އެކްޓިންގ ޕޮލިސް ކޮމިޝަނަރ ނަވާޒު އެންވަޔަރަންމެންޓް މިނިސްޓްރީއަށް ބަދަލުކޮށްފި
2 އޮކްޓޯބަރު 2018 | އަންގާރަ 09:36ޕޮލިސް ކޮމިޝަނަރގެ މަގާމަށް ހަމްދޫން ރަޝީދު ވަނީ މިއަދު އައްޔަން ކުރައްވާފައި
އެކްޓިންގ ކޮމިޝަނަރ އޮފް ޕޮލިސް ކަމުގެ މަގާމުން ދުރު ކުރައްވާ، އެންވަޔަރމެންޓް މިނިސްޓްރީގެ ޑެޕިއުޓީ މިނިސްޓަރުގެ މަގާމަށް އަބްދުﷲ ނަވާޒް އާއި ޕޮލިހުން ބައެއް ވެރިން
އެކްޓިންގ ޕޮލިސް ކޮމިޝަނަރގެ މަގާމުން އަބްދުﷲ ނަވާޒު ވަކިކޮށް، އެންވަޔަރަންމެންޓް މިނިސްޓްރީގެ ޑެޕިއުޓީ މިނިސްޓަރުކަމުގެ މަގާމަށް ބަދަލުކޮށްފި އެވެ.
ޑެޕިއުޓީ ކޮމިޝަނަރ އޮފް ޕޮލިސްގެ މަގާމުގައި ހުންނެވި ނަވާޒް އެކްޓިންގ ކޮމިޝަނަރ އޮފް ޕޮލިސްގެ މަގާމަށް އައްޔަނު ކުރައްވާފައި ވަނީ މިއަހަރުގެ ފެބްރުއަރީ 3 ވަނަ ދުވަހުއެވެ.
ނަވާޒު ފުލުހުންގެ ހިދުމަތުން ވަކި މި ކުރީ، ސެޕްޓެމްބަރު 23 ގައި ބޭއްވި ރިޔާސީ އިންތިޚާބު ރައީސް އަބްދުﷲ ޔާމީނަށް ނާކާމިޔާބުވެފައި ވަނިކޮށެވެ.
އެންވަޔަރަންމެންޓް މިނިސްޓްރީގެ ޑެޕިއުޓީ މިނިސްޓަރުގެ މަގާމަށް ނަވާޒު ބަދަލުކޮށްފައި ވާއިރު، މީގެ ކުރިން ރައީސް އަބްދުﷲ ޔާމީންގެ ވެރިކަމުގައި ފުލުހުންގެ ކޮމިޝަނަރުގެ މަގާމުގައި ހުންނެވި ހުސައިން ވަހީދު އެ މަގާމުން ވަކިކޮށް ބަދަލުކޮށްފައި ވަނީ ހައުސިންގ މިނިސްޓްރީގެ ސްޓޭޓް މިނިސްޓަރުކަމުގެ މަގާމަށެވެ.
