މިނިސްޓަރު މުއިއްޒު ވެސް ހާޑިންގހަމްއާ އެކު!
19 ސެޕްޓެމްބަރު 2018 | ބުދަ 10:22ފޮޓޯގައި ތިއްބެވި ބޭފޫޅުންގެ ތެރޭގައި މަޝްހޫރު ޑީއޯ ސައްޕެ ވެސް ހިމެނޭ
ފެހިކުލައިން ފާހަކުރެވިފައި ޑރ. މުހައްމަދު މުއިއްޒު
ސަރުކާރުން އެ މީހަކަށް ފާޑު ކިޔަމުންދާ އިނގިރޭސިވިލާތުގެ ރިފޯމިސްޓް އަދި ވިޔަފާރިވެރިޔާ ޑޭވިޑް ހާޑިންގހަމްއާ އެކު ހައުސިންގ މިނިސްޓަރ މުހައްމަދު މުއިއްޒު ނަންގަވާފައިވާ ފޮޓޯއެއް އާއްމުވެއްޖެއެވެ.
އެ ފޮޓޯއަކީ ހާޑިންގހަމްއާ އެކު ދިވެހިންގެ ބަޔަކު ޑިމޮކްރަސީއާ ބެހޭ މަޝްވަރާތަކެއް ކުރުމަށް 2007 ވަނަ އަހަރު ލަންޑަންގައި ބޭއްވި ބައްދަލުވުމަކަށް ފަހު ނަގާފައިވާ ފޮޓޯއެެވެ.
ނޯތު ލަންޑަންގެ މާޓިން ޖޫނިއަރ ސްކޫލްގައި ބާއްވާފައިވާ އެ ބައްދަލުވުން ބާއްވާފައި ވަނީ 2007 ވަނަ އަހަރުގެ މެއި މަހުގެ 5 ވަނަ ދުވަހުގެ ހަވީރު 4:00 އާއި 6:00 އާ ދެމެދުއެވެ.
މޯލްޑިވިއަން ޑެމޮކްރެޓިކް ޕާޓީގެ ވެރިކަމުގައި ހާޑިންގހަމް ވަނީ ސެލިސްބަރީގައި ހުންނަވާ ރާއްޖޭގެ އޮނަރަރީ ކޮންސުލްގެ މަގާމު ފުރުއްވާފައެވެ.
ސަރުކާރަށް ތާއީދުކުރާ ފަރާތްތަކުން އޭނާ އާއި އިދިކޮޅު ފަރާތްތަކާ ގުޅުވައި އެކިއެކި ތުހުމަތުތައް ކުރަމުން ގެންދެއެވެ. އެގޮތުން ރާއްޖޭގައި ނަސޯރާ ދިން ފެތުރުމަށް މަސައްކަތްކުރާ ކަމަށް ތުހުމަތުކުރެއެވެ.
އިދިކޮޅު ފަރާތްތަކުން ބޭރުގެ ފަރާތްތަކާ ގުޅިގެން ރާއްޖެއަށް އެހެން ދީންތައް ގެނެސް އިސްތިގުލާލު ނަގާލަން މަސައްކަތްކުރާ ކަމަށް، އަދާލަތު ޕާޓީގައި ކުރިން މަސައްކަތްކުރައްވާފައިވާ މިނިސްޓަރ މުއިއްޒު ވެސް ތުހުމަތުކުރައްވައެވެ.
