ވިއެޓްނާމްގެ ރައީސް އާލާސްކަންފުޅާ އުޅުއްވުމަށްފަހު އަވަހާރަވެއްޖެ
22 ސެޕްޓެމްބަރު 2018 | ހޮނިހިރު 12:21އަވަހާރަވީ ފަރުވާ ދެމުން ދަނިކޮށް ހުކުރު ދުވަހު
އެ މަނިކުފާނު ރައީސް ކަމަށް ވަޑައިގެންނެވީ 2016 ވަނަ އަހަރު
އަސްކަރީ ހޮސްޕިޓަލެއްގައި ފަރުވާ ދެމުން ދަނިކޮށް ވިއެޓްނާމުގެ ރައީސް ޓްރެން ޑައި ގުއަންގް އަވަހާރަވެއްޖެއެވެ.
ރައީސް ގުއަންގް އަވަހާރަވީ އާލާސްކަންފުޅާ އުޅުއްވާތާ ދުވަސްތަކަކަށްފަހު ހުކުރު ދުވަހުއެވެ. އަދި ވިއެޓްނާމުގެ އިތުރުން ބޭރުން ވެސް ފަރުވާ ހޯއްދަވާފައިވާ ކަމަށް ރިޕޯޓްތައް ބުނެއެވެ.
ގުއަންގަކީ ކޮމިނިއުސްޓް މި ގައުމުގެ ބާރުގަދަ ތިން މީހުންގެ ތެރެއިން އެކެކެވެ. އެމެރިކާގެ ރައީސް ޑޮނާލްޑް ޓްރަމްޕް ފުރަތަމަ ފަހަރަށް ވިއެޓްނާމްއަށް މިދިޔަ އަހަރު ވަޑައިގެންނެވުމުން އިސްތިގުބާލް ދެންނެވީ ގުއަންގެވެ. އަދި އިންޑޮނޭޝިއާގެ ރައީސް މިދިޔަ ހަފްތާގައި އެ ގައުމަށް ވަޑައިގަތުމާއެކު އިސްތިގުބާލަށް ނިކުންނެވީ ވެސް ގުއަންގެވެ.
ނަމަވެސް އޭރު އެބޭފުޅާ ވަނީ ވަރަށް ބޮޑަށް ހިކިފައެވެ. އަދި މޫނު މަތިންވެސް ފެންނަނީ ނުތަނަވަސްކަމެވެ.
ގުއަން އެންމެ ފަހުން ރައްޔިތުންނަށް ފެނިފައި ވަނީ ބުދަދުވަހުއެވެ. އެ ދުވަހު އެމަނިކުފާނު އުޅުއްވީ ޕާޓީގެ ހަރަކާތްތަކުގައެވެ.
އެ މަނިކުފާނު ރައީސް ކަމަށް ވަޑައިގެންނެވީ 2016 ވަނަ އަހަރު އެވެ. ރައީސްކަމަށް ވަޑައިގަތުމުގެ ކުރިން އެބޭފުޅާ އަކީ ޕަބްލިކް ސެކިއުރީ މިނިސްޓަރެވެ. ވިއެޓްނާމުގައި ރައީސް އަދާކުރައްވަނީ ރަމްޒީ ރޯލެކެވެ.
