ހައުސިންގ އާ ގުޅިގެން އާންމު ފަރުދުން އެޗްޑީސީއަށް ދައްކަވަން ހުރި ޖޫރިމަނާ މާފުކޮށްފީއެވެ.

ހައުސިންގ ޑިވެލޮޕްމެންޓް ކޯޕަރޭޝަން (އެޗްޑީސީ) އިން ބުނީ ފައިސާ ނުދެއްކެވި ގިނަ ދުވަސް ވުމުގެ ސަބަބުން ދިގު މުއްދަތަށް އަރާފައިވާ ޖޫރިމަނާ އާންމު ފަރާތްތަކަށް މާފުކޮށްދީފައިވާއިރު އެފަދަ ގޮތަކަށް މާފުކޮށްދިނުމަށް ނިންމީ ހުޅުމާލޭގައި ދިރިއުޅޭ ފަރާތްތަކަށް ލުއި ފަސޭހަ ގޮތްތަކެއް ސަރުކާރުގެ ވިސްނުމާ އެއްގޮތަށް ފަހި ކޮށްދިނުން ކަމަށެވެ.

މި ނިންމުމަކީ ސަރުކާރުގެ ޕޮލިސީގެ ތެރެއިން ރައްޔިތުންނަށް ލިބެން ހުރި ފަސޭހަތައް ދެނެގަނެ، ރައްޔިތުންނަށް ފުދުންތެރި ދިރިއުޅުމެއް އުޅުމަށް މަގުފަހި ކޮށްދިނުމަށްޓަކައި ސަރުކާރުގެ ލަފާއާއެކު އެކަށައެޅިފައިވާ ނިންމުމެއް ކަމަށް އެކޮމިޝަނުން ބުނެއެވެ.

މީގެ ސަބަބުން ތަފާތު ދަތިތައް މެދުވެރިވެގެން ފައިސާ ނުދެއްކެވި އަރާފައިވާ ޖޫރިމަނާ އާއި އެފަދަ ރައްޔިތުންނަށް މާފު ކުރެވި ބާކީ ދައްކަން ހުރި ފައިސާ ދެއްކޭނެ ފަސޭހަ އިންތިޒާމް ތަކެއް ހަމަޖެހިގެންދާނެ ކަމަށް އެޗްޑީސީން ބުނެއެވެ.

އެޗްޑީސީން ޖޫރިމަނާ މާފުކޮށްފައިވާ އިރު މާފުކޮށްފައިވަނީ ކިހާ އަދަދެއް ކަން ހާމަކޮށްފައެއް ނުވެއެވެ.