މިނިވަންވެ، މަހުލޫފް ފުވައްމުލަކަށް ވަޑައިގަތުމުން ހޫނު މަރުހަބާއެއް ކިޔައިފި
ގޭ ބަންދުގައި ހުންނެވި މަހްލޫފު އެއްވެސް ޝަރުތަކާއި ނުލައި ދޫކޮށްލާފައި ވަނީ އަންގާރަ ދުވަހު
މިނިވަންވެވަޑައިގެން މަހުލޫފް ކްރިމިނަލް ކޯޓް ސަރަހައްދުގައި
ގަލޮޅު ދެކުނު ދާއިރާގެ މެމްބަރު އަހުމަދު މަހްލޫފް މިނިވަންވެ، ފުވައްމުލަކު ސިޓީއަށް ވަޑައިގަތުމުން ހޫނު މަރުހަބާއެއް ރައްޔިތުން ކިޔައިފި އެވެ.
އޭނާގެ މައްޗަށް އުފުލާފައިވާ ޓެރަރިޒަމްގެ ދައުވާއާ ގުޅިގެން ގޭ ބަންދުގައި ހުންނެވި މަހްލޫފު އެއްވެސް ޝަރުތަކާ ނުލައި ދޫކޮށްލާފައިވަނީ އަންގާރަ ދުވަހު އެވެ.
އޭނާ މިނިވަންވުމާއެކު އަންގާރަ ދުވަހުގެ ރޭ ފުވައްމުލަކަށް ވަޑައިގެންފައިވަނީ ދަރިފުޅު ލައިބާ އަހްމަދު މަހްލޫފު (އެލީ) މާލެ ގެނައުމަށެވެ. ފުވައްމުލަކަށް ވަޑައިގެންނެވުމާއެކު އެއާޕޯޓުން މަހުލޫފަށް އެ ރަށުގެ ރައްޔިތުން ވަނީ ހޫނު މަރުހަބާއެއް ކިޔައިފަ އެވެ. އަދި މަަހުލޫފަށް މަރުހަބާ ކިޔުމަށް ދިގު ސަފުތައް ދަމާލައިފައިވެއެވެ.
ފުވައްމުލަކަކީ މަހުލޫފްގެ އަނބިކަނބަލުން ނަޒްރާ ނަސީމްގެ އުފަން ރަށެވެ.
ގަލޮޅު ދެކުނު ދާއިރާގެ މެމްބަރު އަހުމަދު މަހުލޫފަކީ ނިމިގެންދިޔަ އަހަރުތަކުގައި ގުޅިފައިވާ ޕާޓީތަކުގެ އިއްތިހާދުގައި ބުރަ މަސައްކަތްތަކެއް އަދި އެހާމެ ބޮޑު ގުރުބާނީތަކެއް ވެވަޑައިގެންފައިވާ ބޭފުޅެކެވެ. އެގޮތުން އެތަށް ފަހަރަކު ޖަލަށްލެވި، ބޭއިންސާފު ހުކުމްތަކާއެކު ޖަލުގައި ގިނަ ދުވަސްތަކެއް އޮންނަވަންޖެހިވަޑައިގެންނެވި ބޭފުޅެކެވެ. ނަމަވެސް މަހްލޫފް ވަނީ ޖަލުގައި ހުންނަވައިވެސް، އަދި ގޭ ބަންދުގައި ހުންނަވާވެސް ސާބިތުކަމާއެކު މަސައްކަތްކުރައްވާ، ޤައުމަށް އުޖާލާ ދުވަސްތަކެއް ހޯދައިދެއްވުމަށް ފާހަގަކޮށްލެވޭ ފަދަ މަސައްކަތްތަކެއް ކުރައްވާފަ އެވެ.
އަންގާރަ ދުވަހު މިނިވަންވެވަޑައިގެން ނޫސްވެރިންނާއި ވާހަކަދައްކަވަމުން މަހްލޫފް ވިދާޅުވީ ކޯޓުން މިނިވަން ވުމަކީ އަދި އިންސާފު ލިބިގެންދިއުން ނޫން ކަމަށާއި އިންސާފަށް ކުރަން ޖެހޭ މަސައްކަތް އަދި އޮތީ ކަމަށެވެ. ރިޔާސީ އިންތިހާބުގައި އިބްރާހިމް މުހައްމަދު ސޯލިހަށް ވޯޓު ދިން ހުރިހާ ފަރާތްތަކަށް މަހްލޫފު ވަނީ ތައުރީފުކުރައްވައި ޝުކުރު އަދާ ކުރައްވާފައި އެވެ. ބިރުވެރި ނާމާން ހާލަތެއްގައި މީޑިއާތަކުންކުރި މަސައްކަތައް ވެސް ޝުކުރު އަދާކުރެއްވި އެވެ.
