ހުކުމް ތަންފީޒުކޮށް ނިމުމުން ވެސް ރިޔާޒު މިނިވަން ނުކުރުމުން ހެބިއަސް ކޯޕިއަސް އަމުރަކަށް އެދި ހުށަހަޅައިފި
ރިޔާޒަށް އިއްވި ހުކުމް ތަންފީޒުކޮށް މިމަހުގެ 15 ވަނަ ދުވަހު ވަނީ ނިމިފަ
ރައްޔިތުންގެ މަޖިލީހުގެ ކިނބިދޫ ދާއިރާގެ މެންބަރު އަބްދުﷲ ރިޔާޒު
ރައްޔިތުންގެ މަޖިލީހުގެ ކިނބިދޫ ދާއިރާގެ މެންބަރު އަބްދުﷲ ރިޔާޒުގެ މައްޗަށް އިއްވި ހުކުމް ތަންފީޒުކޮށް ނިމުމުން ވެސް އޭނާ މިނިވަންކޮށްފައިނުވާތީ، ހެބިއަސް ކޯޕިއަސް އަމުރެއް ނެރެދެއްވުމަށް އެދި ކްރިމިނަލް ކޯޓަށް އޭނާގެ ވަކީލުން ހުށަހަޅުއްވައިފިއެވެ.
ހެބިއަސް ކޯޕިއަސް އަމުރެއް ނެރެދެއްވުމަށް އެދި ކްރިމިނަލް ކޯޓަށް ރިޔާޒުގެ ވަކީލުން ބުދަ ދުވަހު ހުށަހެޅުއްވި މައްސަލަ އެ ކޯޓުން ވަނީ ބަލައިގެންފައެވެ.
ހޭބިއަސް ކޯޕަސް އަކީ ބަންދުގައި ހުންނަ މީހަކު ގާޒީއެއްގެ ކުރިފުޅުމައްޗަށް ހާޒިރު ކުރުމަށް ނެރޭ އަމުރެކެވެ. އާންމުކޮށް މި އަމުރު ނެރެނީ ބަންދުގައި ހުރި މީހާ، ބަންދުގައި ބަހައްޓަންޖެހޭ ޤާނޫނީ ސަބަބުތަކެއް ނެތްނަމަ އޭނާ ދޫކޮށްލުމަށެވެ.
ރިޔާޒުގެ ވަކީލު ނޫރުއްސަލާމް އަބޫބަކުރު ވިދާޅުވީ ރިޔާޒުގެ މައްޗަށް މިއަހަރުގެ އޭޕްރީލް 24 ވަނަ ދުވަހު ކޮށްފައިވާ ހަތަރު މަހާއި 24 ދުވަހުގެ ޖަލު ހުކުމް ތަންފީޒުކޮށް މިމަހުގެ 15 ވަނަ ދުވަހު ނިމިފައިވާ ކަމަށާއި ބަންދުން ދޫނުކޮށް ޖަލު ބަންދުގައި ގެންގުޅެމުން މިހާރު ދަނީ ގާނޫނާ ޚިލާފަށް ކަމަށެވެ.
"އަޅުގަނޑުމެން އުންމީދު ކުރަމުން މިދަނީ އިންތިހާބުގެ ކުރިން ރިޔާޒު މިނިވަންކުރުމަށް ކްރިމިނަލް ކޯޓުން އަމުރު ކުރައްވާނެ ކަމަށް،" ނޫރުއްސަލާމް ވިދާޅުވިއެވެ.
ކުރިން ފުލުހުންގެ ކޮމިޝަނަރުގެ މަގާމު ވެސް އަދާކުރެއްވި ރިޔާޒު ޖަލަށް ލުމަށް ހުކުމް ކޮށްފައިވަނީ، އޭނާގެ ފޯނު ހުޅުވައިނުދިން ކަމަށް ބުނެ ދައުލަތުން އުފުލި ގާނޫނު ތަންފީޒުކުރާ މުވައްޒަފަކަށް ހުރަސް އެޅުމުގެ ދައުވާގައެވެ. އެ މައްސަލަ އޭނާގެ މައްޗަށް ސާބިތުނުވާ ކަމަށް ކްރިމިނަލް ކޯޓުން ނިންމާފައިވަނިކޮށް، ދައުވާ ސާބިތުވާ ކަމަށް ކަނޑައަޅައި ހަތަރު މަހާއި ދުވަހަށް ޖަލަށް ލުމަށް ހުކުމް ކުރީ ހައި ކޯޓުންނެވެ.
ރިޔާޒުގެ މައްޗަށް ކުރި ހުކުމް ސުޕްރީމް ކޯޓުގައި އިސްތިއުނާފު ކުރިއިރު، އެ ކޯޓުން ވަނީ ހުކުމް ތަންފީޒުކޮށް ނިމެން 72 ގަޑިއިރަށް ވެފައިވަނިކޮށް މައްސަލަ ބަލައިނުގަތުމަށް ނިންމާފައެވެ.
