ޑީޖޭއޭގެ ވެރިޔާ މަޖިލީހުން އައްޔަން ކުރަންޖެހޭ ގޮތަށް ހަދާނަން: ކޯލިޝަން
ވަކީލުންނަށް ހުއްދަ ދޭނީ ބާ ކައުންސިލުން
ސުޕްރީމް ކޯޓުގެ ފަނޑިޔާރުން: ޑީޖޭއޭ ހިންގަމުންދަނީ ސުޕްރީމް ކޯޓުގެ ދަށުން
ޑިޕާޓްމަންޓް އޮފް ޖުޑީޝަލް އެޑްމިނިސްޓްރޭޝަން (ޑީޖޭއޭ)ގެ އެންމެ އިސް ވެރިޔާ، ޗީފް ޖުޑީޝަލް އެޑްމިނިސްޓްރޭޓަރު މަޖިލީހުން އައްޔަން ކުރަންޖެހޭ ގޮތަށް ބަދަލު ކުރާނެ ކަމަށް ގުޅިފައިވާ ޕާޓީތަކުން މެނިފެސްޓޯގައި ހިމަނައިފިއެވެ.
ގުޅިފައިވާ ޕާޓީތަކުގެ މެނިފެސްޓޯގައި ބުނެފައި ވަނީ ޑީޖޭއޭ ސުޕްރީމް ކޯޓުގެ އިހްތިސާސުގެ ދަށުން ވަކިކުރާނެ ކަމަށެވެ.
އާ ގާނޫނުއަސާސީއަށް އަމަލު ކުރަން ފެށި ފަހުން، ޑީޖޭއޭ ހިންގަމުންދަނީ ސުޕްރީމް ކޯޓުގެ ދަށުންނެވެ. އެގޮތުން 2008 ވަނަ އަހަރު އެ ކޯޓުން ނެރުނު ރޫލިންއެއްގެ ދަށުން ޝަރުއީ ދާއިރާގެ އިދާރީ އެންމެހައި ކަންކަން ރާވާއި ހިންގައި ބެލެހެއްޓުމުގެ މަސްއޫލިއްޔަތު ޙަވާލުކޮށްފައި ވަނީ އެ އިދާރާއާއެވެ. އަދި އެ އިދާރާ ހިންގުމާ ޙަވާލުވެ ތިއްބެވި ފަރާތްތަކާ ޙަވާލުކުރެވޭ މަސްއޫލިއްޔަތުތަކާ ބެހޭ ގޮތުން ޖަވާބުދާރީވަމުން ގެންދާނީ ސުޕްރީމް ކޯޓަށް ކަމަށް އެ ރޫލިންގައި ބުނެފައިވެއެވެ.
ގުޅިފައިވާ ޕާޓީތަކުގެ މެނިފެސްޓޯގައި ބުނެފައި ވަނީ ކޯޓުތަކުގެ ކޭސް މެނޭޖުމަންޓް ސިސްޓަމް ގާއިމުކޮށް ބެލެހެއްޓުމަކީ ޑީޖޭއޭގެ މަސްއޫލިއްޔަތެއް ކަމުގައި ކަނޑައަޅާނެ ކަމަށެވެ. އަދި އެ އިދާރާގެ އެންމެ އިސްވެރިޔާ ޗީފް ޖުޑީޝަލް އެޑްމިނިސްޓްރޭޓަރު މަޖިލީހުން އައްޔަން ކުރަންޖެހޭ ގޮތަށް ބަދަލުކޮށް، ކޯޓުތަކުގެ ބަޖެޓް ކަނޑައެޅުމުގެ ބާރު ޑީޖޭއޭއަށް ދޭނެ ކަމަށް ވެސް ގުޅިފައިވާ ޕާޓީތަކުގެ މެނިފެސްޓޯގައި ކަނޑައަޅާފައިވެއެވެ.
ގުޅިފައިވާ ޕާޓީތަކުގެ މެނިފެސްޓޯގައި ވައުދުވެފައި ވަނީ ގާނޫނީ ވަކީލުންނަށް ހުއްދަ ދިނުމާއި އެ މީހުން ތަބާވާންޖެހޭ ގަވާއިދުތައް ކަނޑައެޅުމުގެ ބާރު ލިބިދޭ ގޮތަށް ބާރ ކައުންސިލެއް އުފައްދާނެ ކަމަށެވެ. އަދި ގާނޫނީ ވަކީލުން ޖަވާބުދާރީ ވާންޖެހޭނީ އެ ކައުންސިލަށް ކަމަށް ގުޅިފައިވާ ޕާޓީތަކުގެ މެނިފެސްޓޯގައިވެއެވެ.
