ޕީޕީއެމް ލީޑަރޝިޕް ހޯދަން އެމްއާރުއެމުން ކުރަމުންދާ މަސައްކަތާ ދެކޮޅަށް ޗެލެންޖް ކުރަން ތައްޔާރު: ނިހާނު
26 ސެޕްޓެމްބަރު 2018 | ބުދަ 11:47ޕާޓީ ހުއްޓިފައިވާތީ ކަމަށްބުނެ ކޯޓަށް ވަޑައިގެން މިހާރު އެވަނީ ލީޑަރޝިޕް އެކުލަވާލާފައި
ޕީޕީއެމްގެ ލީޑަރޝިޕްގެ ބައެއް ބޭފުޅުން، ނިހާނު (މެދުގައި)
ޕްރޮގްރެސިވް ޕާޓީ އޮފް މޯލްޑިވްސް (ޕީޕީއެމް)ގެ ލީޑަރޝިޕް ހޯދަން މައުމޫން ރިފޯމް މޫވްމަންޓް (އެމްއާރުއެމް)އިން ކުރަމުންދާ މަސައްކަތާ ދެކޮޅަށް ޗެލެންޖް ކުރަން ތައްޔާރު ކަމަށް ޕީޕީއެމް ޕާލަމެންޓްރީ ގްރޫޕްގެ ލީޑަރ އަހުމަދު ނިހާނު ހުސައިންމަނިކު ވިދާޅުވެއްޖެ އެވެ.
އަންގާރަ ދުވަހުގެ ރޭ ދައުލަތުގެ މީޑީއާ ޕީއެސްއެމްގެ "އެންމެ ފުރަތަމަ ގައުމު" ޕްރޮގްރާމްގައި ވާހަކަ ދައްކަވަމުން ނިހާން އެހެން ވިދާޅުވީ ރައީސް މައުމޫންއާއެކު މަސައްކަތް ކުރައްވާ ރައްޔިތުންގެ މަޖިލީހުގެ ތުލުސްދޫ ދާއިރާގެ މެމްބަރު، މުހައްމަދު ވަހީދު އިބްރާހިމްއާއި އެމްއާރުއެމްގެ ބައެއް އިސްވެރިން، ޕީޕީއެމްގެ ކޮންގްރެސް ހުއްޓުވާނެ ކަމަށް ވިދާޅުވެފައި ވަނިކޮށެވެ.
ޕީޕީއެމްއިން އަންނަ ހުކުރު އަދި ހޮނިހިރު ދުވަހު އެޕާޓީގެ ކޮންގްރެސްއެއް ބޭއްވުމަށް ނިންމާފައިވާ ކަމަށް އިއުލާންކޮށްފައި ވާތީ، ޕީޕީއެމްއިން ފިޔަވަޅު އަޅައި ވަކިކޮށްފައިވާ، އެޕާޓީގެ ނައިބު ލީޑަރު ވަހީދު އަންގާރަ ދުވަހު ވިދާޅުވީ، ޕީޕީއެމްގެ އިންތިހާބީ، ލީޑަރޝިޕް ނޫން ފަރާތަކަށް ޕީޕީއެމް ހަވާލުކޮށް ހިންގުމަށް އެެއްވެސް ކޯޓަކުން ހުކުމެއްކޮށްފައި ނުވާ ކަމަށެވެ.
ވަހީދު ވިދާޅުވީ، ޕީޕީއެމްގެ އިންތިޚާބީ ލީޑަރޝިޕަށް ނޭނގި އެއްވެސް ފަރާތަކުން ޕީޕީއެމްގެ ކޮންގްރެސްއެއް ބާއްވަން މަސައްކަތް ކުރާނަމަ އެ ފަރާތްތަކާއިމެދު މަދަނީ އަދި ޖިނާއީ، މައްސަލަ ހުށަހަޅާނެ ކަމަށެެެވެ.
ޕީޕީއެމް އެތެރޭގެ މައްސަލަތައް ދިމާވަން ފެށީ، ޕީޕީއެމްގެ ރައީސް މައުމޫން އަބްދުލްގައްޔޫމާއި ޕާޓީގެ މުސްތަޝާރު އަދި ރައީސް އަބްދުﷲ ޔާމީންއާ ދެމެދު ހިނގާދިޔަ ހިޔާލު ތަފާވުމެއްގެ ތެރެއިންނެވެ. އަދި ސަރުކާރު ހިންގަނީ ޕީޕީއެމްގެ އުސޫލްތަކާއި ރައްޔިތުންގެ އިހުސާސްތަކާއި ދެކޮޅަށް ކަމަށް ރައީސް މައުމޫނާއި އެމަނިކުފާނާއެކު މަސައްކަތް ކުރައްވާ ޕީޕީއެމްގެ މެމްބަރުން ވިދާޅުވަމުން ގެންދަވަމުން ގެންދެވި އެވެ.
ނަމަވެސް ރައީސް މައުމޫނާއި ރައީސް ޔާމީނާ ދެމެދު އޮތް ގުޅުން ގޯސްވެ ޕާޓީ ބައިބައިވުމާ ގުޅިގެން ސިވިލް ކޯޓަށް ހުށައެޅި މައްސަލައެއްގައި އެކޯޓުން ވަނީ ގައުމީ މަޖިލީހުން ވަކި ގޮތެއް އަންގަންދެން މުސްތަޝާރާއި ޕާޓީ ހަވާލުކުރަން ހުކުމް ކޮށްފައެވެ. އަދި ޕާޓީގެ ގައުމީ މަޖިލީހުން ވަނީ އޭގެ ފަހުން ހުރިހާ ބާރެއް ރައީސް ޔާމީނާ ހަވާލު ކޮށްފައެވެ.
ނަމަވެސް އޭރުވެސް މައުމޫނަށް ތާއީދު ކުރާ ފަރާތްތަކުން ވަނީ އެކަން ކޮށްފައިވަނީ އަސާސީ ގަވާއިދާއި ޚިލާފަށް ކަމަށް ބުނެފައެވެ.
