ސުލްހަވެރި އިންތިޚާބެއްގައި ދިވެހިން ނިންމި ނިންމުމަށް އެމެރިކާއިން މަރުހަބާ ކިޔައިފި
ރައީސް އަބްދުﷲ ޔާމީން އަދިވެސް ބަލި ގަބޫލް ކުރައްވާފައެއްނުވޭ
23 ސެޕްޓެމްބަރގައި ބޭއްވި އިންތިޚާބުގައި ދިވެހިންވަނީ ވޯޓްލުމަށްޓަކައި ހެނދުނު ހެނދުނާ ކިއުހަދާފައި
އާދީއްތަ ދުވަހު ބޭއްވި ރިޔާސީ އިންތިޚާބުގައި، ގައުމުގެ މުސްތަގުބަލު ކަނޑައެޅުމަށްޓަކައި ޑިމޮކްރެޓިކް އުސޫލުން ބަސްބުނެފައިވާތީ އެމެރިކާ ސަރުކާރުން ދިވެހިންނަށް މަރުހަބާ ކިޔައިފިއެވެ.
ވަގުތީ ނަތީޖާ ރަސްމީކޮށް އިއުލާނުކުރުމުގެ ކުރިން އެމެރިކާގެ ސްޓޭޓް ޑިޕާޓްމަންޓުން އާދީއްތަ ދުވަހު ނެރެފައިވާ ބަޔާނުގައި ބުނެފައިވަނީ މީޑިއާއާއި މަދަނީ ޖަމްއިއްޔާތަކުގެ ރިޕޯޓްތަކުން އިދިކޮޅު ކެނޑިޑޭޓް އިންތިޚާބް ކާމިޔާބުކޮށްފައިވާކަން އެނގޭކަމަށެވެ.
އަދި ރައްޔިތުންގެ ނިންމުމަށް އިހުތިރާމްކުރުމަށް ގޮވާލާކަމަށް އެމެރިކާއިންވަނީ ބުނެފައެވެ.
ދުނިޔޭގެ ސަމާލުކަން ހުއްޓިފައި އޮތް ރާއްޖޭގެ ރިޔާސީ އިންތިޚާބުގެ ވަގުތީ ނަތީޖާއިން ދައްކާގޮތުން ގުޅިފައިވާ ސިޔާސީ ޕާޓީތަކުގެ ފަރާތުން ވާދަކުރެއްވި އިބްރާހިމް މުހައްމަދު ސޯލިހްވަނީ 58.3 އިންސައްތަ ވޯޓް ހޯއްދަވާފައެވެ. ދައުލަތުގެ ހުރިހާ ވަސީލަތެއް ބޭނުންކުރައްވައިގެން ކެމްޕޭންކުރައްވަމުން ދެވަނަ ދައުރަކަށް ނުކުންނެވި މިހާރުގެ ރައީސް އަބްދުﷲ ޔާމީން އަބްދުލް ގައްޔޫމަށް ލިބިވަޑައިގެންނެވީ 41.7 އިންސައްތަ ވޯޓެވެ.
