ސިއްރު ފެންފުށި ރިސޯޓްގައި ހުރި ބުދުތައް ފުލުހުން ނަގައިފި
21 ސެޕްޓެމްބަރު 2018 | ހުކުރު 13:55މި ގެލަރީ ހުންނަނީ ސިއްރު ފެންފުށީގެ ފަޅުތެރޭގައި
ސިއްރު ފެންފުށި ރިސޯޓުގައި ހުރި ބުދުތައް ފުލުހުން ނަގަނީ
ސިއްރު ފެންފުށީގައި ހަދާފައިވާ ކޮރަލޭރިއަމްގައި ހުރި ބުދުތައް ފުލުހުން މިއަދު ހަވީރު 05:45 ގައި ފުލުހުން ނަގައިފިއެވެ.
ސިވިލް ކޯޓުން ބުރާސްފަތި ދުވަހު ވަނީ ސިއްރު ފެންފުށި ރިސޯޓު ހިންގަމުންދާ ކުންފުނީގެ މައްޗަށް އެ ބުދުތައް ނެގުމަށް ފަސް ގަޑި އިރުގެ މުއްދަތެއް ދީފައެވެ. އަދި އެ މުއްދަތުގެ ތެރޭގައި އެ ބުދުތައް ނުނަގައިފިނަމަ ފުލުހުންނާއި ސިފައިން ނުކުމެ އެ ބުދުތައް ނަގާނެ ކަމަށް ފުލުހުން ވަނީ ބުނެފައެވެ.
ސިއްރު ފެންފުށީގައި ބުދު ބަހައްޓައިގެން ހަދާފައިވާ ކޮރަލޭރިއަމްގެ މައްސަލަ ހޫނުވެ ބުދުތައް ނަގާފައިވަނީ އެ މައްސަލާގައި އިލުމުވެރިންގެ ފާޑު ކިއުންތައް ވެސް އަމާޒު ވެފައިވަނިކޮށެވެ. ބުދުތައް ބެހެއްޓި މައްސަލާގައި ސަރުކާރަށް ވެސް އެތައް ފާޑު ކިއުމެއް އަމާޒުވެފައިވެއެވެ.
މޫސުމަށް އަންނަ ބަދަލުތަކާއި ކަނޑުގެ ލޮނުގަނޑުގެ އުފުލުން ދައްކުވައިދޭ ގޮތަށް އެ ރިސޯޓުން ހެދި ކަނޑުއަޑީގެ ގެލަރީގައި އިންސާނުންގެ ސޫރަ ފެންނަ ގޮތަށް ހަދާފައިވާ ބުދުތަކެއް ބެހެއްޓި މައްސަލަ ފެންމަތިވީ މިއަހަރުގެ ޖުލައި މަހުގެ ކުރީކޮޅުގައެވެ. އެކަމާ ގުޅިގެން ރައީސް އަބްދުﷲ ޔާމީންގެ އަބްދުލްގައްޔޫމްގެ އެންގެވުމަށް ޖުލައި 28 ވަނަ ދުވަހު ޓޫރިޒަމް މިނިސްޓްރީން ވަނީ އެ ބުދުތައް ނަގަން ސިއްރު ފެންފުއްޓަށް އަންގައި ސިޓީއެއް ފޮނުވައިފައެވެ.
އިނގިރޭސިވިލާތަށް ނިސްބަތްވާ މަޝްހޫރު ނެޗުރަލިސްޓް އަދި އާޓިސްޓެއް ކަމަށްވާ ޖޭސަން ޑިކެއާސް އުފެއްދި މި ގެލަރީ ހުންނަނީ ސިއްރު ފެންފުށީގެ ފަޅުތެރޭގައި ކަމަށް ވާއިރު މޫދުގެ ދިރުންތަކާއި އިންސާނުންނާ އޮތް ގުޅުން މިތަނުގައި ދައްކުވައިދީފައި ވަނީ އިންސާނުންނާ ވައްތަރު ގޮތަށް ހަދާފައި ހުރި ބުދުތަކާއި އަދި ހަރުކޮށްފައިވާ މުރަކަތަކުންނެވެ.
ހަ މީޓަރު ހުންނަ ދަގަނޑު ކޮށްޓެއްގެ ގޮތަށް ތައްޔާރުކޮށްފައިވާ މި ކޮރަލޭރިއަމްގެ ތަންތަންގަނޑު ކަނޑައިގެން، ފެނާއި ވައި ދައުރު ވާނެ ގޮތަށް ވަނީ ހަދާފައެވެ. މި ކޮށީގެ ބޮޑުބައި ހުންނަނީ ފެނުން މަތީގައެވެ.
