ގާނޫނު ހަދާ މަޖިލީހުގެ އާންމު އިންތިޚާބަށް ނުފޫޒު ފޯރުވަން ޗައިނާއިން މަސައްކަތްކުރާ ކަމަށް ބުނުމުން ރައްޔިތުންނަށް ލިބުނީ ހައިރާންކަން
27 ސެޕްޓެމްބަރު 2018 | ބުރާސްފަތި 14:34ނިމިދިޔަ ރިޔާސީ އިންތިޚާބަށް ރަޝިއާއިން ނުފޫޒު ފޯރުވި ވާހަކަ ނުދައްކަވަނީ ކީއްވެތޯ ރައްޔިތުން ވަނީ ސުވާލް ކޮށްފައި
އެމެރިކާގެ ރައީސް ޑޮނަލްޑް ޓްރަމަޕް
އަންނަ އަހަރުގެ އެމެރިކާގެ ގާނޫނު ހަދާ މަޖިލީހުގެ އާންމު އިންތިޚާބަށް ނުފޫޒު ފޯރުވަން ޗައިނާއިން އުޅޭ ކަމަށް ބުނެ އދ.ގެ ސެކިއުރިޓީ ކައުންސިލް ބައްދަލުވުމުގައި ޓްރަމްޕް ވަނީ ޗައިނާއަށް ވަރަށް ބޮޑަށް ފާޑު ވިދާޅުވެފައެވެ. ނަތީޖާއަކަށްވީ އާންމުންނަށް ބޮޑު ހައިރާންކަމެއް ލިބުމެވެ. ދެ އަހަރުގެ ކުރިން ބޭއްވި އެމެރިކާގެ ރިޔާސީ އިންތިޚާބުގައި ރަޝިއާގެ ނުފޫޒުން ޓްރަމްޕް ހޮވިވަޑައިގަތްކަމުގެ ވާހަކަ ދޮގު ކުރައްވާ، އަންނަން އޮތް އިންތިޚާބަށް ޗައިނާ ނުފޫޒު ފޯރުވަން އުޅޭ ކަމަށް ވިދާޅުވުމުންނެވެ. މިއީ އެމެރިކާގެ އިންތިޚާބަކަށް ޗައިނާއިން ނުފޫޒް ފޯރުވާނެ ކަމަށް ބުނި ފުރަތަމަ ފަހަރެވެ.
ސޯޝަލް މީޑިއާގެ ޕްލެޓްފޯމް ޓްވިޓަރގައި އާންމުން ދަނީ ނުރުހުމުގެ ޝުއޫރުތައް ފާޅު ކުރަމުންނެވެ. އާންމުން ވަނީ ނިމިދިޔަ ރިޔާސީ އިންތިޚާބުގައި ޓްރަމްޕް ކެމްޕެއިންނަށް ކުރި ހޯދަދޭން ރަޝިއާއިން ކޮށްދިން މަސައްކަތުގެ ވާހަކަ ނުދައްކަވަނީ ކީއްވެތޯ ސުވާލު ކުރައްވާފައެވެ.
ޓްރަމްޕް ވިދާޅުވީ އެމެރިކާގެ ވޯލްޑް ޓްރޭޑް ސެންޓަރުގެ މުވައްޒަފުންގެ ވަޒީފާތައް 2001 ވަނަ އަހަރު ގެއްލުމުގެ ޒިންމާ ވެސް ނަގަން ޖެހޭނީ ޗައިނާއިން ކަމަށެވެ. ނަމަވެސް އެކަންތައް ހިނގަން މެދުވެރިވީ އޭރުގެ ސަރުކާރުން އަމަލު ކުރި ގޮތުން ކަމަށާއި އެމަނިކުފާނު ވެރިކަމެއްގައި އެފަދަ ކަމެއް ވިޔަ ނުދޭނޭ ކަމަށެވެ.
ޗައިނާއިން ވަނީ ޓްރަމްޕްގެ ވާހަކަފުޅު ދޮގު ކޮށްފައެވެ. ޗައިނާއަކީ ދުވަހަކުވެސް އެހެން ގައުމެއްގެ ދާޚިލީ ސިޔާސަތުތެރެއަށް ވަދެފައިވާ ގައުމެއްނޫން ކަމަށާއި އެކަން ކުރުމަކީ ޗައިނާގެ ޕޮލިސީއާ ޚިލާފުކަމެއް ކަމަށް އެގައުމުން ބުނެއެވެ. ދެން އަންނަ އެމެރިކާގެ ގާނޫނު ހަދާ މަޖިލީހުގެ އާންމު އިންތިޚާބަށް ނުފޫޒު ފޯރުވުމަށް ޗައިނާއިން އުޅޭ ކަމަށް ބުނި ބުނުން ޗައިނާއިން ވަނީ ވަރަށް ބޮޑަށް ކުށްވެރި ކޮށްފައެވެ.
