ސިޔާސީ ސަބަބުތަކަށްޓަކައި މި ސަރުކާރުން ވަޒީފާއިން ވަކިކޮށްފައިވާ ބައެއް ފަރާތްތަކާ ގުޅިފައިވާ ސިޔާސީ ޕާޓީތަކުގެ ރިޔާސީ ކެންޑިޑޭޓް އިބްރާހިމް މުހައްމަދު ސޯލިޙް (އިބޫ) ބައްދަލުކުރައްވައިފިއެވެ.

އެފަރާތްތަކާ އިބޫ ބައްދަލުކުރައްވާފައި ވަނީ އަންގާރަ ދުވަހުގެ މެންދުރުގެ ވަގުތެއްގައެވެ. މެންދުރުގެ ކެއުމާ އެކު ކުރިއަށް ދިޔަ މި ބައްދަލުވުމުގައި އެކި ސަބަބުތަކާ ހުރެ މި ސަރުކާރުން ވަޒީފާއިން ވަކިކޮށްފައިވާ ފަރާތްތަކުގެ ތެރެއިން މާލޭގައި އުޅޭ ބައެއް ފަރާތްތައް ބައިވެރިވިއެވެ. އިބޫ ވަނީ އެކި ފަހަރު މަތިން އެކި ޖަލްސާތަކުގައި، އެމަނިކުފާނުގެ ވެރިކަމުގެ ފުރަތަމަ ދޮޅު އަހަރު ހޭދަކުރައްވާނީ އިންތިޤާލީ އިންސާފު ޤާއިމްކުރެއްވުމަށް ކަމަށް ވިދާޅުވެ، އެ މަރުހަލާގައި މިސަރުކާރުން ނުހައްޤުން ވަޒީފާ އިން ވަކިކޮށްފައިވާ ފަރާތްތަކަށް އަލުން އަނބުރާ ވަޒީފާ ދެއްވާނެ ކަމަށް ވިދާޅުވެފައެވެ.

ފާއިތުވި ފަސް އަހަރު އިދިކޮޅު ފަރާތްތަކުގެ ޖަލްސާތަކާއި އެއްވުންތަކުގައި ބައިވެރިވެގެންނާއި، އިދިކޮޅު ފަރާތްތަކަށް ތާއީދުކޮށްގެންނާއި އަދި އިދިކޮޅު ލީޑަރުންނާ ބައްދަލުކޮށްގެން ގިނަ ބަޔަކު ވަޒީފާއިން ވަކިކޮށްފައިވާއިރު، ބައެއް ފަރާތްތައް ދުރު ރަށްރަށުގެ ވަޒީފާތަކަށް ބަދަލުކޮށްފައި ވެއެވެ. މީގެ އިތުރުން 1 ފެބްރުއަރީގެ ސުޕްރީމް ކޯޓުގެ އަމުރުގެ ފަހުން ފުލުހުންނާއި ސިފައިންގެ ތެރެއިން ވެސް ގިނަ ބަޔަކު ހައްޔަރުކޮށް، ފަހުން ވަޒީފާއިން ވަކިކޮށްފައި ވެއެވެ. 

އިބޫ އާއި އެމަނިކުފާނުގެ ރަނިންގ މޭޓް ފައިސަލް ނަސީމް ވަނީ ސަރުކާރުން ދައްކާ ބިރަށް ނުތިބެ، ސިވިލް ސަރވިސްގެ މުވައްޒަފުންނާއި، ސަރުކާރު ކުންފުނިތަކުގެ މުވައްޒަފުން، އެމުވައްޒަފެއްގެ ސިޔާސީ ފިކުރު މިނިވަންކަމާ އެކު ހާމަކުރުމަށް ގޮވާލައްވާފައެވެ. 

ވެރިކަންކުރާ ޕާޓީ، ޕްރޮގްރެސިވް ޕާޓީ އޮފް މޯލްޑިވްސް (ޕީޕީއެމް)ގެ ޖަލްސާތަކަށް ދިޔުމަށް ސަރުކާރު މުވައްޒަފުންނަށް މަޖުބޫރުކުރުވާ ކަމަށާއި، ނުދާ މުވައްޒަފުންނާއި ދޭތެރޭ ފިޔަވަޅު އަޅާނެ ކަމަށް އެމުވައްޒަފުން ބުނާ ވާހަކަތަކަކީ މިދިޔަ 5 އަހަރު އާއްމު ވާހަކައެކެވެ.