއެކު ދައުރު ފެށިނަމަވެސް ދައުރު ދެބައިވިފަހުން މަޖިލީހުގެ ރައީސްގެ އިތުބާރު ގެއްލި، މަޖިލީހުގައި ސަރުކާރު ހިންގާ ކޯލިޝަނަށް އޮތް ތާއިދު ގެއްލުމާއިއެކު 12 މެމްބަރެއްގެ ގޮނޑި ގެއްލިފައިވާކަމަށް ބުނެ މަޖިލިސް ތެރޭގައި ބޮޑެތި ހަމަނުޖެހުންތަކެއް ހިނގިއެވެ. އަދި 2017 ވަނަ އަހަރުގެ ކުރީކޮޅުން ފެށިގެން މަޖިލިސް އޮންނަނީ ސިފައިންގެ ބާރުގެ ދަށުގައެވެ.
