ވޯޓު ކަރުދާހުގައި އެއްވެސް ކަހަލަ ކެމިކަލެއް ނުހުންނާނެ ކަމަށް ވޯޓް ކަރުދާސް ޗާޕް ކުރި އެމް7 ޕްރިންޓް އިން ބުނެފިއެވެ.
ހުކުރު ދުވަހުގެ ރޭ ރާއްޖެޓީވީއަށް ދެއްވި ފޯނު އިންޓަވިއުއެއްގައި އެމް7ގެ ވެރިޔާ ސައްތާރު ވިދާޅުވީ ސޯޝަލް މީޑިއާގައި އެމް7އާ ބެހޭ ގޮތުން ދައުރުވަމުންދާ ވާހަކަތަކަކީ ދޮގު ވާހަކަތަކެއް ކަމަށެވެ. އަދި އެމް7 އިން ޗާޕް ކުރި ވޯޓު ކަރުދާސްތަކުގައި އެއްވެސް ކަހަލަ ކެމިކަލެއް ނުހުންނާނެ ކަމަށާއި ބޭރު ފަރާތަކުން ގެނައި ކަރުދާސް ނުވަތަ އިންކް ވޯޓު ކަރުދާސްތަކުގައި ބޭނުންކޮށްފައި ނުވާނެ ކަމަށް ވެސް އޭނާ ވިދާޅުވިއެވެ.
"އަޅުގަނޑުމެން މިތަނުން ޗާޕް ކުރި އެއްވެސް އެއްޗެއްގައި އަޅުގަނޑުމެން މިތަނުން ދޫކުރި އެއްވެސް އެއްޗެއްގައި އެކަހަލަ އެއްވެސް ކަމެއް ނީންނާނެ. ކަރުދާހުގައި ފާހަގަ ޖައްސަވާފައި ފުހެވޭނެ ކަމަށް ވިސްނަވާނެކަމެއް ނެތް، އޭތި ނުފޮހެވޭނެކަމުގެ ގެރެންޓީ އަޅުގަނޑު ޕާރސަނަލީ އަރުވަން ހުރިހާ ރައްޔިތުން. އެހެނެއް ނޫން އަޅުގަނޑުމެން މި ކަށަވަރު ކޮށްދެނީ އަޅުގަނޑުމެން އަތުގައި ހުރި ކަރުދާސްތައް އަޅުގަނޑުމެން ހަވާލުކުރީ އެ ފެންވަރުގައި. އަޅުގަނޑުމެން ޤަބޫލެއް ނުކުރަން އިލެކްޝަންސް ކޮމިޝަނުން އެހާ ވަގުތު ކައިރިވެފައި އޮތްވާ، އިތުރު ކަންތައްތަކެއް އޭގެ ތެރެއަށް ވަދެދާނެ ކަމަށް. އަޅުގަނޑުމެން ވަރަށް ޔަޤީންކަންދެން ކަރުދާސް ކަހާލިޔަސް 4 ގަޑިއިރުން ނުވަތަ 15 މިނެޓުން ފޮހެވޭނެ ކަމަކަށް، އަދި އެކަހަލަ ކެމިކަލެއް ދުނިޔޭގައި އުފައްދާފައިވާ ކަމަށް ޤަބޫލެއް ނުކުރަން. އެހެންނަމަވެސް އެ ބޭނުންކުރައްވާ ގަލަމަކީ އެއީ ރަނގަޅު ގަލަމެއް ކަމަށް ޔަޤީން ކުރެއްވީމަ ރަނގަޅުވާނެ، ފޮހެވުނަސް ފޮހެވޭނީ އެ ގަލަމުގެ ސަބަބުން، ދުނިޔޭގައި އެބަހުރި އެކަހަލަ ގަލަން އުފައްދާފައި،" ސައްތާރު ވިދާޅުވިއެވެ.
ސައްތާރު ވިދާޅުވީ އިލްކްޝަންސް ކޮމިޝަނުން ވޯޓް ކަރުދާސްތައް ޗާޕް ކުރަން އެމް7އާ ހަވާލުކުރީ ވަކި ކަންތައްތަކަކަށް ބަލާފައި ކަމަށާއި އެއީ ކްރައިޓީރިއާއެއްގެ ދަށުން މާރކްސް ދެވިފައިވާ ކަންތައް ކަމަށެވެ.
ސައްތާރު ވަނީ ވޯޓް ކަރުދާހުގައި ފާހަގަ ޖެހުމަށް ފަހު އެ ފާހަގަ އެ ވޯޓް ކަރުދާހުން ފޮހެވިގެންނުދާނެ ކަމުގެ "ގެރެންޓީ" ރައްޔިތުންނަށް ދެއްވާފައެވެ.
ވޯޓް ކަރުދާސް ޗާޕް ކުރުމަށް ކަރުދާސް ގެނެސްފައި ވަނީ އޮސްޓްރޭލިއާގެ ޕަބްލިކް ކުންފުންޏަކުންކަން ފާހަގަކުރައްވާ ސައްތާރު ވިދާޅުވީ އިލެކްޝަން ކޮމިޝަންގެ ބިޑް ޑޮކިއުމަންޓްގައި އިން ވަރަށް ވުރެ ގިނަ ސެކިއުރިޓީ ފީޗާޒް އެ ވޯޓް ކަރުދާހުގައި ހުންނާނެ ކަމަށެވެ.
ވޯޓް ކަރުދާސް އިތުރަށް ޕްރިންޓްކޮށްފައި ނުވާނެ ކަމަށް ވިދާޅުވެ ސައްތާރު ވަނީ އެވާހަކަ ތަކުރާރު ކުރައްވާފައެވެ.
"ދެ ލައްކަ ފަސްދޮޅަސް ހަތަރު ހާސް ހަތް ސަތޭކަ ފަންސާސް ހަޔެއް، އޭގެ މާނައަކީ 10،590 ފޮތާއި ވަކިން އިން 6 ގަނޑު، މީގެ އިތުރަކަށް އިލެކްޝަންސް ކޮމިޝަނަކަށް ކަރުދާސްތަކެއް ހަވާލުކޮށްފައި ނުވާނެ ކަމަށް އަޅުގަނޑު ރައްޔިތުންނަށް އެމް7ގެ ފަރާތުން ޔަޤީންކަން އަރުވަން،" ސައްތާރު ވިދާޅުވިއެވެ.
އިލެކްޝަންސް ކޮމިޝަނުން ސެޕްޓެމްބަރު 19 ވަނަ ދުވަހު ކޮށްފައިވާ އިއުލާނެއްގައި ވަނީ ރިޔާސީ އިންތިޚާބަށް 264,756 (ދެލައްކަ ފަސްދޮޅަސް ހަތަރު ހާސް ހަތްސަތޭކަ ފަންސާސް ހައެއް) ވޯޓު ކަރުދާސްކޮޅު ޗާޕުކޮށްފައިވާ ކަމަށެވެ. އަދި ވޯޓު ލުމުގެ ހައްގު ލިބިގެންވާ މީހުންގެ އަދަދަށް ވުރެ އިތުރަށް 2621 ވޯޓު ކަރުދާސް ޗާޕުކޮށްފައިވާ ކަމަށް އެ ކޮމިޝަނުން ވަނީ ކުރިން ބުނެފައެވެ.
