ވޯޓު ކަރުދާސް ޗާޕު ކުރީ އެމްސެވަންއިން، އިތުރަށް ޗާޕު ކުރީ 2600 ވޯޓު ކަރުދާސް!
19 ސެޕްޓެމްބަރު 2018 | ބުދަ 16:12ޗާޕު ކުރި ކަރުދާހުގެ ޖުމްލަ އަދަދަކީ 264,756
އިންތިހާބެއްގައި އިލެކްޝަންސް ކޮމިޝަނުން ބޭނުންކުރި ވޯޓު ކަރުދާސް
އަންނަ އާދީއްތަ ދުވަހު ބޭއްވުމަށް ހަމަޖެހިފައިވާ ރިޔާސީ އިންތިޚާބުގެ ވޯޓު ނެގުމަށްޓަކާ ތައްޔާރުކޮށްފައިވާ ވޯޓު ކަރުދާސް ޗާޕުކޮށްފިއެވެ.
އިލެކްޝަންސް ކޮމިޝަނުން ބުދަ ދުވަހު ކޮށްފައިވާ އިއުލާނެއްގައި ވަނީ އަންނަ އާދިއްތަ ދުވަހު ބާއްވާ ރިޔާސީ އިންތިޚާބަށް 264,756 (ދެލައްކަ ފަސްދޮޅަސް ހަތަރުހާސް ހަތްސަތޭކަ ފަންސާސް ހައެއް) ވޯޓު ކަރުދާސްކޮޅު ޗާޕުކޮށްފައިވާ ކަމަށެވެ.
ވޯޓު ލުމުގެ ހައްގު ލިބިގެންވާ މީހުންގެ އަދަދަށް ވުރެ އިތުރަށް 2621 ވޯޓު ކަރުދާސް ޗާޕުކޮށްފައިވެއެވެ. އަންނަ އާދީއްތަ ދުވަހު ބާއްވާ ރިޔާސީ އިންތިހާބުގައި ވޯޓުލުމުގެ ހައްގު ލިބިގެން ވަނީ 262,135 މީހުންނަށެވެ.
ކޮމިޝަނުން ބުނީ ވޯޓު ކަރުދާސް ޗާޕުކޮށްފައި ވަނީ ދިވެހިރާއްޖޭގެ ޗާޕްޚާނާއެއް ކަމުގައިވާ އެމްސެވަން ޕްރިންޓަރސްއިން ކަމަށެވެ.
އިންތިޚާބުތަކާ ބެހޭ އާންމު ޤާނޫނުގެ 36 ވަނަ މާއްދާގެ (ށ) ގައިވާ ގޮތުގެ މަތީން، ވޯޓު ކަރުދާސް ޗާޕުކުރި އަދަދާއި ޗާޕުކުރިތަން އާއްމުކޮށް އިއުލާން ކުރަންޖެހެއެވެ.
ރިޔާސީ އިންތިޚާބުގައި ވާދަ ކުރައްވަނީ ސަރުކާރުން ހިންގާ ޕީޕީއެމްގެ ރިޔާސީ ކެންޑިޑޭޓް ރައީސް އަބްދުﷲ ޔާމީން އަބްދުގައްޔޫމާއި ގުޅިފައިވާ ސިޔާސީ ޕާޓީތަކުގެ ކެންޑިޑޭޓް އިބްރާހީމް މުހައްމަދު ސޯލިހު (އިބޫ)އެވެ.
