އަތޮޅު ތެރެއިން ގެނައި މީހުންނާ އެކު ޕީޕީއެމްގެ ސައިޒު ދައްކާލާ ޖަލްސާ ބާއްވައިފި

ރާއްޖޭގެ އެކި ކަންކޮޅުތަކުން މީހުން ގެނެސްގެން ވެރިކަންކުރާ ޕާޓީ ޕްރޮގްރެސިވް ޕާޓީ (ޕީޕީއެމް) އިން މާލޭގައި ޖަލްސާއެއް ބާއްވައިފިއެވެ.

ގިނަ އަދަދެއްގެ ބަޔަކާ އެކު ޕީޕީއެމް އިން މި ޖަލްސާ ބާއްވާފައި ވަނީ މާފަންނު ސްޓޭޑިއަމް ސަރަހައްދުގައެވެ. ޕީޕީއެމްގެ އަސްލު ސައިޒު ދައްކާލުމަށް ބޮޑު ޖަލްސާއެއް ބާއްވާނެ ކަމަށް ޕީޕީއެމް އިން އިއުލާންކުރީ މިދިޔަ މަހުގެ ފަހުކޮޅު ފާއިތުވި 3 އަހަރުތެރޭ ފުރަތަމަ ފަހަރަށް އިދިކޮޅު ފަރާތްތަކަށް ބޮޑު ޖަލްސާއެއް ބާއްވާނެ ތަނެއް ސަރުކާރުން ދިނުމުން ގުޅިފައިވާ ޕާޓީތަކުން ބޭއްވި ޖަލްސާއަށް އެތައް ހާސް ބަޔަކު ދިޔުމާ ވިދިގެންނެވެ.

ޕީޕީއެމް އިން އެކި ރަށްރަށުން ޗާޓަރު ފްލައިޓްތަކުގައި މީހުން ގެނެސްގެން ބޭއްވި ޖަލްސާގައި ބައިވެރިވި މީހުންގެ އަސްލު އަދަދާ މެދު ސުވާލު އުފެދިފައިވާއިރު، ޖަލްސާގައި ބައިވެރިވި މީހުންގެ އަދަދާ މެދު ޖަލްސާގައި ވާހަކަ ދެއްކެވި ބޭފުޅުން ވިދާޅުވި އަދަދުތަކުގައި ވެސް ވިއްސަކަށް ހާހުގެ ތަފާތު ހުއްޓެވެ. އެގޮތުން ޖަލްސާގެ ކުރިން ޕީޕީއެމްގެ ޕީޖީ ލީޑަރު އަހްމަދު ނިހާން ހުސައިން މަނިކު ވިދާޅުވެފައި ވަނީ ޖަލްސާގައި ޖަހާނީ 20،000 ގޮނޑި ކަމަށެވެ. ނަމަވެސް ޖަލްސާ ފެށުނު އިރު އިއުލާނުކުރީ 35،000 ކަމަށެވެ. އަދި ޖަލްސާގެ މެދުތެރެއިން ޖަލްސާގައި 25،000 މީހުން ތިބި ކަމަށް ބުންޏެވެ. އޭގެ އިރުކޮޅެއް ފަހުން 30،000 މީހުން ތިބި ކަމަށް އިއުލާނުކުރި އިރު ޕީޕީއެމްގެ ނާއިބު ލީޑަރު، ފޮނަދޫ ދާއިރާގެ މެންބަރު އަބްދުއްރަހީމް އަބްދުﷲ ވިދާޅުވީ ޖަލްސާގައި 50،000 މީހުން ބައިވެރިވާ ކަމަށެވެ.

އިދިކޮޅު ފަރާތްތަކުން ބުނީ އެޕާޓީތަކުން މާލެ އާއި މާލެ ކައިރި ބައެއް ރަށްރަށުން މީހުން އައިސްގެން ބޭއްވި ޖަލްސާ އަށް ވުރެ ޕީޕީއެމް އިން މުޅި ރާއްޖެ އިން މީހުން ގެނެސްގެން ބޭއްވި ޖަލްސާއަށް ދިޔަ މީހުންގެ އަދަދު މަދު ކަމަށެވެ.

ސައިޒް ދައްކާލަން ޕީޕީއެމް އިން ބޭއްވި ޖަލްސާގައި ރައީސް ޔާމީން ވާހަކަ ދައްކަވަނީ

މީގެ އިތުރުން މި ޖަލްސާއަށް ސަރުކާރުގެ އޮފީސްތަކާއި ކުންފުނިތަކުގެ މުވައްޒަފުން ގެންގޮސްފައިވާއިރު، ބިދޭސީން ވެސް ކޮންމެވެސް ވަރަކަށް ގޮސްފައިވާ މަންޒަރު ސޯޝަލް މީޑިއާގައި ދައުރުވިއެވެ.

މި ޖަލްސާގައި ވެސް އާދައިގެ މަތިން ގިނަ އިރުތަކެއް ވަންދެން ޕީޕީއެމްގެ ރިޔާސީ ކެންޑިޑޭޓް އަދި މިހާރުގެ ރައީސުލްޖުމްހޫރިއްޔާ އަބްދުﷲ ޔާމީން އަބްދުލްޤައްޔޫމް ވަނީ ވާހަކަ ދައްކަވާފައެވެ. އެމަނިކުފާނުގެ ވާހަކަފުޅުގައި އާދައިގެ މަތިން އަންގާރަ ދުވަހުގެރޭ ވެސް އިދިކޮޅު ފަރާތްތަކަށް ބަހުގެ ހަމަލަތާކެއް ދެއްވުމުގައި ގިނަ ވަގުތުތަކެއް ހޭދަކުރެއްވިއެވެ. އަދި ޚާއްސަކޮށް ގުޅިފައިވާ ޕާޓީތަކުގެ ރިޔާސީ ކެންޑިޑޭޓް އިބްރާހިމް މުހައްމަދު ސޯލިޙް (އިބޫ) އަށް ރައީސް ޔާމީން ވަރަށް ބޮޑަށް ފާޑުވިދާޅުވިއެވެ.

ޖަލްސާގައި ވާހަކަ ދައްކަވަމުން ރައީސް ޔާމީން ވިދާޅުވީ އިބޫ އަކީ އިދިކޮޅު ހަތަރު ލީޑަރުން ވިދާޅުވާހާ ގޮތަކަށް ކަންތައް ކުރައްވަން ހުންނެވި ބޭފުޅެއް ކަމަށެވެ. ރައީސް ޔާމީން އިބޫ ސިފަކުރެއްވީ ހަތަރު ލީޑަރުން ވިދާޅުވާ ގޮތަށް "ހަމައެކަނި ކޭކު ފޮތި ފަޅާލުމަށްޓަކައި ވަޅި ހިފަހައްޓާ" ބޭފުޅެއްގެ ގޮތުގައެވެ.

އިދިކޮޅު ފަރާތްތަކުގެ މެނިފެސްޓޯ އަށް ވެސް ރައީސް ޔާމީން ވަނީ ފާޑުވިދާޅުވެފައެވެ. ރައީސް ޔާމީން ވިދާޅުވީ އެމެނިފެސްޓޯގައި އޮތީ އެމްޑީޕީއިން އެކަނި ބޭނުންވާ ކަންތައްތައް ކަމަށާއި، އެހެން ޕާޓީތަކުން ބޭނުންވާ ކަންކަން އޭގައި ނެތް ކަމަށެވެ. ރައީސް ޔާމީން އެހެން ވިދާޅުވި ނަމަވެސް ގުޅިފައިވާ ޕާޓީތަކުން އާއްމު ކޮށްފައިވާ މެނިފެސްޓޯއަކީ އެމްޑީޕީ އިން އެންމެ ފުރަތަމަ ހުށަހެޅި މެނިފެސްޓޯއަށް އެހެން ޕާޓީތަކުން ބޭނުންވާ އިސްލާޙު ގެނެސް، އެމްޑީޕީ އިން ބޭނުންވި ބައެއް ކަންކަން އުނިކޮށްގެން ނެރެފައިވާ މެނިފެސްޓޯއެކެވެ. ރައީސް ޔާމީން އިދިކޮޅު ފަރާތްތަކުގެ މެނިފެސްޓޯއަށް ފާޑުވިދާޅުވިއިރު، ޕީޕީއެމްގެ މެނިފެސްޓޯ ނެރުނީ މިޖަލްސާގައި ކަމަށާއި، ގުޅިފައިވާ ޕާޓީތަކުގެ މެނިފެސްޓޯ މީގެ އެތައް ދުވަހެއް ކުރިން ނެރެފައިވާކަން އިދިކޮޅު ފަރާތްތަކުން ވަނީ ފާހަގަކޮށްފައެވެ.

ރައީސް ޔާމީންގެ ވާހަކަފުޅުގައި އިދިކޮޅު ފަރާތްތަކަށް ފާޑު ވިދާޅުވަމުން ނުކުޅެދުންތެރިކަން ހުންނަ ފަރާތްތަކަށާއި އަންހެނުންނަށް ކުޑައިމީސްވާ ގޮތަށް ވާހަކަ ދެއްކެވި ކަމަށް ބުނެ ގިނަ ބަޔަކު ވަނީ ފާޑުކިޔާފައެވެ.