ޖިނާއީ އަދުލާ ބެހޭ ގޮތުން އުއްތަމަ ފަނޑިޔާރާ މަޝްވަރާކުރެއްވުމަށް ޝަމީމް ހުށަހަޅުއްވައިފި
20 ސެޕްޓެމްބަރު 2018 | ބުރާސްފަތި 08:07ޝަމީމް އެކަމަށް އެޕޮއިންޓްމަންޓްއަކަށް އެދިވަޑައިގެން ވަނީ ސިޓީއެއް ފޮނުއްވާފައި
ކުރީގެ ޑެޕިއުޓީ ޕީޖީ ހުސައިން ޝަމީމް
ޖިނާއީ އަދުލުގެ ނިޒާމުގައި ހުރި މައްސަލަތަކުގެ ތެރެއިން ކަންބޮޑުވާ ބައެއް ކަންކަމާ ބެހޭ ގޮތުން ދިވެހިރާއްޖޭގެ އުއްތަމަ ފަނޑިޔާރު ޑރ. އަހުމަދު އަބްދުﷲ ދީދީ އާއި މަޝްވަރާ ކުރުމަށް ކުރީގެ ޑެޕިއުޓީ ޕްރޮސެކިއުޓާ ޖެނެރަލް ހުސައިން ޝަމީމް އެދިވަޑައިގެންފިއެވެ.
އުއްތަމަ ފަނޑިޔާރު، ޑރ. އަހުމަދު އަބްދުﷲ ދީދީއަށް، ހުސައިން ޝަމީމް ބުރާސްފަތި ދުވަހު ފޮނުއްވެވި ސިޓީގައި ވިދާޅުވެފައި ވަނީ ހުސައިން ޝަމީމުގެ ވަކާލާތުކުރުމުގެ ހުއްދަ މިމަހުގެ 13 ވަނަ ދުވަހުން ފެށިގެން ސަސްޕެންޑް ކުރެވިފައިވާ މައްސަލަ އާއި ޖިނާއީ އަދުލުގެ ނިޒާމުގައި ހުރި މައްސަލަތަކުގެ ތެރެއިން ކަންބޮޑުވާ ބައެއް ކަންކަން ހިއްސާކުރައްވަން ބޭނުންވާ ކަމަށެވެ.
ހުސައިން ޝަމީމަކީ ދިވެހިރާއްޖޭގައި ވަކާލާތުކުރުމުގެ ހުއްދަ އާއި ދިވެހިރާއްޖޭގެ ސުޕްރީމް ކޯޓުގައި ވަކާލާތުކުރުމުގެ ހުއްދަ ވެސް އޮންނަ ފަރާތެއްކަން އެ ސިޓީގައި ފަހަގަކުރައްވާފައި ވެއެވެ.
މިމަހުގެ 13 ވަނަ ދުވަހު ހުސައިން ޝަމީމް ތިން މަސް ދުވަހަށް ސަސްޕެންޑްކޮށްފައި ވަނީ ސްޕްރީމް ކޯޓުގެ ފަނޑިޔާރުންގެ މަޖިލީހުންނެވެ.
ޑިޕާޓުމެންޓް އޮފް ޖުޑިޝަލް އެޑްމިނިސްޓްރޭޝަނުން މީގެ ކުރިން ކުރި އިއުލާނެއްގައި ބުނެފައިވާ ގޮތުގައި ޝަމީމް ސަސްޕެންޑުކޮށްފައި ވަނީ ޝަމީމްގެ ނަމުގައި ހިންގަމުން ގެންދާ ޓްވިޓަރ އެކައުންޓަކުން ޖުޑިޝަރީއާ ބެހޭ ގޮތުން ކޮށްފައިވާ ޓްވީޓަކާ ގުޅިގެންނެވެ. ޝަމީމް ސަސްޕެންޑުކޮށްފައި ވަނީ އެ ޓްވީޓުގައި ދިވެހިރާއްޖޭގެ ގާނޫނީ ވަކީލުންނާ ބެހޭ ގަވާއިދާ ހިލާފުވި ކަމަށް ބުނެއެވެ. ނަމަވެސް ޝަމީމް އެ ގަވާއިދާ ހިލާފުވެ ކުރައްވާފައި ވަނީ ކޮން ޓްވީޓެއްކަން ޖުޑިޝަލް އެޑްމިނިސްޓްރޭޝަންގެ ބަޔާނުގައި ބުނެފައެއް ނުވެއެވެ.
