ރައީސުލްޖުމްހޫރިއްޔާ އަބްދުﷲ ޔާމިން އަބްދުލްގައްޔޫމްގެ އަރިހުގައި ސިޔާސީ ގޮތުން ހަރުދަނާ އެއްވެސް ބޭފުޅެއް ނެތް ކަމަށް ޖުމްހޫރީ ޕާޓީގެ އެޑްވައިޒަރ އާދަމް އާޒިމް ވިދާޅުވެއްޖެއެވެ.
ދ.ކުޑަހުވަދޫގައި ކޯލިޝަނުން ބޭއްވި ޖަލްސާގައި އާޒިމް ވިދާޅުވީ މިހާރު މިމާހައުލުން ފެންނަނީ ގިނަ ބަޔަކު ރައީސް ޔާމިން ދޫކޮށް ދާތަން ކަމަށާއި، ކުރިއަށް އޮތްތަނުގައި ވެސް މިމަންޒަރު ރައްޔިތުންނަށް ފެންނާނެ ކަމަށެވެ. ރައީސް ޔާމިންގެ އަރިހުގައި ގިނަ ބަޔަކު ތިބި ކަމަށް ހީފުޅުކުރުމަކީ ކުށްހީއެއް ކަމަށް އާޒިމް ވިދާޅުވިއެވެ.
އާޒިމް ވިދާޅުވީ ރާއީސް ޔާމިންގެ އެކަނިވެރިކަން އަރިހުގައި ހުރި ޝިޔާމް ދޫކޮށް ދިއުމުން މިހާރު ރައްޔިތުންނަށް ޔަގީންވެފައިވާ ކަމަށެވެ. އާޒިމް ވިދާޅުވީ ރައީސް ޔާމިންއަކީ ވެރިކަމުގައި ހުރުމަށް ކުފާ ހަމަވާ ބޭފުޅެއް ނޫން ކަމަށާއި، އެމަނިފާނުގެ އަރިހުގައި ތިބި ބޭފުޅުން ވެސް އެކަން ގަބޫލު ކުރާ ކަމަށެވެ. އަދި އެބޭފުޅުން ވެސް އެމަނިފާނަށް އިހުލާސްތެރި ނޫން ކަމަށް އާޒިމް ވިދާޅުވިއެވެ.
"ހަމައަސްލުކޮށް ވެސް އަޅުގަނޑުމެންގެ ފޭސްބުކް އެކައުންޓާއި ޓްވިޓަރ އެކައުންޓް މެސެޖް ފުރިފައިވަނީ އެބޭފުޅާ އަރިހުގައި ތިބި ބޭފުޅުންގެ މެސެޖުން. އެބޭފުޅުން ބުނޭ ތިމަންނާމެން ދެން ކުޑަ ދުވަސްކޮޅެއްގައި ނުކުމެގެން ބަޗާނަމޭ. އެބޭފުޅާ އެކަނި ކޮށްފައި. އެބޭފުޅާއަކީ ރާއްޖޭގެ ވެރިކަމަށް އެއްވެސް ގޮތަކަށް ކުފޫ ހަމަވާ ބޭފުޅެއް ނޫނޭ. އެހެންނަމަވެސް ތިމަންނަމެން މިތިބެނީ ތިމަންނާމެން ފިޑިކަމުން ނުކުންނަން ނުކެރިފައޭ. ތިމަންނަ ހަދާލާނެ ގޮތަކަށް ބަލަބަލައޭ." އާޒިމް ވިދާޅުވިއެވެ.
ރާއީސް ޔާމިންއަކީ ފިޑި ބޭފުޅެއްކަން ފާހަގަކުރައްވައި އާޒިމް ވިދާޅުވީ ރައީސް ޔާމިންއަކީ އެއްވެސް ބާރެއް ހުރި ބޭފުޅެއް ނޫން ކަމަށެވެ. އަދި ރައީސް ޔާމިނަށް މިހާރު ޕޯޑިއަމްތައް ލިބުނީމަ ރައްޔިތުންނާއި ދިމާލަށް ކިޔޭ ނުކިޔޭ އެއްޗެހި ވެސް ނޭނގޭ ކަމަށް އާޒިމް ވިދާޅުވިއެވެ.
މީގެ އިތުރަށް އާޒިމް ވިދާޅުވީ ފުލުހުންނާއި، ސިފައިންނާއި އަދި އިލެކްޝަންސް ކޮމިޝަނުންވެސް ވޯޓް އޮޅުވާލަން ފުރުސަތު ނުދޭނެ ކަމަށެވެ. ދިވެހިންނަކީ ހޭލުންތެރިބައެއް ކަމަށާއި، ވޯޓު ފޮށި ވަގަށް ނަގައިގެންދާތަން ބަލަން ނުތިބޭނެ ކަމަށް އާޒިމް ވިދާޅުވިއެވެ.
ހުރިހާ ބާރަކީ ރައްޔިތުންގެ ބާރުކަން ފާހަގަކުރައްވައި އާޒިމް ވިދާޅުވީ އެބާރު ނަގަހައްޓަން ޖެހޭނީ ރައްޔިތުން ކަމަށާއި، މިގައުމުގައި ހުރިހާ ކަމެއްދާނީ ރައްޔިތުން ބޭނުންވާ ގޮތަށް ކަމަށެވެ. އަދި ވިދާޅުވީ ސިފައިންނާއި ފުލުހުންނާއި، ސަރުކާރުގެ އެކި ވާޒީފާގައި ތިބި މީހުންނަށް ވަޒީފާގެ ބިރުވެރިކަން ދައްކަމުންދާއިރު މިމަހުގެ 23 ވަނަ ދުވަހު ހުރިހާ ރައްޔިތުން ނުކުމެ ރައީސް ޔާމިން ވަޒީފާއިން ވަކިކުރަންޖެހޭ ކަމަށެވެ.
އާޒިމް ވިދާޅުވީ މިއަހަރުގެ ރިޔާސީ އިންތިޚާބަކީ މިގައުމުގައި ވައްކަމާއި، ކޮރަޕްޝަނާއި، އާނިޔާ އާންމުވުމުން އެކަން ހުއްޓުވުމަށް ލެވޭ ވޯޓެއް ކަމަށެވެ. މިގައުމު އަމާން ބަނދަރަކަށް ގެންދެވޭނީ ކޯލިޝަންގެ ކެންޑިޑޭޓް އިބްރާހިމް މުހައްމަދު ސޯލިހު (އިބޫ) މިގައުމުގެ ވެރިކަމަށް ގެނެވިގެން ކަމަށް ވިދާޅުވެ އިބޫ ވެރިކަމުގައި ރައްޔިތުން ބޭނުންވާ ޚިދުމަތްތަކަށް ސަލާމް ޖަހަން ނުޖޭނެ ކަމަށް ވެސް އާޒިމް ވިދާޅުވިއެވެ.
