މާލޭގެ ކުއްޔަކީ ކޮންޓްރޯލް ކުރެވޭނެ އެއްޗެއް ނޫން ކަމަށާއި އެ ކޮންޓްރޯލް ކުރަން އުޅެފިނަމަ އިތުރު މައްސަލަތައް ނިކުންނާނެ ކަމަށް ސަރުކާރު ހިންގާ ޕީޕީއެމްގެ ރިޔާސީ ކެންޑިޑޭޓް އަދި ރައީސުލްޖުމްހޫރިއްޔާ އަބްދުﷲ ޔާމީން އަބްދުލްގައްޔޫމް ވިދާޅުވެއްޖެ އެވެ.
މޯލްޑިވްސް ނޭޝަނަލް ޔުނިވާރސިޓީން އިންތިޒާމުކޮށްގެން ކުރިއަށް ގެންދަން މަސައްކަތް ކުރި، ރިޔާސީ ބަހުސްގައި، ރައީސް ޔާމީން އަމިއްލަފުޅަށް ބައިވެރިވެވަޑައިގެން ވާހަކަފުޅު ދައްކަވަމުން ވިދާޅުވީ ރާއްޖޭގެ ރަށްތައްކުގެ ގިނަ އަދަދެއްގެ ބަޔަކު ވެރިކަން ކުރާ މާލޭގައި ބޮޑު ކުލީގައި ދިރިއުޅެމުންދާ ކަމަށެވެ. ނަމަވެސް ކުލި ކޮންޓްރޯލްކޮށްގެން ބޯހިޔާވަހިކަން ފޯރުކޮށްދެވޭތޯއޭ ވިދާޅުވެ ރައީސް ޔާމީން ވަނީ ސުވާލު އުފައްދަވާފަ އެވެ.
ރައީސް ޔާމީން ވިދާޅުވީ ލިބޭ އާމްދަނީން ރައްޔިތުންނަށް އެންމެ ބޮޑު ބުރައެއް އުފުލަންޖެހޭ އެއްޗަކީ ދިރިއުޅޭ ތަނުގެ ކުލި ކަމަށެވެ. އަދި އިމާރާތް ކުރުމުގެ ސިނާއަތުގައި އުޅޭނީ އަމިއްލަ ވިޔަފާރި ކުންފުނިތައް ކަމަށާއި ރައްޔިތުންނަށް ބޯހިޔާވަހިކަން ފޯރުކޮށްދިނުމުގައި އެންމެބޮޑު ރޯލެއް އަދާކުރަމުންދަނީ ވެސް އަމިއްލަ ވިޔަފާރި ކުންފުނިތަކުން ކަމަށެވެ. އެހެންކަމުން ސަރުކާރުން ކުލި ކޮންޓްރޯލްކުރަން އުޅެފިނަމަ އެވިޔަފާރި ހުއްޓި ބޯހިޔާވަހިކަން ރައްޔިތުންނަށް ލިބުމުގައި ދަތިކަން އިތުރަށް ކުރިމަތިވާނެ ކަމަށެވެ.
"ހުރިހާ ތަނެއްގެ ރެންޓް ކޮންޓްރޯލް ކޮށްގެން މީހުންނަށް ބޯހިޔާވަހިކަން ލިބޭނެތޯ. ލިބޭ އާމްދަނީން އެންމެބޮޑު ބުރައެއް އުފުލާއެއް އެއްޗަކީ ރެންޓް. ރާއްޖޭގައި ހައުސިންގ ނުވަތަ މާލޭގައި ހައުސިންގ މިދެނީ ޕްރައިވެޓް ސެކްޓަރ ހައުސިންއަށް އައީމައި. ކޮންމެ މީހެއްގެ ގޭގެ އެޕާޓްމަންޓް ނުވަތަ ރިއަލް ސްޓޭޓް އުސޫލުން އެޕާޓްމަންޓްތައް ހަދައިގެން އުޅެނީ. ސަރުކާރުން އަގު ކޮންޓްރޯލް ކުރަން އުޅެފިނަމަ ގާނޫނަކުން އަގު ކޮންޓްރޯލް ކުރެވިދާނެ. ދެ ނަތީޖާ ނިކުންނާނެ، އެއްނަތީޖާއަކީ އެތައް ބަޔަކު ކުށްކުރީމައި އެމީހުން ގޮވައިގެން ޝަރީއަތުގައި އުޅެންޖެހޭނީ. އަނެއް ނަތީޖާއަކީ ޕްރައިވެޓް ސެކްޓަރުން އެޕާޓްމަންޓްތައް ކުއްޔަށް ދޭދިނުން ހުއްޓާލާނީ،" ރައީސް ޔާމީން ވިދާޅުވި އެވެ.
ރާއްޖޭގައި ބޯހިޔާވަހިކަން އެންމެބޮޑު މައްސަލައެއްގެ ގޮތުގައި ގިނަ ރައްޔިތުން ފާހަގަ ކުރަމުންދާއިރު، މާލޭ ސިޓީގެ ދިރިއުޅުމުގެ ޚަރަދު އިންތިހާއަށް ވަނީ ބޮޑުވެފަ އެވެ. ހާއެްސަކޮށް އެޕާޓްމަންޓްގެ ކުލީގެ ގޮތުގައި ފައިސާގެ ބޮޑެތި އަދަދުތަކުން ނަގަމުންދާއިރު، އެޑްވާންސް ފައިސާގެ ގޮތުގައި ވެސް ބޮޑެތި އަދަދުތައް ނަގަމުން ދެއެވެ. ބޯހިޔާވަހިކަމުގެ ނުވަތަ ކުލީގެ މައްސަލަތައް މިހާރުވެސް ކޯޓަށް ހުށަހެޅޭލެއް ވަކި މަދެއްވެސް ނޫނެވެ. އަދި ބޮޑެތި ކުލީގައި ދިރިއުޅެން ޖެހިފައިވުމުން އިޖުތިމާއީ ގޮތުން އެތައް މައްސަލަތަކެއް ދަނީ ފެންމަތިވަމުން ނެެވެ.
މާލޭ ސިޓީގެ އެޕާޓްމަންޓްތަކުގެ ކުލި އިންތިހާއަށް ބޮޑުވެފައިވާއިރު، އިމާރާތްކުރުމަށް ބޭނުންކުރާ ތަކެތިން ޑިއުޓީ ނެގުންފަދަ ފީ ތަކުން ލުއި ގޮތްތައް ސަރުކާރުން ގާނޫނުގެ ތެރެއިން ހަމަޖައްސަމުންދާއިރު، ދުވަހެއް ދުވަހަކަށް އެޕާޓްމަންޓްތަކުގެ ކުލި ބޮޑުވުމާއި ދިރިއުޅުމުގެ ޚަރަދު ބޮޑުވާ މައްސަލައަކީ ދިވެހި ރައްޔިތުންނަށް މިއަދު ދިމާވެފައިވާ އެންމެބޮޑު މައްސަލަ އެވެ.
ރައީސް ޔާމީން އެގޮތަށް ވިދާޅުވިއިރު، އެމަނިކުފާނަކީ މާލޭން ގޯއްޗެއް ބައްލަވައިގަނެ، އަދި ފަހުން އެގޯތި، މާލޭގެ އެންމެ ހިތްގައިމު ސަރަހައްދުގެ ގޯއްޗަކާއި ލާޖައްސަވައިގެން ބަދަލުކޮށް، އެގޯތީގައި މާލޭގައި އިމާާރާތް ކުރެވޭ އެންމެ ފެންވަރު ރަނގަޅު އަދި ބޮޑު އެއް އިމާރާތް ހަދަމުންދާ ބޭފުޅެކެވެ.
