އިންތިހާބުގެ ނަތީޖާއަށް ބަދަލުއަންނަ ވަރުގެ މައްސަލައެއް ދިމާނުވޭ: ޓްރާންސްޕޭރަންސީ
27 ސެޕްޓެމްބަރު 2018 | ބުރާސްފަތި 14:50އިންތިޚާބުގެ ނަތީޖާއާމެދު ޝައްކު އުފައްދާނެ ޖާގައެއްނެތް
ޓްރާސްޕޭރަންސީ މޯލްޑިވްސްގެ މެންބަރުން
މިމަހުގެ 23ގައި ބޭއްވި ރިޔާސީ އިންތިހާބުގެ ނަތީޖާއަށް ބަދަލު އަންނަ ވަރުގެ މައްސަލައެއް ދިމާވެފައިނުވާ ކަމަށް ޓްރާންސްޕޭރެންސީ މޯލްޑިވްސް އިން ބުނެފިއެވެ.
މިނިވަން އިންސާފުވެރި އިންތިޚާބެއް ބޭއްވުމަށް ގޮވާލާ, އިންތިޚާބުގެ ކުރިންނާއި ފަހުން މިނިވަންކަމާއެކު މަސައްކަތް ކުރި ޓްރާންސްޕޭރެންސީގެ ގިނަ އަދަދެއްގެ މޮނީޓަރުން ރާއްޖޭގެ އެކި ކަންކޮޅުތަކުގައި އިންތިޚާބު އޮބްޒާވްކުރުމަށް ވަނީ މަސައްކަތް ކޮށްފައެވެ.
ރިޔާސީ އިންތިޚާބުގެ ނަތީޖާއާ މެދު ޝައްކު އުފައްދާ އިންތިޚާބުގެ ދާއިމީ ނަތީޖާ އިއުލާން ކުރުން ފަސްކުރުމަށް ޕީޕީއެމުން އިލެކްޝަން ކޮމިޝަނަށް ހުށަހަޅާފައިވާތީ ކަންބޮޑުވުންފާޅުކޮށް ޓްރާންސްޕޭރެންސީން ބުނީ އިންތިޚާބުގެ ނަތީޖާއާމެދު ޝައްކު އުފައްދާނެ ޖާގައެއްނެތް ކަމަށެވެ. ޓްރާންސްޕޭރަންސީން ބުނީ އިންތިޚާބުގެ ކުރިން ބައެއް މައްސަލަތައް ދިމާވި ނަމަވެސް އިންތިހާބުގެ ދުވަހު ހުރިހާ ކަމެއްވެސް ދިޔައީ ވަރަށް އޮމާންކަމާއެކު ކަމަށެވެ. އަދި އިންތިޚާބުގެ ނަތީޖާއަށް ބަދަލު އަންނަ ވަރުގެ މައްސަލަތަކެއް ދިމާނުވާ ކަމަށްވެސް ޓްރާންސްޕޭރެންސީ އިން ބުންޏެވެ.
ރިޔާސީ އިންތިހާބުގެ ނަތީޖާ ބާތިލްކުރުމަށް ޕީޕީއެމުން މަސައްކަތްކުރާ ކަމުގެ އަޑުތައް ފެތުރިފައިވަނިކޮށް، ޕީޕީއެމްގެ ޕީޖީ ގުރޫޕުގެ ވައިބާ ގުރޫޕަށް އެޕާޓީގެ ޕީޖީ ލީޑަރު ނިހާން ފޮނުއްވި މެސެޖުތަކެއްގެ ސްކްރީންޝޮޓްތަކެއް ސޯޝަލް މީޑިއާއަށް ވަނީ ލީކް ވެފައެވެ. މި މެސެޖުތަކުގައި ނިހާނު ވިދާޅުވެފައި ވަނީ ވޯޓުލެވޭ މީހުންގެ ގޮތުގައި ގެޒެޓްކުރި ލިސްޓްގައި ނަން އޮވެފައި، ވޯޓުލާން ދިޔަ އިރު، އެހެން ތަނެއްގައި ނަން ރަޖިސްޓްރީކޮށްފައިވާ ކަމުގެ ޝަކުވާ ގިނަ ބަޔަކު ކުރަމުންދާ ކަމަށެވެ. އަދި މެމްބަރުން ނިސްބަތްވާ ދާއިރާތަކުގައި މި ފަދަ މައްސަލަތައް ހުރިތޯ ބަލައި، އެ މައްސަލަތައް ވީހާ ވެސް ޕާޓީއަށް ފޮނުވައިދިނުމަށް ނިހާން ވަނީ އެދިފައެވެ.
މިދިޔަ އާދީއްތަ ދުވަހު ކުރިއަށް ދިޔަ ރިޔާސީ އިންތިހާބުގައި 233،877 ފަރާތަކުން ވަނީ ނިކުމެ ވޯޓްލާފައެވެ. އެ ގޮތުން އިދިކޮޅު ކޯލިޝަންގެ ކެންޑިޑޭޓް އިބްރާހިމް މުހައްމަދު ސޯލިހަށް 134،616 ވޯޓް ލިބުނު އިރު، އެމަނިކުފާނާ ވާދަ ކުރެއްވި ރައީސް އަބްދުﷲ ޔާމީނަށް ލިބިފައި ވަނީ 96،132 ވޯޓެވެ.
